AKP ភ្នំពេញ ថ្ងៃទី១២ ខែកុម្ភៈ ឆ្នាំ២០២៦-- លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា និងជាអនុប្រធានក្រុមការងារឥស្សរជនឆ្នើមថ្នាក់ជាតិ បានអញ្ជើញដឹកនាំកិច្ចប្រជុំក្រុមការងារឥស្សរជនឆ្នើមថ្នាក់ជាតិ ដើម្បីពិនិត្យឡើងវិញនូវសេចក្តីព្រាងផែនការការងារឥស្សរជនឆ្នើមថ្នាក់ជាតិ ឆ្នាំ២០២៦ និងត្រៀមរៀបចំទិវាជាតិសុខភាពមាតា ទារកនិងកុមារ ២១កុម្ភៈ ឆ្នាំ២០២៦ នារសៀលថ្ងៃទី១២ ខែកុម្ភៈ ឆ្នាំ២០២៦ ដោយមានការអញ្ជើញចូលរួមពីថ្នាក់ដឹកនាំ សមាជិក សមាជិកា ក្រុមការងារឥស្សរជនឆ្នើមថ្នាក់ជាតិ និងក្រុមការងារឥស្សរជនឆ្នើមនៅថ្នាក់សាខាទាំង២៥រាជធានីខេត្ត ដោយកិច្ចប្រជុំធ្វើឡើងក្នុងទម្រង់ Hybrid។

កិច្ចប្រជុំនេះធ្វើឡើងតាមរបៀបវារៈដូចជា៖ មតិស្វាគមន៍កិច្ចប្រជុំ ដោយ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា និងជាអនុប្រធានក្រុមការងារឥស្សរជនឆ្នើមថ្នាក់ជាតិ។ បង្ហាញសេចក្ដីព្រាងផែនការសកម្មភាព ឥស្សរជនឆ្នើមថ្នាក់ជាតិ ឆ្នាំ២០២៦ ដោយ ក្រុមការងារឥស្សរជនឆ្នើមថ្នាក់ជាតិទីស្នាក់ការកណ្តាលកាកបាទក្រហមកម្ពុជា។ បច្ចុប្បន្នភាពស្ថានភាពសុខភាពមាតា ទារក និងកុមារ ដោយ លោកស្រីសាស្ត្រាចារ្យជំនួយ គឹម រ័ត្ននា ប្រធានមជ្ឈមណ្ឌលជាតិគាំពារមាតា និងទារក។ បទបង្ហាញបច្ចុប្បន្នភាពអំពីស្ថានភាពមេរោគអេដស៍/ជំងឺអេដស៍ដោយលោកសាស្ត្រាចារ្យជំនួយ អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ។ បច្ចុប្បន្នភាពនៃសៀវភៅ “ស្នាដៃឥស្សរជនឆ្នើមថ្នាក់ជាតិ” និងបទបង្ហាញស្តីពី “ហានិភ័យនៃជំងឺមិនឆ្លង” ដោយ ឯកឧត្តមសាស្រ្តាចារ្យមហាបរិញ្ញា ហោ ប៊ុន ឡេង អនុប្រធានអាជ្ញាធរជាតិប្រយុទ្ធនឹងជំងឺអេដស៍។ កិច្ចពិភាក្សាពេញអង្គ ដោយផ្តោតលើ “ទិសដៅការងារបន្តឆ្នាំ២០២៦”។ មតិបូកសរុបនិងបិទកិច្ចប្រជុំដោយ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា និងជាអនុប្រធានក្រុមការងារឥស្សរជនឆ្នើមថ្នាក់ជាតិ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)