‎AKP ភ្នំពេញ ថ្ងៃទី០៤ ខែកុម្ភៈ ឆ្នាំ២០២៦-- ឯកឧត្តម យៀប ម៉ាលីណូ អគ្គនាយកនៃអគ្គនាយកដ្ឋានគោលនយោបាយសង្គមកិច្ច ក្រសួងសង្គមកិច្ច អតីតយុទ្ធជន និងយុវនីតិសម្បទា និងលោក ថន តារាសីហា ប្រធាននាយកដ្ឋានអភិវឌ្ឍន៍គោលនយោបាយ ជាប្រតិភូតំណាងក្រសួង ស.អ.យ. បានចូលរួមកិច្ចប្រជុំលើកទី៦៤ នៃគណៈកម្មការសម្រាប់ការអភិវឌ្ឍសង្គម ក្រោមអធិបតីភាពលោកជំទាវ Khrystyna Hayovyshyn ប្រធានគណៈកម្មការសម្រាប់ការអភិវឌ្ឍសង្គម ដែលប្រព្រឹត្តទៅនៅថ្ងៃទី០២-១០ ខែកុម្ភៈ ឆ្នាំ២០២៦ នៅទីស្នាក់ការ អង្គការសហប្រជាជាតិ ដែលចូលរួមពីបណ្តាប្រទេសនានាច្រើនជាង ១០០ប្រទេស។

ឯកឧត្តម យៀប ម៉ាលីណូ បញ្ជាក់ថា ក្រសួង ក្រសួងសង្គមកិច្ច អតីតយុទ្ធជន និងយុវនីតិសម្បទា កំពុងអភិវឌ្ឍគោលនយោបាយជាតិស្តីពីសង្គមកិច្ច ដែលមានសារៈសំខាន់សម្រាប់បំពេញភាពខ្វះចន្លោះនៃកាផ្តល់សេវាឯកទេសសង្គមកិច្ច និងលើកកម្ពស់វិជ្ជាជីវៈសង្គមកិច្ចនៅក្នុងព្រះរាជាណាចក្រកម្ពុជា ហើយសម្រាប់ការចូលរួមកម្មវិធីនៅអង្គការសហប្រជាជាតិ នាពេលនេះ ប្រតិភូតំណាងក្រសួង ស.អ.យ. នឹងទទួលបានបទពិសោធល្អៗពីកិច្ចប្រជុំ ព្រមទាំងកសាងនូវបណ្តាញអ្នកជំនាញអភិវឌ្ឍសង្គមជុំវិញពិភពលោក។

សារៈសំខាន់នៃកិច្ចប្រជុំ គឺអ្នកចូលរួមនឹងទទួលបានទស្សនាទានសំខាន់ៗ រួមមានទាំងឧត្តមានុវត្តន៍ និងបញ្ហាប្រឈមពាក់ព័ន្ធនឹងការអភិវឌ្ឍគោលនយោបាយសង្គម  ដែលបានលើកឡើងដោយប្រតិភូមកពីបណ្តាប្រទេសលើពិភពលោកដែលជាសមាជិកនៃអង្គការសហប្រជាជាតិ៕

ដោយ ណយ នឿន (ប្រភព៖ ក្រសួងសង្គមកិច្ច)