AKP ភ្នំពេញ ថ្ងៃទី១២ ខែកុម្ភៈ ឆ្នាំ២០២៦-- ឯកឧត្តមសាស្រ្តចារ្យបណ្ឌិត អឿង ចន្ថា អនុរដ្ឋលេខាធិការក្រសួងធនធានទឹក និងឧតុនិយម និងជានាយកគម្រោងកែលម្អសន្តិសុខទឹកកម្ពុជា(CaWSIP) កាលពីថ្ងៃទី១១ ខែកុម្ភៈ ឆ្នាំ២០២៦ បានអញ្ជើញដឹកនាំក្រុមការងារបច្ចេកទេសគម្រោង និងតំណាងក្រុមការងារបេសកកម្មធនាគារពិភពលោក(WB) ចុះត្រួតពិនិត្យជាក់ស្តែង និងសិក្សាស្វែងយល់ពីសុវត្ថិភាពទំនប់ទឹក នៅទីតាំងអនុវត្តគម្រោងស្រែហ៊ុយ ស្ថិតក្នុងភូមិសាស្ត្រខេត្តមណ្ឌលគិរី និងអនុគម្រោងទំនប់ស្វាយជ្រំ-កន្ទួត ស្ថិតក្នុងភូមិសាស្ត្រខេត្តក្រចេះ ដែលជាខេត្តគោលដៅរបស់គម្រោងកែលម្អសន្តិសុខទឹកកម្ពុជា។

វត្តមានចូលរួមក្នុងដំណើរបេសកកម្មមានក្រុមការងារបេសកកម្មធនាគារពិភពលោក (WB) ដឹកនាំដោយលោក ចាន់ វីរៈ អ្នកឯកទេសជាន់ខ្ពស់ផ្នែកគ្រប់គ្រងធនធានទឹក និងជាប្រធានក្រុមការងារធនាគារពិភពលោក លោក Aissa Mellal អ្នកជំនាញផ្នែកសុវត្ថិភាពទំនប់ធនាគារពិភពលោក ដោយមានកិច្ចសហការពីមន្ទីរទាំងពីរ។

ការចុះត្រួតពិនិត្យនេះមានគោលបំណងចុះត្រួតពិនិត្យជាក់ស្តែង និងសិក្សាស្វែងយល់កម្រិតបច្ចេទេសឱ្យកាន់តែច្បាស់លាស់បន្ថែមទៀតអំពីសុវត្ថិភាពទំនប់ ដល់ទីតាំងអនុវត្តគម្រោង ក្នុងខេត្តគោលដៅរបស់គម្រោងកែលម្អសន្តិសុខទឹកកម្ពុជា ដើម្បីផ្តល់ការណែនាំបច្ចេកទេសលើទិដ្ឋភាពទូទៅនៃសុវត្ថិភាពទំនប់ រួមទាំងក្របខ័ណ្ឌបរិស្ថាន និងសង្គម សម្រាប់ការកំណត់អត្តសញ្ញាណក្រុមអ្នកជំនាញការ និងការបង្កើតក្រុមការងារសុវត្ថិភាពទំនប់ក្នុងគម្រោងផងដែរ៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)