AKP កំពង់ធំ ថ្ងៃទី២៤ ខែកុម្ភៈ ឆ្នាំ២០២៦ -- លោក ហាក់ ម៉ុងហួត អភិបាលស្រុកតាំងគោក កាលពីថ្ងៃទី២៣ ខែកុម្ភៈ ឆ្នាំ២០២៦ បានដឹកនាំក្រុមការងារចុះពិនិត្យមើលស្ថានភាពរស់នៅ និងការដាំដុះដំណាំតាមចម្ការដំណាំដំឡូង ស្វាយចន្ទី និងដំណាំផ្សេងៗទៀតរបស់ប្រជាកសិករនៅក្នុងឃុំទ្រៀល ស្រុកតាំងគោក ខេត្តកំពង់ធំ ដើម្បីពិនិត្យជាក់ស្តែង និងសាកសួរពីតម្លៃ ក៏ដូចជាបញ្ហាកង្វល់ផ្សេងៗ ដើម្បីអាជ្ញាធរត្រៀមជួយឱ្យបានទាន់ពេលវេលា។

លោក ហាក់ ម៉ុងហួត បានចាត់ទុកការដាំដំណាំរួមផ្សំរបស់ប្រជាពលរដ្ឋ គឺជាផ្នែកមួយដ៏សំខាន់ ដែលអាចរកប្រាក់ចំណូល និងផ្គត់ផ្គង់ជីវភាពនៅប្រចាំថ្ងៃ ព្រមទាំងបានលើកទឹកចិត្តដល់ប្រជាកសិករទាំងអស់ឱ្យបន្តខិតខំប្រឹងប្រែងដាំដុះ ដើម្បីតម្រូវការទីផ្សារ និងបង្កើនជីវភាពឱ្យកាន់តែល្អប្រសើរជាងមុន។ ជាក់ស្ដែង ប្រជាកសិករភាគច្រើនប្រកបមុខរបរកសិកម្ម ដោយហេតុថាប្រភេទដីនៅតំបន់នោះមានអំណោយផលលើដំណាំកសិកម្មគ្រប់ប្រភេទ។ ការនាំចេញទៅកាន់ទីផ្សារមានងាយស្រួលដោយសារមានផ្លូវប្រកបដោយសុវត្ថិភាពក្នុងការដឹកជញ្ជូនតាំងពីចម្ការរហូតដល់ផ្លូវធំក្នុងស្រុកទាំងមូល។

ទន្ទឹមនឹងនេះ លោកអភិបាលស្រុកក៏បានណែនាំដល់អាជ្ញាធរឃុំចុះសួរសុខទុក្ខ និងតាមដានការដាំដុះរបស់ប្រជាកសិករ ប្រសិនបើមានបញ្ហាអ្វីមួយកើតឡើងទៅលើដំណាំគ្រប់ប្រភេទត្រូវផ្ដល់នូវដំណោះស្រាយជូនដល់ពួកគាត់ឱ្យទាន់ពេលវេលា។ ប្រជាកសិករមានក្ដីរំភើបរីករាយក្រោយដំណាំដាំដុះបានទទួលទិន្នផលច្រើន ហើយមានថ្នាក់ដឹកនាំស្រុកចុះសួរសុខទុក្ខរហូតដល់ចម្ការ និងបានអរគុណដល់ប្រមុខរាជរដ្ឋាភិបាលដែលបានជួយពួកគាត់នាពេលកន្លងមក៕

ដោយ ស៊ុម វណ្ណា