AKP ភ្នំពេញ ថ្ងៃទី១៩ ខែមករា ឆ្នាំ២០២៦-- តាមរយៈកម្មវិធីអាហារូបករណ៍យុវជនសម្រាប់សហគមន៍ក្នុងគម្រោងរេដបូកកែវសីមា (Keo Seima EmpowerED)  ក្រោមការគាំទ្រថវិកាពីគម្រោងរេដបូកកែវសីមា និស្សិត ១០នាក់ ក្មុងនោះស្ត្រី ៩នាក់ និងបុរស ១នាក់ ដែលជាជនជាតិដើមភាគតិច ពូនង មកពីសហគមន៍ក្នុងគម្រោងរេដបូកកែវសីមានៃខេត្តមណ្ឌលគិរី ទទួលបានឱកាសបន្តការសិក្សាជំនាញសំខាន់ៗក្នុងថ្នាក់បរិញ្ញាបត្ររយៈពេល៤ឆ្នាំ នៅសាកលវិទ្យាល័យភូមិន្ទកសិកម្មក្នុងរាជធានីភ្នំពេញ។

មន្រ្តីអង្គការ សមាគមអភិរក្សសត្វព្រៃ WCS បានឱ្យដឹងនៅថ្ងៃទី១៩ ខែមករា ឆ្នាំ២០២៦ថា ក្រោមកម្មវិធី Keo Seima EmpowerED អង្គការសមាគមអភិរក្សសត្វព្រៃ WCS កម្ពុជា សហការជាមួយសាកលវិទ្យាល័យភូមិន្ទកសិកម្ម (RUA) បានរៀបចំកម្មពិធីជួបសំណេះសំណាល និងប្រគល់វិញ្ញាបនបត្រផ្តល់អាហារូបករណ៍ជូនដល់និស្សិតទាំង១០រូប នៅសាកលវិទ្យាល័យភូមិន្ទកសិកម្ម ក្រោមអធិបតីភាពរបស់ ឯកឧត្តមសាស្រ្តចារ្យបណ្ឌិត ង៉ោ ប៊ុនថាន សាកលវិទ្យាធិការ នៃសាកលវិទ្យាល័យភូមិន្ទកសិកម្ម និងលោក នេត វិបុល នាយករងអង្គការសមាគមអភិរក្សសត្វព្រៃ (WCS)។

កម្មវិធី Keo Seima EmpowerED នេះផ្តល់ឱកាសឱ្យយុវជនក្នុងសហគមន៍ នៃគម្រោងរេដបូកកែវសីមាទទួលបានការអប់រំខ្ពង់ខ្ពស់ដើម្បីអាចឱ្យពួកគេចូលរួមចំណែកបានកាន់តែពេញលេញក្នុងការអភិវឌ្ឍសង្គមជាតិ ជាពិសេសការលើកកម្ពស់ជីវភាពនិងការអភិរក្សធនធានធម្មជាតិនៅសហគមន៍របស់ពួកគេ៕

ដោយ ណយ នឿន (ប្រភព៖ WCS)