AKP ភ្នំពេញ ថ្ងៃទី៣១ ខែមករា ឆ្នាំ២០២៦ -- ក្នុងឱកាសបំពេញការងារក្នុងខេត្តពោធិ៍សាត់ នៅរសៀលថ្ងៃទី៣០ ខែមករា ឆ្នាំ២០២៦ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញពិនិត្យការជុសជុលបូជនីយដ្ឋានប្រវត្តិសាស្ត្រ លោកឧកញ៉ា ឃ្លាំង មឿង ដើម្បីកែលម្អបន្ថែម និងរៀបចំសំណង់តាមទម្រង់សិល្បៈបែបស្ថាបត្យកម្មខ្មែរ។

សូមបញ្ជាក់ថា បូជនីយដ្ឋានប្រវត្តិសាស្ត្រលោកឧកញ៉ា ឃ្លាំង មឿង បានកត់ត្រាទុកនូវប្រវត្តិដ៏អស្ចារ្យរបស់ លោកតា ឃ្លាំង មឿង ដែលជាវីរជនក្លាហានក្នុងប្រវត្តិសាស្ត្រខ្មែរ។ បច្ចុប្បន្ន បានក្លាយជារមណីយដ្ឋានទេសចរណ៍ដ៏ទាក់ទាញរបស់ ខេត្តពោធិ៍សាត់ ក៏ដូចជា ភ្ញៀវទេសចរមកពីគ្រប់ទីទូទាំងប្រទេសផងដែរ។

បូជនីយដ្ឋានប្រវត្តិសាស្ត្រ លោកតា ឃ្លាំង មឿង មានទីតាំងស្ថិតនៅ ឃុំស្នាមព្រះ ស្រុកបាកាន ខេត្តពោធិ៍សាត់នមានចម្ងាយ ៨គីឡូម៉ែត្រ ពីក្រុងពោធិ៍សាត់។ ដើម្បីទៅដល់បូជនីយដ្ឋាននេះ គឺត្រូវធ្វើដំណើរចេញពីក្រុងពោធិ៍សាត់ តាមបណ្ដោយផ្លូវជាតិលេខ ៥ ចម្ងាយ ៧គីឡូម៉ែត្រ រួចបត់ទៅត្បូង តាមណ្ដោយ ផ្លូវជាតិលេខ ៥៥ ត្រឹម ១គីឡូម៉ែត្រ នឹងទៅដល់បូជនីយដ្ឋាន៕

ដោយ ណយ នឿន (ប្រភព៖ ក្រសួងវប្បធម៌)