AKP កំពង់ធំ ថ្ងៃទី២៥ ខែកុម្ភៈ ឆ្នាំ២០២៦--ដោយអនុវត្តតាមការចង្អុលដឹកនាំដ៏ខ្ពង់ខ្ពស់ពីឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិកាលពីថ្ងៃទី២៤ ខែកុម្ភៈ ឆ្នាំ២០២៦ លោកឧត្តមសេនីយ៍ទោ ហេង សុផលស្នងការនគរបាលខេត្តកំពង់ធំ បានដឹកនាំកិច្ចប្រជុំបូកសរុបលទ្ធផលការងារប្រចាំត្រីមាសទី១និងលើកទិសដៅអនុវត្តបន្តដែលមានកងកម្លាំងចូលរួមប្រមាណ៣០០នាក់នៅសាលប្រជុំស្នងការដ្ឋាននគរបាលខេត្ត។

លោកឧត្តមសេនីយ៍ទោ ហេង សុផល បានបញ្ជាក់ថា កិច្ចប្រជុំពិតជាមានសារៈសំខាន់គឺដើម្បីផ្សព្វផ្សាយគោលការណ៍បទបញ្ជាថ្មីៗរបស់ថ្នាក់ដឹកនាំ ដល់កងកម្លាំងយកទៅអនុវត្តឱ្យទទួលបានប្រសិទ្ធភាពខ្ពស់។ ដើម្បីត្រួតពិនិត្យលទ្ធផលការងារដែលកងកម្លាំងអនុវត្តបាននាពេលកន្លងមក។ ដកបទពិសោធន៍ដោះស្រាយបញ្ហាប្រឈម ផ្លាស់ប្តូរយោបល់លើកទិសដៅសម្រាប់អនុវត្តបន្តឈានទៅសម្រេចបានជោគជ័យជូនថ្នាក់ដឹកនាំ និងអង្គភាព។

លោកឧត្តមសេនីយ៍ទោ ហេង សុផល បានគូសបញ្ជាក់ថាខេត្តកំពង់ធំពុំមានបទល្មើសឆបោកតាមប្រព័ន្ធបច្ចេកវិទ្យា(Online Scams)ទេព្រមទាំងមិនអនុញ្ញាតឱ្យមានវត្តមាន(Online Scams) ជាដាច់ខាតព្រមទាំងបានក្រើនរំលឹកដល់ថ្នាក់នាំនៃស្នងការដ្ឋានគរបាលខេត្ត និងលោកអធិការនគរបាលក្រុង-ស្រុក ត្រូវអនុវត្តឱ្យបានម៉ឺងម៉ាត់បំផុត នូវអនុក្រឹត្យលេខ០៣ អនក្រ.បក ស្តីពីការគ្រប់គ្រងសន្ដិសុខ សុវត្ថិភាពតាមទីតាំងរស់នៅប្រមូលផ្តុំនិងបទបញ្ជាលេខ០១ បប របស់រាជរដ្ឋាភិបាលស្តីពីយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា (Online Scams)។

ដើម្បីធានាសេចក្តី សុខក្សេមក្សាន្តជូនប្រជាពលរដ្ឋនិងសង្គមជាតិ លោកស្នងការបានដាក់ចេញទិសដៅចំនួន៧ចំណុច ដល់ផែនជំនាញជំនាញអធិការនគរបាលក្រុង-ស្រុកនិងប៉ុស្តិ៍នគរបាលរដ្ឋបាលទាំង៨១ ឃុំ-សង្កាត់យកទៅអនុវត្តឱ្យ សម្រេចបានផ្លែផ្កាស្នាដៃបន្តទៀត÷ ១.បង្កើនការផ្សព្វផ្សាយគោលនយោបាយ "ភូមិ-ឃុំ-សង្កាត់មានសុវត្ថិភាព" ឱ្យចំតាមគោលដៅ ងាយរងគ្រោះ។ ២. ផែនការងារព្រហ្មទណ្ឌត្រូវមានផែនការជាក់លាក់សម្រាប់អនុវត្ត បម្រើឱ្យកិច្ចប្រតិបត្តិការ រក្សា សន្តិសុខសុវត្ថិភាពសណ្តាប់ធ្នាប់សាធារណៈ។ ជាក់ស្តែងនាពេលកន្លងមកនេះ បទល្មើសបង្កឡើងដោយក្មេងទំនើងសមត្ថកិច្ចយើងបង្ក្រាបបានទាន់ពេលវេលា ចាត់ការតាមនីតិវិធីច្បាប់។ ៣.ចំពោះការងារសណ្តាប់ធ្នាប់សាធារណៈបង្កើនការផ្សព្វផ្សាយអប់រំគ្រប់ទំរង់រូបភាពដើម្បីបញ្ជ្រាបការយល់ដឹងដល់ប្រជាពលរដ្ឋឱ្យចូលរួមអនុវត្តច្បាប់ចរាចរណ៍ផ្លូវគោកស្របតាមអនុក្រឹត្យ៣៩អនក្រ.បកឱ្យបញ្ហាគ្រោះថ្នាក់ចរាចរណ៍មានការ ថយចុះ។

៤.ផែនការងារអត្តសញ្ញាណកម្ម : បង្កើនការផ្តល់សេវា ជូនប្រជាពលរដ្ឋ(សៀវភៅស្នាក់នៅ សៀវភៅគ្រួសារ និងអត្តសញ្ញាណប័ណ្ណសញ្ជាតិខ្មែរ)ផ្ដល់ទំនុកចិត្ត ដល់ប្រជាពលរដ្ឋ រហ័ស ទាន់ពេលវេលា។៥.ការងារគ្រប់គ្រងអាវុធគ្រឿងផ្ទុះនិងអគ្គិភ័យ ថែទាំត្រួតពិនិត្យសម្ភារបច្ចេកទេស រថយន្ត សម្រាប់កិច្ចអន្តរាគមន៍សង្គ្រោះដល់ប្រជាពលរដ្ឋនាគ្រាជួបហេតុការណ៍ចៃដន្យ។ ៦.ផែនការងារសេនាធិការបន្តបានចងក្រង របាយការណ៍លម្អិតដើម្បីរំលេចអំពីស្នាដៃ គុណបំណាច់ របស់កងកម្លាំងតាមបណ្ដាផែនការងារជំនាញ សម្រេចបាននាពេលកន្លងមកនិង៧.ផែនការងារ ភស្តុភារ និងហិរញ្ញវត្ថុគ្រប់គ្រងទ្រព្យសម្បត្តិរដ្ឋ(ចលនទ្រព្យ និងអចលនទ្រព្យ)និងបើកគោលរបបរបស់មន្ត្រីនគរបាលជាតិកម្ពុជា។

លោកស្នងការនគរបាលខេត្តបានប្រគល់លិខិតសរសើរដល់ថ្នាក់ដឹកនាំ និងកងកម្លាំងទូទាំងខេត្តដែលមានស្នាដៃក្នុងការអនុវត្តតួនាទីភារកិច្ចនាពេលកន្លងមកចំនួន១៤៣រូប៕

ដោយ ស៊ុម វណ្ណា