AKP ភ្នំពេញ ថ្ងៃទី២៨ ខែមករា ឆ្នាំ២០២៦-- លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា និងអ្នកនាង សេឡេស្ទីន សានថាណា (Celestin Santhana) មន្រ្តីជាន់ខ្ពស់ទទួលបន្ទុកការងារ ការពារ យេនឌ័រ និងបរិយាបន្ន PGI របស់សហព័ន្ធអន្តរជាតិ ប្រចាំតំបន់អាស៊ីប៉ាស៊ីហ្វិក នាព្រឹកថ្ងៃទី២៨ ខែមករា ឆ្នាំ២០២៦ បានអញ្ជើញជាគណៈអធិបតីក្នុងពិធីបើកសិក្ខាសាលាស្តីពី «ការកសាងគោលនយោបាយការទប់ស្កាត់ការកេងប្រវ័ញ្ច និងការបំពានផ្លូវភេទ និងគោលនយោបាយគាំពារកុមារ» នៅទីស្នាក់ការកណ្តាលកាកបាទក្រហមកម្ពុជា។

សិក្ខាសាលាដែលប្រព្រឹត្តទៅរយៈពេល៣ថ្ងៃ ចាប់ពីថ្ងៃទី២៨ ដល់ទី៣០ ខែមករា ឆ្នាំ២០២៦ ដែលមានការចូលរួមពីថ្នាក់ដឹកនាំ មន្ត្រីថ្នាក់កណ្តាល និងមន្ត្រីប្រតិបត្តិមកពីសាខាកាកបាទក្រហមកម្ពុជាទាំង ២៥ រាជធានី-ខេត្ត សរុបចំនួន៥៩នាក់។ គោលបំណងសំខាន់នៃការរៀបចំកម្មវិធីនេះ គឺដើម្បីពង្រឹងយន្តការការពារសុវត្ថិភាពដល់ជនងាយរងគ្រោះ និងកុមារ តាមរយៈការកសាងគោលនយោបាយឱ្យបានច្បាស់លាស់ សំដៅធានាឱ្យបាននូវតម្លាភាព និងសីលធម៌ខ្ពស់ក្នុងប្រតិបត្តិការមនុស្សធម៌។

លោកជំទាវអគ្គលេខាធិការសង្ឃឹមយ៉ាងមុតមាំថា សិក្ខាកាមទាំងអស់នឹងទទួលបានចំណេះដឹងថ្មីៗបន្ថែមទៀត ដើម្បីយកទៅអនុវត្តក្នុងភារកិច្ចឱ្យមានភាពប្រាកដប្រជា និងប្រសិទ្ធភាព។ លោកជំទាវក៏បានស្នើសុំឱ្យមន្ត្រីទាំងអស់ចូលរួមពិភាក្សា និងផ្លាស់ប្តូរមតិយោបល់ជាមួយវាគ្មិនជំនាញឱ្យបានផុសផុល ដើម្បីដោះស្រាយរាល់ចម្ងល់ផ្សេងៗ សំដៅធានាបាននូវប្រសិទ្ធភាពពេលចុះបំពេញបេសកម្ម។

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)