AKP ភ្នំពេញ ថ្ងៃទី០៤ ខែកុម្ភៈ ឆ្នាំ២០២៦ -- ក្រសួងព័ត៌មាន និងវិទ្យុសំឡេងវៀតណាម VOV ពង្រឹងកិច្ចសហប្រតិបត្តិការលើការរៀបចំគម្រោងអភិវឌ្ឍន៍ប្រព័ន្ធផ្សព្វផ្សាយ ដើម្បីធ្វើទំនើបកម្មក្នុងការផ្សព្វផ្សាយរបស់ទូរទស្សន៍ជាតិកម្ពុជា និងវិទ្យុជាតិកម្ពុជា ដែលគម្រោងនៃកិច្ចសហប្រតិបត្តិការនេះធ្វើឡើងស្របពេលដែលក្រសួងព័ត៌មាន បានធ្វើទំនើបកម្មប្រព័ន្ធផ្សព្វផ្សាយ ព្រោះត្រូវធ្វើការផ្លាស់ប្តូរប្រព័ន្ធផ្សាយទូរទស្សន៍ ពី អាណាឡូក ទៅប្រព័ន្ធឌីជីថល ព្រមជាមួយការពង្រឹងប្រព័ន្ធផ្សព្វផ្សាយទាំងវិទ្យុ ទូរទស្សន៍ និងអនឡាញ។ ការលើកឡើងរបស់ភាគីទាំងពីរនេះ ក្នុងឱកាសដែលឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានទទួលជួបពិភាក្សាការងារជាមួយគណៈប្រតិភូវិទ្យុសំឡេងវៀតណាម (VOV) ដឹកនាំដោយ ឯកឧត្តម Vu Hai Quang អនុប្រធាន VOV នារសៀលថ្ងៃទី៤ ខែកុម្ភៈ ឆ្នាំ២០២៦ នៅទីស្ដីការក្រសួងព័ត៌មាន ដោយផ្តោតជាសំខាន់ក្នុងការរៀបចំគម្រោងអភិវឌ្ឍន៍ប្រព័ន្ធផ្សព្វផ្សាយនៅកម្ពុជា តាមរយៈការធ្វើទំនើបកម្មនៃការផ្សាយរបស់ទូរទស្សន៍ជាតិកម្ពុជា និងវិទ្យុជាតិកម្ពុជា ឱ្យស្របតាមយុគសម័យឌីជីថល នាពេលបច្ចុប្បន្ននេះ។

ឯកឧត្តម នេត្រ ភក្ត្រា បានវាយតម្លៃខ្ពស់ចំពោះកិច្ចសហប្រតិបត្តិការល្អរវាងក្រសួងព័ត៌មាន និង វិទ្យុ VOV នាពេលកន្លងមក ហើយសង្ឃឹមថា ទៅឆ្នាំបន្តបន្ទាប់ទៀត ភាគីទាំងពីររួមគ្នាអនុវត្តន៍កិច្ចការងារស្របតាមគម្រោងផែនការច្បាស់លាស់ប្រកបដោយផ្លែផ្កា និងទទួលបានលទ្ធផលថ្មីៗបន្ថែមទៀត។ ឯកឧត្តមរដ្ឋមន្ត្រីបានថ្លែងអំណរគុណដល់រដ្ឋាភិបាលវៀតណាម តាមរយៈវិទ្យុសំឡេងវៀតណាម (VOV) ដែលបានផ្តល់នូវម៉ាស៊ីនផ្សាយវិទ្យុ FM ជាច្រើនគ្រឿង ហើយបាននាំមន្ត្រីបច្ចេកទេសមកជួយរៀបចំ ដំឡើងនៅរាជធានីភ្នំពេញ ខេត្តសៀមរាប និងបណ្តាខេត្តមួយចំនួននៅក្នុងប្រទេសកម្ពុជា បានរួចរាល់សម្រាប់ធ្វើការផ្សាយបានដោយរលូន។ ទន្ទឹមនេះ VOV ក៏បានផ្តល់ជូននូវរថយន្តផ្សាយចល័តសម្រាប់វិទ្យុ និងទូរទស្សន៍ជាតិកម្ពុជា ដែលជាជំនួយរបស់រដ្ឋាភិបាលវៀតណាម តាមរយៈវិទ្យុសំឡេងវៀតណាម VOV ដល់ក្រសួងព័ត៌មាន ហើយរថយន្តផ្សាយចល័តនេះ នឹងត្រូវយកទៅថតផ្សាយផ្ទាល់ ពីដំណើរបំពេញទស្សនកិច្ចផ្លូវរដ្ឋ របស់ ឯកឧត្ដម តូ ឡឹម អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តវៀតណាម នឹងដឹកនាំគណៈប្រតិភូជាន់ខ្ពស់ មកកាន់ព្រះរាជាណាចក្រកម្ពុជា នាពេលខាងមុខនេះ។

ជាមួយគ្នានេះ ឯកឧត្តមរដ្ឋមន្រ្ដីក្រសួងព័ត៌មានក៏បានស្នើដល់ភាគីវៀតណាម បន្តជួយបណ្តុះបណ្តាល ដើម្បីពង្រឹងសមត្ថភាពមន្ត្រីជំនាញ និងអភិវឌ្ឍន៍ធនធានមនុស្សផ្នែកសារព័ត៌មាន និងការផ្លាស់ប្តូរបទពិសោធន៍ការងារមួយចំនួន ពិសេសជួយបណ្តុះបណ្តាលមន្ត្រីផ្នែកបច្ចេកទេស សម្រាប់ធ្វើការទ្រទ្រង់ដល់ក្រសួងព័ត៌មាន លើផ្នែកបច្ចេកទេស វិទ្យុ ទូរទស្សន៍ និងផ្នែកផ្សេងៗទៀត ។ ឯកឧត្តមរដ្ឋមន្ត្រី បានជម្រាបជូនពីការជំរុញដល់មន្ទីរព័ត៌មានរាជធានី ខេត្ត ក្នុងការរៀបចំវិទ្យុបណ្តាញ ដើម្បីផ្សព្វផ្សាយផ្តល់ព័ត៌មានជូនដល់ប្រជាពលរដ្ឋឱ្យទទួលបានព័ត៌មានពិត ច្បាស់លាស់ ត្រឹមត្រូវរបស់រាជរដ្ឋាភិបាល មន្ត្រីជំនាញ អ្នកជំនាញមកពីវិស័យនានា ជុំវិញដំណើរការកអភិវឌ្ឍន៍របស់កម្ពុជា ។ 

ឯកឧត្ដមរដ្ឋមន្រ្ដីបានបញ្ជាក់បន្ថែមថា បច្ចុប្បន្ននេះ វិទ្យុបណ្តាញ បានរៀបចំ និងធ្វើការផ្សាយបានចំនួន ៥ខេត្ត រួចមកហើយ។ សម្រាប់ម៉ោងនៃការផ្សាយកម្មវិធីព័ត៌មានរបស់វិទ្យុ និងទូរទស្សន៍ជាតិកម្ពុជា គឺបណ្តាស្ថានីយវិទ្យុ និងទូរទស្សន៍នៅមន្ទីរព័ត៌មាន តាមបណ្តាខេត្ត រាជធានី ក៏ត្រូវកាច់ផ្សាយបន្តឱ្យដូចគ្នាទាំងអស់ផងដែរ ដើម្បីឱ្យប្រជាពលរដ្ឋទទួលបានព័ត៌មាន ពិត ត្រឹមត្រូវ មានប្រភពច្បាស់លាស់ តាមរយៈការផ្សាយរបស់ប្រព័ន្ធផ្សព្វផ្សាយរបស់ជាតិ ។

ឯកឧត្តម Vu Hai Quang អនុប្រធានវិទ្យុសំឡេងវៀតណាម បានវាយតម្លៃខ្ពស់ចំពោះភាពរីកចម្រើន និងងកិច្ចសហការល្អរវាង វិទ្យុ VOV និងក្រសួងព័ត៌មាន ហើយកិច្ចសហប្រតិបត្តិការនេះគឺជាទំនាក់ទំនងយ៉ាងជិតស្និទ្ធ និងមានប្រសិទ្ធភាព។ ឯកឧត្ដមបានបញ្ជាក់ថា VOV ត្រៀមខ្លួនជាស្រេចក្នុងការផ្លាស់ប្តូរ អ្នកជំនាញបច្ចេកទេសជាមួយកម្ពុជា ដើម្បីពង្រឹងសមត្ថភាពឆ្លើយតបនឹងការផ្លាស់ប្តូរយ៉ាងឆាប់រហ័សនៃវិស័យសារព័ត៌មាន និងប្រព័ន្ធផ្សព្វផ្សាយទំនើប ។

ឯកឧត្តម អនុប្រធានវិទ្យុ VOV ក៏បង្ហាញនូវជំនឿជឿជាក់ថា ទំនាក់ទំនងជិតស្និតរវាងវិទ្យុ VOV និងក្រសួងព័ត៌មាន នឹងបន្តអភិវឌ្ឍន៍ និងបន្តរួមចំណែកក្នុងការពង្រឹងទំនាក់ទំនងយ៉ាងជិតស្និទ្ធ ដ៏ល្អប្រសើររវាងវៀតណាម និងកម្ពុជា ៕

ដោយ៖ រិទ្ធី រូបថត៖ ទទក