AKP សៀមរាប ថ្ងៃទី២៨ ខែវិច្ឆិកា ឆ្នាំ២០២៥ -- ឯកឧត្តម កៅ អ៊ឹមរ៉ន រដ្ឋលេខាធិការក្រសួងព័ត៌មាន បានជំរុញដល់លោកគ្រូ អ្នកគ្រូ និងអាណាព្យាបាល ឱ្យបន្តផ្សព្វផ្សាយ អប់រំ និងណែនាំយ៉ាងទូលំទូលាយដល់សិស្សានុសិស្ស ជាពិសេសយុវជន កុំឱ្យប្រើប្រាស់បារីអេឡិចត្រូនិក (Vape) និងស៊ីហ្សា ដែលអាចប៉ះពាល់យ៉ាងធ្ងន់ធ្ងរដល់សុខភាព និងប្រព័ន្ធប្រសាទរបស់យុវវ័យ ដែលជាទំពាំងស្នងឫស្សី។ ការលើកឡើងរបស់ឯកឧត្ដមរដ្ឋលេខាធិការបែបនេះ ក្នុងពិធីបើកយុទ្ធនាការអប់រំ និងផ្សព្វផ្សាយអំពីបញ្ហាគ្រឿងញៀន នៅខេត្តសៀមរាប នាព្រឹកថ្ងៃទី២៨ ខែវិច្ឆិកានេះ ឆ្នាំ២០២៥។

ឯកឧត្តម កៅ អ៉ីមរ៉ន បានបញ្ជាក់ថា សម្រាប់យុទ្ធនាការដ៏មានសារសំខាន់នេះ រៀបចំឡើងក្នុងគោលបំណងបំផុសចលនាឱ្យសកម្មនៅក្នុងសហគមន៍យើង ដើម្បីចូលរួមជាមួយរាជរដ្ឋាភិបាល ក្នុងការអប់រំ បង្ការ ទប់ស្កាត់ និងប្រយុទ្ធប្រឆាំងគ្រឿងញៀន។ យុទ្ធនាការនេះដែរ ក៏ជាការជំរុញស្មារតី និងចលនាជាតិតែមួយ ដើម្បីចូលរួមផ្សព្វផ្សាយ អប់រំ ឱ្យបានសកម្មគ្រប់មជ្ឈដ្ឋាន អំពីផលប៉ះពាល់ នៃគ្រឿងញៀន ដោយម្នាក់ៗមិនត្រូវពាក់ព័ន្ធនឹងគ្រឿងញៀន។ ឯកឧត្តមរដ្ឋលេខាធិការ ក៏បានណែនាំដល់គ្រប់អាជ្ញាធរពាក់ព័ន្ធក្នុងមូលដ្ឋាន និងប្រជាពលរដ្ឋគ្រប់រូប ជាពិសេសយុវជន ចូលរួមទាញយក និងប្រើប្រាស់កម្មវិធីទូរស័ព្ទដៃ NoDrug សម្រាប់ជាបណ្តុំនៃមេរៀនសំខាន់ៗ និងជាមធ្យោបាយរាយការណ៍ដ៏សម្ងាត់បំផុតអំពីករណីប្រើប្រាស់ និងចែកចាយគ្រឿងញៀនដ៏មានប្រសិទ្ធភាព។ ជាពិសេសជាងនេះទៀត គឺការបន្តចូលរួមទប់ស្កាត់ខ្សែរយៈចែកចាយទៅក្នុងសហគមន៍ និងជនបទ ដោយឈរលើគោលការណ៍ ៣កុំ ១រាយការណ៍ គឺកុំពាក់ព័ន្ធ កុំអន្តរាគមន៍ កុំលើកលែង និងត្រូវរាយការណ៍។

ជាមួយគ្នានេះដែរ ឯកឧត្តមរដ្ឋលេខាធិការក៏បានលើកទឹកចិត្តឱ្យវិស័យឯកជនក្នុងមូលដ្ឋាន ចូលរួមឱ្យបានផុសផុលលើការងារលើកកម្ពស់ ការផ្សព្វផ្សាយអប់រំអំពីបញ្ហាគ្រឿងញៀន តាមគ្រប់មធ្យោបាយនិងគ្រប់រូបភាព។ ក្នុងនោះ មាតាបិតា អាណាព្យាបាល និងលោកគ្រូ អ្នកគ្រូ ចាស់ព្រឹទ្ធាចារ្យ ត្រូវបន្តពន្យល់ អប់រំ ណែនាំជារឿយៗជាប់ជាប្រចាំដល់កូនៗ សមាជិកគ្រួសារ និងសិស្សានុសិស្ស ឱ្យយល់ដឹងកាន់តែ ច្បាស់អំពីផលប៉ះពាល់ជាអវិជ្ជមានរបស់គ្រឿងញៀន ចំពោះខ្លួនឯង គ្រួសារ និងសង្គមជាតិ។

ក្នុងឱកាសនោះ ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយអប់រំនិងទំនាក់ទំនងសាធារណៈ នៃអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន បានអំពាវនាវដល់អ្នកចូលរួមទាំងអស់ បន្តធ្វើការផ្សព្វផ្សាយបន្តដល់ក្រុមគ្រួសារ មិត្តភក្តិ និងមនុស្សជាទីស្រឡាញ់ទាំងអស់ ដើម្បីជៀសឆ្ងាយពីគ្រឿងញៀន រាយការណ៍យកគ្រឿងញៀនចេញពីសហគមន៍។ ឯកឧត្ដម ឧត្ដមសេនីយ៍ឯកក៏បានណែនាំសូមឱ្យសាធារណជនទូទៅ ប្រើប្រាស់កម្មវិធីទូរស័ព្ទដៃ ឬហៅថា APP ដែលមានឈ្មោះថា NO DRUGS ដើម្បីរួមគ្នាពង្រឹង និងពង្រីកវិសាលភាពនៃការផ្សព្វផ្សាយអប់រំ ឱ្យបានទៅដល់ប្រជាពលរដ្ឋស្ទើរគ្រប់អ្នកដែលមានទូរស័ព្ទដៃប្រើ មិនថា ចាស់ឬក្មេង នៅទីប្រជុំជន នៅជនបទ ឬនៅក្រៅប្រទេសឡើយ។

បើតាម លោក ឌី រ៉ាដូ អភិបាលរងខេត្តសៀមរាបបានឱ្យដឹងថា រយៈពេល ៩ខែ ឆ្នាំ២០២៥ ក្រោមកិច្ចសហប្រតិបត្តិការរបស់ស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្ត មន្ទីរ-អង្គភាពពាក់ព័ន្ធ អាជ្ញាធរមូលដ្ឋាន និងអង្គការមិនមែនរដ្ឋាភិបាល បានផ្សព្វផ្សាយ និងអប់រំអំពី ខ្លឹមសារប្រយុទ្ធប្រឆាំងនឹងគ្រឿងញៀនចំនួន ៦ ០៤៤ លើក អ្នកចូលរួមសរុប ៣៩៨ ៦៩៧ នាក់។ លោកអភិបាលរងខេត្ដក៏សូមសំណូមពរដល់កងកម្លាំងប្រដាប់អាវុធគ្រប់ប្រភេទ រដ្ឋបាលក្រុង ស្រុក ឃុំ សង្កាត់ និងមន្ទីរ អង្គភាពពាក់ព័ន្ធ លោកគ្រូ អ្នកគ្រូ សិស្សានុសិស្ស បងប្អូនប្រជាពលរដ្ឋ វិស័យឯកជននានា សហការ និងចូលរួមចំណែកដល់ការអនុវត្តការងារប្រយុទ្ធប្រឆាំងគ្រឿងញៀនឱ្យបានព្រមៗគ្នា ដើម្បីជីវិត និងសហគមន៍យើងគ្មានគ្រឿងញៀន៕

ដោយ៖ ឃុត សៅ