AKP ភ្នំពេញ ថ្ងៃទី១៩ ខែមករា ឆ្នាំ២០២៦---

ឯកអគ្គរាជទូតកម្ពុជានិងឯកអគ្គរដ្ឋទូតសាធារណរដ្ឋទូតស៊ែប៊ីប្រចាំនៅសាធារណរដ្ឋកូរ៉េ បានជួបពិភាក្សាពីការលើកកម្ពស់ប្រសិទ្ធភាពការងារ
 និងគាំទ្រគ្នាទៅវិញទៅមកក្នុងបេសកកម្មការទូត ដើម្បីផលប្រយោជន៍របស់ប្រទេសទាំងពីរ។
យោងតាមបណ្តាញសង្គមរបស់ស្ថានឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េបានឲ្យដឹងថា នៅព្រឹកថ្ងៃទី ១៩ ខែមករា ឆ្នាំ២០២៦
ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានអញ្ជើញជួបសម្តែងការគួរសម និងពិភាក្សាការងារជាមួយ ឯកឧត្តម  Nemanja Grbic ឯកអគ្គរដ្ឋទូតសាធារណរដ្ឋស៊ែប៊ី ប្រចាំសាធារណរដ្ឋកូរ៉េ នៅស្ថានទូតស៊ែប៊ីក្នុងទីក្រុងសេអ៊ូល។ 

ឯកឧត្តម ឯកអគ្គរាជទូត បានថ្លែងអំណរគុណដល់រដ្ឋាភិបាលស៊ែប៊ី ដែលបានផ្តល់ជំនួយមនុស្សធម៌ដល់ជនភៀសសឹកកម្ពុជាជាទឹកប្រាក់ចំនួន ៥០០,០០០ ដុល្លារអាម៉េរិក តាមរយៈក្រសួងការបរទេសកម្ពុជា នាពេលថ្មីៗកន្លងមកនេះ។ 

បន្ថែមពីនេះ ឯកឧត្តម ឯកអគ្គរាជទូតក៏បាន ជម្រាបជូន ឯកឧត្តម  Nemanja Grbic អំពីបច្ចុប្បន្នភាព និងការវិវត្តនៃស្ថានការណ៍ព្រំដែនកម្ពុជា-ថៃ ព្រមទាំងការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការបង្ក្រាបឧក្រិដ្ឋកម្មអនឡាញ។  

ភាគីទាំងពីរបានធ្វើការពិភាក្សាលើការពង្រឹងទំនាក់ទំនងកិច្ចសហប្រតិបត្តិការទ្វេភាគី រវាងស្ថានតំណាងនៃប្រទេសទាំងពីរ នៅសាធារណរដ្ឋកូរ៉េ ដើម្បីលើកកម្ពស់ប្រសិទ្ធភាពការងារ និងគាំទ្រគ្នាទៅវិញទៅមកក្នុងបេសកកម្មការទូត ដើម្បីផលប្រយោជន៍របស់ប្រទេសទាំងពីរ៕

ដោយ៖ ប៊ុនរិទ្ធ