‎AKP សៀមរាប ថ្ងៃទី០៤ ខែកុម្ភៈ ឆ្នាំ២០២៦-- ក្រុមប្រឹក្សាខេត្តសៀមរាបអាណត្តិទី៤ បានបើកកិច្ចប្រជុំសាមញ្ញលើកទី២១របស់ខ្លួន ក្រោមកិច្ចដឹកនាំប្រជុំដោយឯកឧត្តម តោ គឹមស៊ាន សមាជិកក្រុមប្រឹក្សាខេត្ត និងលោក ឌី រ៉ាដូ អភិបាលរងខេត្ត នាថ្ងៃទី០៤ ខែកុម្ភៈ ឆ្នាំ២០២៦ នៅសាលប្រជុំសាលាខេត្តសៀមរាប ដោយមានការចូលរួមពីសមាជិកសមាជិកាក្រុមប្រឹក្សាខេត្តនាយករងរដ្ឋបាលខេត្ត នាយកនាយករងទីចាត់ការ អង្គភាពចំណុះសាលាខេត្ត កងកម្លាំងទាំងបី និងរដ្ឋបាលក្រុង ស្រុក ផងដែរ។

កិច្ចប្រជុំបានដំណើរការទៅតាមរបៀបវារៈដែលបានគ្រោងទុក សមាជិកសមាជិកាក្រុមប្រឹក្សាខេត្ត បានលើកឡើងនូវបញ្ហាមួយចំនួនដែលត្រូវរួមគ្នាដោះស្រាយ រួមមានបញ្ហាការងារអត្រានុកូលដ្ឋាន បញ្ហាជីកយករ៉ែដែលធ្វើឱ្យប៉ះពាល់ផលប្រយោជន៍ប្រជាពលរដ្ឋ ករណីការប្រើប្រាស់បារីអេឡិចត្រូនិក បញ្ហាបទល្មើសនេសាទ បញ្ហាអគ្គិសនី និងសុំឱ្យមានការថែទាំដើមឈើទើបនឹងដាំនៅអមដងផ្លូវក្នុងក្រុងសៀមរាប។ ហើយរាល់បញ្ហាខាងលើទាំងអស់នោះ ក៏ត្រូវបានកិច្ចប្រជុំរួមគ្នាពិភាក្សា ចោទសួដេញដោលគ្នា និងក៏ត្រូវបានបកស្រាយបំភ្លឺដោយ ក្រុមសាមីអង្គភាពពាក់ព័ន្ធរួចរាល់ហើយដែរ។

មានប្រសាសន៍នៅក្នុងកិច្ចប្រជុំនោះ លោក ឌី រ៉ាដូ ក៏បានជំរុញដល់អាជ្ញាធរសមត្ថកិច្ច រួមសហការគ្នាក្នុងបង្រ្កាបឱ្យខាងតែបានពីករណីគ្រឿងញៀន បារីអេឡិចត្រូនិក និងបទល្មើសនេសាទ ព្រមទាំងការថែទាំដើមឈើដែលដាំរួចអោយបានល្អ ដើម្បីបរិស្ថានតាមដងផ្លូវ។

មានមតិបូកសរុបកិច្ចប្រជុំ ឯកឧត្តម តោ គឹមស៊ាន បានឯកភាពរាល់លទ្ធផលដែលរដ្ឋបាលខេត្តអនុវត្តបានប្រចាំខែមករាឆ្នាំ២០២៦។ ហើយឯកឧត្តមបានសំណូមពរដល់ក្រុមនីមួយៗរបស់ក្រុមប្រឹក្សាខេត្ត រាល់សកម្មភាពរបស់ខ្លួន ត្រូវធ្វើការពិនិត្យពិភាក្សាគ្នាឱ្យបានស៊ីជម្រៅ ដើមី្បជាគោលដៅសម្រាប់ក្នុងការអនុវត្តឆ្នាំបន្ត។ ហើយគ្រប់មន្ទីរ អង្គភាព ក្រុង ស្រុក ត្រូវពន្លឿនការផ្តល់របាយការណ៍ប្រចាំខែ ត្រីមាស ឆមាស ឱ្យបានទៀងទាត់មកការិយាល័យជំនាញ តាមការកំណត់ ដើមី្បធ្វើការបូកសរុបជូនគណៈអភិបាលខេត្ត។

គួរបញ្ជាក់ផងដែរថា ក្នុងឱកាសនោះដែរក៏មានរបៀបវារៈកិច្ចប្រជុំសម្ងាត់ ពិនិត្យ និងពិភាក្សា អនុម័តលើការវាយតម្លៃលក្ខណៈសម្បត្តិ គណៈអភិបាលស្រុក ដែលចប់អាណត្តិទី២របស់ខ្លួនផងដែរ៕

ដោយ ហង្ស សៀក