AKP ភ្នំពេញ ថ្ងៃទី២៣ ខែកុម្ភៈ ឆ្នាំ២០២៦-- ឯកឧត្តម អ៊ុំ សុផាន់ណារ៉ា អគ្គនាយកនៃអគ្គនាយកដ្ឋានសេវាសង្គមកិច្ច នៃក្រសួងសង្គមកិច្ច អតីតយុទ្ធជន និងយុវនីតិសម្បទា នៅសណ្ឋាគារកាំបូឌីយ៉ាណា នាថ្ងៃទី២៣ ខែកុម្ភៈ ឆ្នាំ២០២៥ បានអញ្ជើញបើកសិក្ខាសាលាតាមដានលើកទី២ ស្តីពីឧបករណ៍ប្រមូលទិន្នន័យលើការផ្តល់សេវាគាំពារដល់ជនរងគ្រោះដោយអំពើជួញដូរមនុស្ស និងអាជីវកម្មផ្លូវភេទ។

ឯកឧត្តម អ៊ុំ សុផាន់ណារ៉ា បានលើកឡើងថា សិក្ខាសាលានេះមានគោលបំណងបីសំខាន់៖ ទី១. ពង្រឹងការយល់ដឹងអំពីការដាក់ជូនទិន្នន័យតាមរយ:ឧបករណ៍ ប្រមូលទិន្នន័យ Kobo ស្តីពីការផ្តល់សេវាគាំពារដល់ជនរងគ្រោះ បញ្ជាក់ពីទិដ្ឋភាពប្រតិបត្តិការសំខាន់ៗ រួមបញ្ចូល ទាំងពេលវេលា និងនីតិវិធីសម្រាប់ការដាក់ជូនទិន្នន័យ ទី២. បង្កើនការយល់ដឹងជាមួយនឹងឧបករណ៍បញ្ចូលទិន្នន័យ ទី៣. ការអនុវត្តការប្រើប្រាស់លើឧបករណ៍បញ្ចូលទិន្នន័យនៅក្នុងផ្នែកនីមួយៗ និង ប្រមូលទិន្នន័យបានត្រឹមត្រូវ និងប្រកបដោយប្រសិទ្ធភាព និងដាក់របាយការណ៍ទៀងទាត់។

កម្មវិធីនេះរៀបចំដោយ នាយកដ្ឋានគាំពារជនរងគ្រោះ នៃអគ្គនាយកដ្ឋានសេវាសង្គមកិច្ច សហការជាមួយគម្រោងការអភិវឌ្ឍសមត្ថភាពដើម្បីជួយដល់ជនរងគ្រោះដែលរួចពីការជួញដូរមនុស្ស JICA  និងមានការចូលរួមពីប្រធាននាយកដ្ឋានគាំពារជនរងគ្រោះ តំណាងគម្រោង JICA ប្រធានមន្ទីរស.អ.យខេត្តត្បូងឃ្មុំ សៀមរាប ប្រធានមជ្ឈមណ្ឌល និងតំណាងអង្គការដៃគូ ដែលមានអ្នកចូលរួមសរុប៥៥ នាក់៕

ដោយ ណយ នឿន (ប្រភព៖ ក្រសួងសង្គមកិច្ច)