AKP ‎បន្ទាយមានជ័យ ថ្ងៃទី១៣ ខែកុម្ភៈ ឆ្នាំ២០២៦--ឆ្លុះបញ្ចាំងពីការយកចិត្តទុកដាក់ខ្ពស់បំផុតចំពោះសុខទុក្ខរបស់ប្រជាពលរដ្ឋ ស្របតាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីរសៀលថ្ងៃទី១២ ខែកុម្ភៈ ឆ្នាំ២០២៦ លោក ឃ្លោក នួយ អភិបាលរងខេត្តបន្ទាយមានជ័យ តំណាងឱ្យឯកឧត្តម អ៊ុំ រាត្រី អភិបាលខេត្ត បានដឹកនាំក្រុមការងារចុះពិនិត្យដោយផ្ទាល់នូវវឌ្ឍនភាពនៃការរៀបចំហេដ្ឋារចនាសម្ព័ន្ធ និងទីតាំងសាងសង់ជម្រកបណ្តោះអាសន្នសម្រាប់បងប្អូនប្រជាពលរដ្ឋភៀសសឹក។ នៅក្នុងបេសកកម្មនេះ ក៏មានការអមដំណើរដោយ លោក មឿត ផល្លេខ អភិបាលរងស្រុកអូរជ្រៅ ព្រមទាំងមន្ត្រីជំនាញ និងក្រុមការងារពាក់ព័ន្ធជាច្រើនរូបទៀតផងដែរ។

ការចុះពិនិត្យនេះផ្តោតសំខាន់ទៅលើការរៀបចំទីតាំងឱ្យមានរបៀបរៀបរយ ជាពិសេសការរៀបចំប្រព័ន្ធទឹក ភ្លើង និងតម្រូវការចាំបាច់ប្រចាំថ្ងៃ ដើម្បីធានាថាប្រជាពលរដ្ឋដែលរងគ្រោះដោយសារសង្គ្រាមឈ្លានពានពីភាគីថៃ មកលើដែនអធិបតេយ្យភាពកម្ពុជា នឹងទទួលបាននូវជម្រកដែលមានសុវត្ថិភាព និងផាសុកភាព ក្នុងអំឡុងពេលដែលពួកគាត់មិនទាន់អាចវិលត្រឡប់ទៅកាន់ភូមិឋានវិញបាន។

ក្នុងឱកាសនោះ លោក ឃ្លោក នួយ បានមានប្រសាសន៍សង្កត់ធ្ងន់ថា «រាជរដ្ឋាភិបាលកម្ពុជា ក្រោមការដឹកនាំប្រកបដោយកិត្តិបណ្ឌិតរបស់ សម្តេចធិបតី ហ៊ុន ម៉ាណែត តែងតែនៅជាប់ជាមួយប្រជាពលរដ្ឋគ្រប់កាលៈទេសៈ។ ការរៀបចំជម្រកបណ្តោះអាសន្ននេះ គឺជាអាទិភាពខ្ពស់បំផុត ដើម្បីផ្តល់ភាពកក់ក្តៅ និងឆ្លើយតបចំពោះការលំបាករបស់បងប្អូនដែលរងផលប៉ះពាល់ពីជម្លោះព្រំដែន»។ លោកក៏បានណែនាំដល់អាជ្ញាធរមូលដ្ឋាន ជាពិសេសរដ្ឋបាលស្រុកអូរជ្រៅ ត្រូវពន្លឿនការងារសាងសង់ និងរៀបចំប្រព័ន្ធសន្តិសុខឱ្យបានល្អបំផុត ដើម្បីការពារសុវត្ថិភាពជូនប្រជាពលរដ្ឋឱ្យបាន១០០%។

បច្ចុប្បន្ន ក្រុមការងារបច្ចេកទេសកំពុងខិតខំសម្រុកធ្វើការទាំងយប់ទាំងថ្ងៃលើការរៀបចំហេដ្ឋារចនាសម្ព័ន្ធផ្លូវថ្នល់ និងទីតាំងស្នាក់នៅ។ សកម្មភាពនេះបានបង្ហាញយ៉ាងច្បាស់ពីស្មារតីទទួលខុសត្រូវខ្ពស់របស់រដ្ឋបាលខេត្តបន្ទាយមានជ័យ ក្នុងការជួយសង្គ្រោះ និងគាំពារពលរដ្ឋខ្លួន កុំឲ្យមាននរណាម្នាក់ត្រូវបានបោះបង់ចោលឡើយ។

គួរបញ្ជាក់ថា ដោយសារស្ថានភាពតានតឹងនៅតាមបន្ទាត់ព្រំដែន ដែលបង្កឡើងដោយការរំលោភបំពានអធិបតេយ្យភាពពីសំណាក់ភាគីថៃ បានធ្វើឱ្យប្រជាពលរដ្ឋមួយចំនួនត្រូវជម្លៀសចេញពីលំនៅឋានដើម្បីសុវត្ថិភាព ខណៈដែលកងកម្លាំងប្រដាប់អាវុធកម្ពុជាកំពុងឈរជើងការពារទឹកដីយ៉ាងរឹងមាំ៕

ដោយ ឈុន សារ៉ាត