AKP ភ្នំពេញ ថ្ងៃទី១៩ ខែមករា ឆ្នាំ២០២៦--
លោកជំទាវ សុខមុំ និមល អគ្គនាយិកា នៃអគ្គនាយកដ្ឋានទីភ្នាក់ងារសារព័ត៌មានកម្ពុជា( AKP)បានគូសបញ្ជាក់ថា អគ្គនាយកដ្ឋានទីភ្នាក់ងារសារព័ត៌មានកម្ពុជា គិតមកដល់ពេលនេះ បាននិងកំពុងទទួលការវិវត្តទាំងគុណភាព និងកសាងទំនុកចិត្តកាន់តែប្រសើរឡើងដល់អ្នកអាន អ្នកស្តាប់ និងអ្នកទស្សនា ជាពិសេសការផ្ដល់នូវទំនុកចិត្ដកាន់តែមានការកើនឡើង។ ការគូសបញ្ជាក់របស់លោកជំទាវអគ្គនាយិកាបែបនេះ ក្នុងបទបង្ហាញនៅសន្និបាតបូកសរុបលទ្ធផលការងារឆ្នាំ២០២៥ និង លើកទិសដៅការងារឆ្នាំ២០២៦ របស់ក្រសួងព័ត៌មាន នារសៀលថ្ងៃទី១៩ ខែមករា ឆ្នាំ២០២៦ នៅទីស្ដីការក្រសួងព័ត៌មាន។

លោកជំទាវ សុខមុំ និមល បានលើកឡើងថា ក្នុងឆ្នាំ២០២៥កន្លងមក ទីភ្នាក់ងារសារព័ត៌មានកម្ពុជា AKP បានបង្កើនការផលិតព័ត៌មានយ៉ាងច្រើនក្នុងនេះរួមមានទាំងអត្ថបទ រូបថត វីដេអូ ….ជាដើម។ លោកជំទាំវបានបន្ដថា ក្នុងរយៈពេលចុងក្រោយនេះឃើញថាមានទាំងស្ថាប័នជាតិ និងអន្តរជាតិបានដកស្រង់ព័ត៌មានច្រើនពីភ្នាក់ងារសារព័ត៌មាន AKP ទាំងរូបថត និង អត្ថបទដែលអាចទុកចិត្ត និងប្រកបដោយវិជ្ជាជីវៈ ហើយសម្រាប់វេបសាយភ្នាក់ងារសារព័ត៌មាន AKP នាពេលនេះមានអ្នកចូលមើលជាង៣លាន៧សែននាក់ ដែលជាតួលេខខ្ពស់ស្មានមិនដល់។ លោកជំទាវអគ្គនាយិកាបានបញ្ជាក់បន្ថែមថា ចំពោះការប្រឆាំងព័ត៌មានក្លែងក្លាយវិញភ្នាក់ងារសារព័ត៌មានកម្ពុជា AKP បានចូលរួមយ៉ាងសកម្មពោលគឺបានឆ្លើយតបគ្រប់ទម្រង់ ពិសេសលើបណ្តាញសង្គមតែ     ម្តង។ ក្រៅពីនេះ ក៏មានកិច្ចសហប្រតិបត្តិការជាមួយស្ថាប័នអន្តរជាតិជាច្រើនសំដៅធ្វើយ៉ាងណាឱ្យវិស័យព័ត៌មានកាន់តែទូលំទូលាយខ្លាំងក្លាឡើងថែមទៀត។ 

ជាមួយគ្នានេះ លោកជំទាវអគ្គនាយិកាបានឱ្យដឹងទៀតថា អគ្គនាយកដ្ឋាន ក៏មានការបណ្តុះបណ្តាលមន្រ្តី ដើម្បីបង្កើនជំនាញវិជ្ជាជីវៈលើវិស័យព័ត៌មានទាំងក្នុង និងក្រៅប្រទេសក្នុងគោលបំណងពង្រឹងសមត្ថភាពឱ្យកាន់តែល្អប្រសើរ និងប្រកបដោយប្រសិទ្ធភាពក្នុងការផលិតព័ត៌មាន។
លោកជំទាវ សុខមុំ និមល បានថ្លែងបញ្ជាក់បន្ថែមថា បើទោះជាការសម្រេចបានជោគជ័យយ៉ាងណាក្តីក្នុងការបំពេញការងារយ៉ាងណាក្ដី ក៏មានបញ្ហាប្រឈមមួយចំនួនផងដែរ ពិសេសទៅលើកង្វះខាតធនធានមនុស្ស ដោយក្នុងនោះមានមន្រ្តីមួយចំនួនបានចូលនិវត្តន៍ជាបន្តបន្ទាប់។ តែទោះបីយ៉ាងណាអគ្គនាយកដ្ឋាន នឹងធ្វើការពង្រឹងមន្រ្តីដោយក្នុងនេះ នឹងធ្វើការបណ្តុះបណ្តាលដល់មន្រ្តីជំនាន់ថ្មី សំដៅធ្វើយ៉ាងណាឱ្យការផលិតព័ត៌មានប្រកបដោយប្រសិទ្ធភាព និងស្របតាមបរិបទសម័យឌីជីថល សម័យថ្មី។ ទន្ទឹមនេះ នៅឆ្នាំ២០២៦នេះ អគ្គនាយកដ្ឋានទីភ្នាក់ងារសារព័ត៌មានកម្ពុជា នឹងមានការស្នើសុំឱ្យមានការបណ្តុះបណ្តាលធនធានមនុស្សពិសេសវគ្គបណ្តុះបណ្តាលទៅលើការសរសេរអត្ថបទ អត្ថបទស៊ីជម្រៅ អត្ថបទវិភាគ បទវិចារណថា ជាដើម។ ក្រៅពីនេះក៏នឹងមានការស្នើសុំឱ្យមានការបណ្តុះបណ្តាលទៅលើការប្រើប្រាស់ឧបករណ៍សម័យថ្មីៗ ផ្សេងដូចជាបច្ចេកវិទ្យា បញ្ញាសិប្បនិម្មិត (AI) ដែលជាជំនាញមួយនឹងចូលរួមជួយសម្រាលបន្ទុកការងារសម្រាប់ព័ត៌មានបានច្រើន ហើយវាក៏នឹងឆ្លើយតបទៅនឹងធនធានមនស្សក្នុងអង្គភាព ផងដែរ។
ក្នុងឱកាសនោះ លោកជំទាវអគ្គនាយិកាក៏បានអះអាងផងដែរថា សម្រាប់ទិសដៅឆ្នាំ២០២៦នេះ អគ្គនាយកដ្ឋានទីភ្នាក់ងារសារព័ត៌មានកម្ពុជា នឹងពង្រឹងលើកកម្ពស់ព័ត៌មាន សំដៅធ្វើយ៉ាងណាទាក់ទាញអ្នកអាន បន្តការផ្សព្វផ្សាយទាំងព័ត៌មានប្រពៃណី និងប្រព័ន្ធផ្សព្វផ្សាយបែបទំនើប។ ជាងនេះទៅទៀត នឹងសហការជាមួយដៃគូទាំងជាតិ និងអន្តរជាតិ ដោយបន្តធ្វើទំនើបកម្មគេហទំព័រ AKP ដើម្បីឱ្យមានភាពងាយស្រួលដល់មិត្តអ្នកអាន ហើយក៏ប្ដេជ្ញាបង្កើតផ្សព្វផ្សាយជាភាសាចិនបន្ថែមទៀតផងដែរ៕

ដោយ៖ មករា