AKP ភ្នំពេញ ថ្ងៃទី១២ ខែកុម្ភៈ ឆ្នាំ២០២៦-- ឯកឧត្ដម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ និងជាអនុប្រធានអចិន្ត្រៃយ៍គណៈកម្មាធិការសម្បទានដីសង្គមកិច្ចថ្នាក់ជាតិ បានអញ្ជើញចូលរួមក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជំហាន២ ចំនួន១៨៤បណ្ណ និងប្រគល់ផ្ទះដីឡូតិ៍លំនៅឋានសម្បទានសង្គមកិច្ចជំហាន៣ ចំនួន៩១ខ្នងផ្ទះ ជូនសម្បទានិក ស្ថិតនៅក្នុងភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង ក្រោមអធិបតីភាពដ៏ខ្ពង់ខ្ពស់ឯកឧត្តម សាយ សំអាល់ ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការសម្បទានដីសង្គមកិច្ចថ្នាក់ជាតិ នាព្រឹកថ្ងៃព្រហស្បតិ៍ ទី១២ ខែកុម្ភៈ ឆ្នាំ២០២៦ ដោយមានការអញ្ជើញចូលរួមពីសំណាក់ឯកឧត្តមរដ្ឋមន្ត្រី រួមជាមួយ ឯកឧត្តម លោកជំទាវ ជាថ្នាក់ដឹកនាំនៃក្រសួង ស្ថាប័ន ពាក់ព័ន្ធ អាជ្ញាធរមូលដ្ឋាន ព្រមទាំងសម្បទានិក សរុបប្រមាណ ៥០០នាក់។

ពិធីចែកវិញ្ញាបនបត្រសម្គាល់ម្ចាស់អចលនវត្ថុជំហាន២ និងប្រគល់ផ្ទះដីឡូតិ៍លំនៅឋានសម្បទានសង្គមកិច្ចជំហាន៣ នាពេលនេះ គឺជាការបង្ហាញឱ្យឃើញអំពីការគិតគូរ យកចិត្តទុកដាក់ខ្ពស់លើសុខទុក្ខ និងការលើកកម្ពស់ជីវភាពរស់នៅរបស់បងប្អូនអតីតយុទ្ធជន និងគ្រួសារអតីតយុទ្ធជន ពីសំណាក់រាជរដ្ឋាភិបាលកម្ពុជា និងសមាគមអតីតយុទ្ធជនកម្ពុជា ក្រោមការដឹកនាំប្រកបដោយភាពប៉ិនប្រសប់របស់ សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ដ្រី និងជាប្រធានសមាគមអតីតយុទ្ធជនកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា និងជាអនុប្រធានសមាគមអតីតយុទ្ធជនកម្ពុជា។

គួរជម្រាបជូនដែរថា ក្នុងតំបន់ដីសម្បទានសង្គមកិច្ចភូមិជីកដីនេះ រាជរដ្ឋាភិបាលបាន និងកំពុងអភិវឌ្ឍដីសម្បទានលើផ្ទៃដីសរុប ១៥៣,៦៦ហិកតា និងបានសាងសង់ផ្ទះជូនបងប្អូនអតីតយុទ្ធជនសរុបចំនួន ៤៩១ខ្នងផ្ទះ ក្នុងនោះក្រសួងអភិវឌ្ឍន៍ជនបទ បាននិងកំពុងចូលរួមអភិវឌ្ឍហេដ្ឋារចនាសម្ព័ន្ធសំខាន់ៗរួមមាន៖ ស្ថាបនានិងថែទាំខួបផ្លូវក្រាលល្បាយក្រួសក្រហម សរុបប្រវែង ១៦គីឡូម៉ែត្រ បានសាងសង់លូកាត់ផ្លូវរំដោះទឹក សរុបចំនួន ២០កន្លែង បានខួងអណ្ដួងស្នប់សរុបចំនួន ៣៤អណ្ដូង និងបានសាងសង់បង្គន់អនាម័យសរុបចំនួន ១៨០បង្គន់ផងដែរ៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)