AKP ភ្នំពេញ ថ្ងៃទី២៨ ខែវិច្ឆិកា ឆ្នាំ២០២៥ -- មជ្ឈមណ្ឌលបណ្តុះធុរកិច្ចថ្មី "តេជោ" (ម.ធ.ត.) កាលពីថ្ងៃទី២៦ ខែវិច្ឆិកា ឆ្នាំ២០២៥ បានរៀបចំ «ថ្ងៃបទបង្ហាញឆ្ពោះទៅមុខ» នៃកម្មវិធី «នវានុវត្តន៍បញ្ច្រាស» រដូវកាលទី៥ ដោយមានការអញ្ជើញចូលរួមពី ឯកឧត្តមបណ្ឌិត តាំង ចួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី “តេជោ” និងមានការចូលរួមពីសំណាក់ដៃគូ សហការរៀបចំកម្មវិធីរួម សហគ្រិនខ្មែរ, ធនាគារ ABA, តំណាងដៃគូពាក់ព័ន្ធ ព្រមទាំងភ្ញៀវកិត្តិយសជាច្រើនរូបទៀត។

សម្រាប់ «ថ្ងៃបទបង្ហាញឆ្ពោះទៅមុខ» គឺជាវគ្គផ្តាច់ព្រ័ត្រនៃកម្មវិធី «នវានុវត្តន៍បញ្ច្រាស» រដូវកាលទី ៥ ដែលត្រូវបានរៀបចំឡើងក្នុងគោលបំណងបង្ហាញពីសមិទ្ធផលរបស់ក្រុមធុរកិច្ចថ្មីទៅកាន់សាធារណជន និង ប្រកាសលទ្ធផលក្រុមជ័យលាភី ដែលបានទទួលទុនវិនិយោគដែលមិនយកភាគហ៊ុន (Equity-free Investment) ជាថវិកាសរុបចំនួន ១២០ លានរៀលពីកម្មវិធី។ 
ក្រោយពីការឆ្លងកាត់វគ្គបណ្តុះបណ្តាល ជាច្រើនសប្តាហ៍ក្នុងកម្មវិធី, ក្រុមធុរកិច្ចថ្មីទាំង ៧ ក្រុម រួមមាន Kotluy for Biz, We Gro Up, DeGen, Prohose Official, ShopiLink, Nextory និង EVantage បានធ្វើបទបង្ហាញអំពីអាជីវកម្មខ្លួនទៅកាន់ គណៈកម្មការក្នុង «ថ្ងៃបទបង្ហាញវាយតម្លៃ» ដើម្បីដណ្តើមយកជ័យលាភី។ 

ជាលទ្ធផល ទុនវិនិយោគ ដែលមិនយកភាគហ៊ុនសរុបចំនួន ១២០ លានរៀល ត្រូវបានប្រើប្រាស់ដើម្បីផ្តល់ជូនដល់ក្រុមធុរកិច្ចថ្មី ឆ្នើមចំនួន ៥ ក្រុម ដោយពានរង្វាន់ Challenge Champion Award ជាមួយនឹងទឹកប្រាក់ចំនួន ៤០ លាន រៀលបានប្រគល់ទៅកាន់ក្រុមធុរកិច្ចថ្មី We Gro Up, ពានរង្វាន់ Strategic Insight Award ជាមួយនឹងទឹកប្រាក់ចំនួន ២៥ លានរៀលក្នុងមួយក្រុមបានប្រគល់ទៅកាន់ក្រុមធុរកិច្ចថ្មី Kotiuy for Biz និង ក្រុមធុរកិច្ចថ្មី EVantage, និង ពានរង្វាន់ Emerging Innovator Award ជាមួយនឹងទឹកប្រាក់ចំនួន ១៥ លានរៀល ក្នុងមួយក្រុម បានប្រគល់ទៅកាន់ក្រុមធុរកិច្ចថ្មី Prohose Official និង ក្រុមធុរកិច្ចថ្មី ShoplLink។

ឯកឧត្តមបណ្ឌិត តាំង ចួនលី បានមានប្រសាសន៍ថា កម្មវិធីនវានុវត្តន៍បញ្ច្រាសរដូវកាលទី ៥ ត្រូវបានបង្កើតឡើងក្នុងគោលបំណង ផ្តល់ឱកាសដល់ក្រុមធុរកិច្ចថ្មី ក្នុងការចូលរួមដោះស្រាយបញ្ហាប្រឈម ក្នុងទីផ្សារជាក់ស្តែងតាមរយៈការបង្កើតជា ដំណោះស្រាយប្រកបដោយភាពច្នៃប្រឌិត និង នវានុវត្តន៍ ផ្តល់ជាចំណេះដឹង និង ជំនាញសំខាន់ៗ ដល់ក្រុមធុរកិច្ចថ្មី ដើម្បីអភិវឌ្ឍន៍ផលិតផល ឬ សេវាកម្មប្រកបដោយសក្តានុពលគ្រប់គ្រាន់សម្រាប់ចូល ទៅកាន់ទីផ្សារ និង ផ្សារភ្ជាប់ជាមួយនឹងបណ្តាញតួអង្គពាក់ព័ន្ធក្នុងប្រព័ន្ធអេកូឡូស៊ីធុរកិច្ចថ្មី។

គួរបញ្ជាក់ផងដែរថា កម្មវិធីនវានុវត្តន៍បញ្ច្រាសរដូវកាលទី ៥ ត្រូវបានរៀបចំឡើងដោយ មជ្ឈមណ្ឌលបណ្តុះធុរកិច្ចថ្មី “តេជោ” នៃក្រសួងសេដ្ឋកិច្ច និង ហិរញ្ញវត្ថុ, ដោយមានការសហការរៀបចំកម្មវិធីដោយ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ និង សហគ្រិនខ្មែរ ព្រមទាំងទទួលបានការឧបត្ថម្ភធំពី ធនាគារ ABA ផងដែរ៕

ដោយ៖ រិទ្ធី ប្រភព៖ មជ្ឈមណ្ឌលបណ្តុះធុរកិច្ចថ្មី “តេជោ”