AKP កំពង់ឆ្នាំង ថ្ងៃទី១១ ខែកុម្ភៈ ឆ្នាំ២០២៦-- ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ធមន្រ្តីទទូលបន្ទុកបេសកកម្មពិសេស និងជាប្រធានក្រុមការងាររាជរដ្ធាភិបាលចុះមូលដ្ឋានខេត្តកំពង់ឆ្នាំង អញ្ជើញជាធិបតីក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់ក្រុមការងាររាជរដ្ឋាភិបាលចុះមូលដ្ធានខេត្តកំពង់ឆ្នាំង កាលពីថ្ងៃទី១០ ខែកុម្ភ: ឆ្នាំ២០២៦ នៅសាល់ប្រជុំសាលាខេត្តកំពង់ឆ្នាំង ដោយមានការអញ្ជើញចូលរួមពីឯកឧត្តម ស៊ីវ រុន ប្រធានក្រុមប្រឹក្សាខេត្ត ឯកឧត្តម ស៊ុន សុវណ្ណារិទ្ធិ អភិបាលខេត្ត លោក លោកស្រីអភិបាលរងខេត្ត ថ្នាក់ដឹកនាំមន្ទីរអង្គភាពជុំវិញខេត្ត កងកម្លាំងប្រដាប់អាវុធ អាជ្ញាធរក្រុង ស្រុក មេឃុំ ចៅសង្កាត់ទូទាំងខេត្តផងដែរ។

ក្នុងឱកាសនោះ ឯកឧត្តមបណ្ឌិតសភាចារ្យ អ៊ុក រ៉ាប៊ុន បានមានប្រសាសន៍ថា អាជ្ញាធរដែនដីគ្រប់លំដាប់ថ្នាក់ត្រូវពង្រឹងនិងគ្រប់គ្រងមន្រ្តីរាជការក្រោមឱវាទរបស់ខ្លួនអោយបានល្អ។ ត្រួតពិនិត្យសកម្មភាពការងារធៀបទៅនឹងផែនការសកម្មភាព អនុវត្តអោយបានតាមគោលការណ៍របស់ថ្នាក់លើបានកំណត់ និងត្រូវមានវិធានការណ៍ចំពោះមន្រ្តីរាជការណាមិនគោរពតាមច្បាប់សហលក្ខន្តិកៈមន្រ្តីរាជការស៊ីវិលនៃព្រះរាជាណាចក្រកម្ពុជា។ 

ទន្ទឹមនឹងនេះ ឯកឧត្តមបណ្ឌិតសភាចារ្យបានដាក់ចេញនូវទិសដៅសំរាប់អនុវត្តបន្តគ្រប់អង្គភាពពាក់ព័ន្ធក្នុងខេត្តត្រូវសហការជាមួយអាជ្ញាធរដែនដី រៀបចំសោភ័ណភាពក្នុងក្រុង ស្រុក រក្សាការពារធនធានធម្មជាតិ ទប់ស្កាត់បទល្មើសនេសាទខុសច្បាប់  រក្សាសុខសុវត្ថិភាព សណ្តាប់ធ្នាប់ជូនប្រជាពលរដ្ឋក្នុងមូលដ្ឋាន ទទួលខុសត្រូវរបស់ខ្លួនឱ្យបានល្អ។ ជាពិសេសបន្តបម្រើសេវាសាធារណៈ ដោះស្រាយសំណូមពរចាំបាច់  សំណូមពរតម្រូវការនិងទំនាស់ដែលនៅសេសសល់ឱ្យបានទាន់ពេលវេលាជូនប្រជាពលរដ្ឋ។

ថ្លែងក្នុងបរិបទនេះលោកអភិបាលរងខេត្តក៏បានផ្តាំផ្ញើឱ្យគ្រប់អង្គភាពជុំវិញខេត្ត និងអាជ្ញាធរក្រុងស្រុកចង់សម្រេចបាននូវទិសដៅខាងលើប្រកបដោយប្រសិទ្ធភាពខ្ពស់ ត្រូវប្រតិបត្តិតាមតួនាទី ភារកិច្ចរបស់ខ្លួន ដោយមានផែនការសកម្មភាពការងារច្បាស់លាស់ស្របតាមគោលនយោបាយយុទ្ធសាស្រ្តបញ្ចកោណដំនាក់កាលទី១ បាវចនាជាអាទិភាពទាំង៥ រួមមាន ធនធានមនុស្ស ផ្លូវ ទឹក ភ្លើង បច្ចេកវទ្យា និង  បច្ចេកវិទ្យាឌីជីថលសេដ្ឋកិច្ចសង្គម ពង្រឹងរបៀបរបបធ្វើការ របបប្រជុំ របបរាយការណ៍ និងរបបតាមដាន ត្រួតពិនិត្យ និងវាយតម្លៃជាប្រចាំ ដើម្បីកុំឱ្យមានការថ្នាំងថ្នាក់ពីប្រជាពលរដ្ឋ ក៏ដូចជាបង្កើននូវ ជំនឿទុកចិត្ត និងការស្រលាញ់ចេញពីបេះដូងរបស់ប្រជាពលរដ្ឋ៕

ដោយ បៃ ស៊ីថុន