AKP ភ្នំពេញ ថ្ងៃទី១៩ ខែមករា ឆ្នាំ២០២៦-- កម្ពុជាបានទទួលហិរញ្ញប្បទានឥតសំណងពីប្រទេសកាណាដាប្រមាណជា ២០៧លានដុល្លារអាមេរិក នៅក្នុងរយៈពេល៣២ឆ្នាំកន្លងមកនេះ ដែលហិរញ្ញប្បទានទាំងនេះបានចូលរួមចំណែកអភិវឌ្ឍទៅលើវិស័យជាច្រើននៅកម្ពុជា។ 

យោងតាមសេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ កាលពីសប្ដាហ៍មុនបានឱ្យដឹងថា គិតចាប់ពីឆ្នាំ១៩៩២ រហូតដល់ឆ្នាំ២០២៤ កាណាដាបានផ្តល់ហិរញ្ញប្បទានឥតសំណងមកកម្ពុជាប្រមាណ២០៧ លានដុល្លារអាមេរិក ដោយផ្តោតលើវិស័យអប់រំ សុខាភិបាល កសិកម្ម ថាមពល សន្តិសុខស្បៀង ការប្រយុទ្ធប្រឆាំងគ្រាប់មីន និងយុទ្ធភ័ណ្ឌមិនទាន់ផ្ទុះ, អភិបាលកិច្ច និងសមភាពយេនឌ័រ។ 

ប្រភពដដែលបានបន្តថា កិច្ចសហប្រតិបត្តិការទ្វេភាគីទាំងនេះ បានបង្ហាញយ៉ាង ច្បាស់អំពីការយកចិត្តទុកដាក់របស់កាណាដាក្នុងការពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងហិរញ្ញវត្ថុរវាងកម្ពុជា-កាណាដា។

ឯកឧត្តម Christian DesRoches ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសកាណាដាប្រចាំកម្ពុជា បានគូសបញ្ជាក់ពីស្ថានភាពជាក់ស្តែង និងមានសុទិដ្ឋិនិយម ចំពោះការអភិវឌ្ឍសេដ្ឋកិច្ច និងសង្គមនៅកម្ពុជាក្នុងរយៈពេលវែង និងបានវាយតម្លៃខ្ពស់ចំពោះការរីកចម្រើននៃទំនាក់ទំនងរវាងកម្ពុជា និងកាណាដា ទាំងក្នុងក្របខណ្ឌទ្វេភាគី, អាស៊ាន, និងអន្តរជាតិ និងទំនាក់ទំនងរវាងប្រទេសទាំងពីរកម្ពុជា-កាណាដា ឱ្យកាន់តែសកម្ម ជាពិសេសក្នុងវិស័យពាណិជ្ជកម្ម និងវិនិយោគ ដែលកំពុងដើរស្របទៅមុខជាមួយនឹងទំនាក់ទំនងកាន់តែជ្រាលជ្រៅខាងនយោបាយ និងការទូត។

ជាមួយគ្នានេះ ឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏បានវាយតម្លៃខ្ពស់ចំពោះកិច្ចខិតខំប្រឹងប្រែងក្នុងការរក្សាទំនាក់ទំនងល្អ និងបង្កើនកិច្ចសហប្រប្រតិបត្តិការ ជាពិសេសក្នុងវិស័យសេដ្ឋកិច្ច និងពាណិជ្ជកម្មទ្វេភាគី ដែលបានប្រែក្លាយកាណាដាទៅជាដៃគូពាណិជ្ជកម្មដ៏សំខាន់មួយរបស់កម្ពុជា។ បន្ថែមពីនេះ រាជរដ្ឋាភិបាលកម្ពុជា ក៏កំពុងយកចិត្តទុកដាក់ និងជំរុញលើកទឹកចិត្តបន្ថែមទៀតដល់ការវិនិយោគិនកាណាដា មកដាក់ទុនវិនិយោគនៅកម្ពុជា។

ឯកឧត្តមក៏បានបញ្ជាក់អំពីការប្តេជ្ញាចិត្តក្នុងការពង្រឹងកិច្ចសហប្រតិបត្តិការសេដ្ឋកិច្ច និងហិរញ្ញវត្ថុ តាមរយៈការជំរុញនូវការវិនិយោគក្នុងវិស័យដែលមានសក្តានុពល បង្កើនទំហំពាណិជ្ជកម្មទ្វេភាគី និងពង្រីកហិរញ្ញប្បទានសហប្រតិបត្តិការក្នុងវិស័យអាទិភាព។ កម្ពុជា-កាណាដា នឹងពិនិត្យលទ្ធភាពក្នុងការកិច្ចព្រមព្រៀងស្តីពីការជំរុញ និងការការពារទៅវិញទៅមកនូវការវិនិយោគ និងកិច្ចព្រមព្រៀងស្តីពីការជៀសវាងការយកពន្ធត្រួតគ្នាជាដើម។ រដ្ឋាភិបាលកាណាដា ក៏នឹងជំរុញការចរចារលើកិច្ចព្រមព្រៀងស្តីពីពាណិជ្ជកម្មសេរីអាស៊ាន-កាណាដា ផងដែរ។

គួរបញ្ជាក់ដែរថា ក្នុងរយៈពេល ៥ឆ្នាំចុងក្រោយនេះ ទំហំពាណិជ្ជកម្មទ្វេភាគីកម្ពុជា-កាណាដា បានកើនឡើងជាលំដាប់ ដោយក្នុងឆ្នាំ២០២៥ បានកើនឡើងដល់ជាង ១ប៊ីលានដុល្លារអាមេរិក គឺកើនឡើងប្រមាណ ១៥ភាគរយ ធៀបនឹងឆ្នាំមុន។ បន្ថែមពីនេះ កាណាដា ក៏បានវិលត្រឡប់មកបើកនិវេសនដ្ឋាននៃស្ថានទូតប្រចាំនៅកម្ពុជានៅទីក្រុងភ្នំពេញវិញ៕

ដោយ៖ ស្រីពេជ្រ