AKP ‎ព្រះសីហនុ ថ្ងៃទី១៣ ខែកុម្ភៈ ឆ្នាំ២០២៦-- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ អញ្ជើញចូលរួមដាំដើមឈើលម្អតាមដងផ្លូវលេខ២០០ ស្ថិតនៅសង្កាត់លេខ៣ ក្រុងព្រះសីហនុ និងចុះពិនិត្យដើមឈើដែលទើបដាំរួចនៅផ្លូវក្នុងក្រុង និងបន្តចុះសួរសុខទុកបងប្អូនអាជីវករលក់ដូរក្នុងក្រុងព្រះសីហនុ នារសៀលថ្ងៃទី១២ ខែកុម្ភៈ ឆ្នាំ២០២៦។

ក្នុងឱកាសនោះ ឯកឧត្តមអភិបាលខេត្តបានឱ្យដឹងថា រដ្ឋបាលខេត្តព្រះសីហនុសហការជារដ្ឋបាលក្រុងបើកយុទ្ធនាការជាមួយប្រជាពលរដ្ឋមួយខ្នងផ្ទះ ដើមឈើមួយដើម សម្រាប់ដាំលម្អតាមដងផ្លូវសាធារណៈក្នុងក្រុងព្រះសីហនុ។  យុទ្ធនាការនេះ ដោយមានការសហការពីមន្ទីរកសិកម្ម រុក្ខាប្រមាញ់ និងនេសាទខេត្ត មន្ទីរបរិស្ថានខេត្ត មន្ទីរសាធារណការ និងដឹកជញ្ជូនខេត្ត រដ្ឋបាលក្រុងព្រះសីហនុ រដ្ឋបាលសង្កាត់ ជាពិសេសមានការផ្តល់ការគាំទ្រពីបងប្អូនសប្បុរសជនដែលពួកគាត់បានចូលរួមឧបត្ថម្ភថវិកាសម្រាប់ទិញដើមឈើដាំលម្អនៅតាមដងផ្លូវសាធារណៈផងដែរ។ ហើយការងារនេះ គឺយើងបានចាប់ផ្តើមតាំងពីថ្ងៃទី២០ ខែតុលា ឆ្នាំ២០២៥ ដែលក្រុមការងារចុះពិនិត្យកំណត់យកតម្រាយផ្លូវសម្រាប់ដាំដើមឈើលម្អតាមដងផ្លូវចំនួន ២ខ្សែ ស្ថិតក្នុងសង្កាត់លេខ៤ និងសង្កាត់លេខ២ ក្រុងព្រះសីហនុ៖ ខ្សែទី១ កំណាត់ផ្លូវលេខ២០០ (ផ្លូវ៧មករា) គម្រោងដាំប្រភេទដើមត្របែកព្រៃចំនួន ១៨៧ដើម ចាប់ពីចំណុចភ្លើងស្តប់មន្ទីរពេទ្យបង្អែកខេត្តព្រះសីហនុ (ស្តប់៣៣៣) ឆ្ពោះទៅផ្សារលើទល់និងផ្លូវលេខ៨០០ (វិថីមិត្តភាព) លទ្ធផល៖ គិតត្រឹមថ្ងៃទី១២ ខែកុម្ភៈ ឆ្នាំ២០២៦ នេះក្រុមការងារដាំបានចំនួន ១៥១ដើម ក្នុងនោះបានធ្វើជន្មលដែក និងចាក់ខឿនជុំវិញគល់ ឈើចំនួន ១០៩ដើម។ ខ្សែទី២ ផ្លូវលេខ៨០០ (វិថីមិត្តភាព) គម្រោងដាំប្រភេទដើមក្ងោកចំនួន ៨០០ដើម ចាប់ពីចំណុចកែងស្តុបផ្សារលើឆ្ពោះទៅអូរ១ អូរ៥ ដល់កែងស្តុបផ្លូវលេខ៣០០ (បញ្ជាការដ្ឋានកងរាជអាវុធហត្ថខេត្ត) លទ្ធផលគិតត្រឹមថ្ងៃទី១២ ខែកុម្ភៈ ឆ្នាំ២០២៦ ក្រុមការងារដាំដើមក្ងោកបានចំនួន១០៦ដើម។ ហើយក្រុមការងារកំពុងបន្តជីករណ្តៅរៀបចំដាក់ជី ដើម្បីដាំដើមក្ងោកចំនួន៧០ដើមបន្ថែមទៀត និងធ្វើការដាំជួសដើមត្របែកព្រៃដែលងាប់ចំនួន ២៤ដើមផងដែរ។ ចំពោះមុខតម្រូវការដើមក្ងោកដាំបន្តលើផ្លូវលេខ៨០០ មានចំនួន ៦០០ដើមទៀត។

ឯកឧត្តមអភិបាលខេត្តបានធ្វើការអំពាវនាវដល់អាជ្ញាធរក្រុងព្រះសីហនុ និងអាជ្ញាធរសង្កាត់បន្តចលនាប្រជាពលរដ្ឋចូលរួមថែទាំ និងស្រោចទឹកដើមឈើដែលយើងបានធ្វើការដាំដុះរួចឱ្យស្រស់ល្អ ដើម្បីបង្កើនភាពបៃតងតាមដងផ្លូវក្នុងទីក្រុងរបស់យើងឪ្យមានពណ៌បៃតង។ ទន្ទឹមនឹងនេះ ឯកឧត្តមក៏បានប្រគល់លិខិតថ្លែងអំណគុណយ៉ាងជ្រាលជ្រៅចំពោះលោក លោកស្រី ដែលបានឧបត្ថម្ភដើមឈើ និងថវិកាទិញដើមឈើជូនដល់រដ្ឋបាលខេត្តសម្រាប់ដាំលម្អបង្កើនសោភ័ណភាពបៃតងតាមបណ្តោយផ្លូវក្នុងក្រុងព្រះសីហនុ៕

ដោយ ងូ សុមុនី