AKP បន្ទាយមានជ័យ ថ្ងៃទី០៥ ខែកុម្ភៈ ឆ្នាំ២០២៦-- មជ្ឈមណ្ឌលសកម្មភាពកំចាត់មីនកម្ពុជា (CMAC) បានប្រកាសអាសន្ន និងបង្ហាញលទ្ធផលនៃការរុករកយុទ្ធភណ្ឌមិនទាន់ផ្ទុះ ដោយបានរកឃើញគ្រាប់បែកចង្កោមចំនួន១២០គ្រាប់ ដែលជាសំណល់ពីការបាញ់ផ្លោងរបស់យោធាថៃ មកលើទឹកដីកម្ពុជាក្នុងស្រុកអូរជ្រៅ និងស្រុកថ្មពួក ខេត្តបន្ទាយមានជ័យ។

យោងតាមការបញ្ជាក់របស់លោកឧត្តមសេនីយ៍ត្រី នេត រដ្ឋា ប្រធានកងឯកភាពកំចាត់មីនទី១ (CMAC) ក្នុងបទបង្ហាញនាថ្ងៃទី០៤ ខែកុម្ភៈ ឆ្នាំ២០២៦នេះ បានឱ្យដឹងថា រយៈពេលប្រតិបត្តិការចាប់ពីថ្ងៃទី២៨ ខែធ្នូ ឆ្នាំ២០២៥ ដល់ថ្ងៃទី០៤ ខែកុម្ភៈ ឆ្នាំ២០២៦ ចំនួនគ្រាប់ដែលរកឃើញ ១២០គ្រាប់ (ជាប្រភេទកូនគ្រាប់បែកចង្កោម)។ ទីតាំងរងផលប៉ះពាល់ លំនៅឋាន ទីសាធារណៈ និងស្រែចម្ការរបស់ប្រជាពលរដ្ឋ ក្នុងស្រុកអូរជ្រៅ និងតាមបណ្តោយផ្លូវជាតិលេខ៥៨ ក្នុងស្រុកថ្មពួក។

មន្ត្រីជំនាញបានបញ្ជាក់ថា គ្រាប់បែកចង្កោមទាំងនេះមានប្រភពចេញពីគ្រាប់បាញ់ប្រភេទ M46 និង M85 ដែលមានឥទ្ធិពលបំផ្លិចបំផ្លាញខ្លាំងជាងគ្រាប់មីនទូទៅដល់ទៅ២ដង។ ការរកឃើញពិសេស នៅចំណុចភូមិអូរកំបុត្រ ឃុំគោករមៀត ស្រុកថ្មពួក កម្លាំងជំនាញបានរកឃើញ "មេគ្រាប់" (Mother Bomb) ប្រភេទ NR 269 (M46) ផលិតនៅប្រទេសអ៊ីស្រាអែល ក្នុងជម្រៅដីជិត ២ម៉ែត្រ។ មេគ្រាប់នេះមានសមត្ថភាពផ្ទុកកូនគ្រាប់រហូតដល់ ៤៩គ្រាប់ ដែលនឹងរាយប៉ាយពេញផ្ទៃដីនៅពេលផ្ទុះបំបែក។

បច្ចុប្បន្ន គ្រាប់ដែលប្រមូលបានត្រូវបានហ៊ុំព័ទ្ធខ្សែ និងដាក់សញ្ញាសម្គាល់គ្រោះថ្នាក់ ដើម្បីរង់ចាំគោលការណ៍កម្ទេចចោលពីរាជរដ្ឋាភិបាល។ ក្រុមបច្ចេកទេសស៊ីម៉ាក់ កំពុងប្រើប្រាស់គ្រឿងចក្រស្រូបឆក់គ្រាប់ ដើម្បីបន្តរុករកយុទ្ធភណ្ឌដែលនៅសេសសល់។

ទន្ទឹមនោះអាជ្ញាធរ និងមន្ត្រីស៊ីម៉ាក់ បានដាក់ចេញនូវការណែនាំយ៉ាងម៉ឺងម៉ាត់ដល់ប្រជាពលរដ្ឋ ពិសេសអ្នកភៀសសឹកដែលទើបវិលត្រឡប់មកវិញហាមប៉ះពាល់ ដាច់ខាតកុំប៉ះពាល់ ឬដកហូតវត្ថុសង្ស័យដែលជាយុទ្ធភណ្ឌមិនទាន់ផ្ទុះ។ រាយការណ៍បន្ទាន់ ប្រសិនបើឃើញគ្រាប់យុទ្ធភណ្ឌ ត្រូវរាយការណ៍ទៅអាជ្ញាធរមូលដ្ឋាន ឬមន្ត្រីជំនាញដែលនៅជិតបំផុត។ បង្កើនការប្រុងប្រយ័ត្ន ត្រូវមានការត្រួតពិនិត្យដីស្រែចម្ការឱ្យបានច្បាស់លាស់ មុននឹងចុះបង្កបង្កើនផល ដើម្បីបញ្ចៀសគ្រោះថ្នាក់ដល់ជីវិត៕

ដោយ ឈុន សារ៉ាត