AKP បន្ទាយមានជ័យ ថ្ងៃទី២៨ ខែវិច្ឆិកា ឆ្នាំ២០២៥-- ដើម្បីធានាបាននូវសុវត្ថិភាពសង្គម និងការអភិវឌ្ឍធនធានមនុស្សប្រកបដោយគុណភាព អាជ្ញាធរខេត្តបន្ទាយមានជ័យបានបន្តចុះយុទ្ធនាការយ៉ាងសកម្មនៅតាមតំបន់ព្រំដែន ដើម្បីផ្សព្វផ្សាយអប់រំអំពីការទប់ស្កាត់អំពើជួញដូរមនុស្ស និងបញ្ហាប្រឈមនានាដែលយុវវ័យកំពុងជួបប្រទះ។ 

នៅព្រឹកថ្ងៃសុក្រ ទី២៨ ខែវិច្ឆិកា ឆ្នាំ២០២៥ លោកស្រី រស់ សុផានី អភិបាលរងខេត្ត និងជាប្រធានលេខាធិការដ្ឋាននៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត តំណាងដ៏ខ្ពង់ខ្ពស់ ឯកឧត្ដម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញជាអធិបតីក្នុងពិធីផ្សព្វផ្សាយអប់រំស្តីពី «ការទប់ស្កាត់អំពើជួញដូរមនុស្ស ការធ្វើចំណាកស្រុកប្រកបដោយសុវត្ថិភាព សុវត្ថិភាពកុមារតាមប្រព័ន្ធអនឡាញ និងការទប់ស្កាត់ការរៀបអាពាហ៍ពិពាហ៍វ័យក្មេង» ដោយពិធីនេះបានប្រារព្ធធ្វើឡើងនៅសាលារៀន ម៉េង ហួរ ណ័រវ៉េស្ទ ក្រុងប៉ោយប៉ែត ដោយមានអ្នកចូលរួមសរុបប្រមាណ ២៥០នាក់ រួមមានតំណាងមន្ទីរអង្គភាពពាក់ព័ន្ធ កងកម្លាំងនគរបាល អាជ្ញាធរក្រុង សង្កាត់ ភូមិ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋ។

ក្នុងឱកាសនោះ លោកស្រី រស់ សុផានី បានលើកឡើងថា ក្រុងប៉ោយប៉ែត ខេត្តបន្ទាយមានជ័យជាតំបន់ជាប់ព្រំដែន ដែលមានចរន្តនៃការចល័តប្រជាជនខ្ពស់ ដូច្នេះការយល់ដឹងអំពីសុវត្ថិភាពនៃការធ្វើចំណាកស្រុក និងល្បិចកលរបស់ជនខិលខូចគឺជាកត្តាចាំបាច់បំផុត។លោកស្រីអភិបាលរងខេត្ត បានមានប្រសាសន៍សង្កត់ធ្ងន់ថា «បងប្អូនប្រជាពលរដ្ឋ និងក្មួយៗសិស្សានុសិស្ស ត្រូវមានការប្រុងប្រយ័ត្នខ្ពស់ចំពោះការលួងលោមពីមេខ្យល់ដែលសន្យាថានឹងផ្តល់ការងារប្រាក់ខែខ្ពស់នៅក្រៅប្រទេស ព្រោះវាអាចជាអន្ទាក់នៃការជួញដូរមនុស្ស។ ទន្ទឹមនឹងនេះ ក្នុងសម័យឌីជីថល ក្មួយៗត្រូវចេះប្រើប្រាស់បណ្ដាញសង្គមដោយមានការទទួលខុសត្រូវ ចៀសវាងការចាញ់បោកជនអនាមិកតាមប្រព័ន្ធអនឡាញ ដែលអាចឈានទៅដល់ការកេងប្រវ័ញ្ចផ្លូវភេទ ឬការគំរាមកំហែងរូបភាពអាសអាភាសជាដើម។»

លោកស្រីក៏បានបន្ថែមទៀតថា ការរៀបអាពាហ៍ពិពាហ៍វ័យក្មេង និងការមានផ្ទៃពោះមុនវ័យ បាន និងកំពុងក្លាយជាឧបសគ្គរារាំងដល់ការសិក្សា និងអនាគតរបស់យុវជន។ លោកស្រីបានអំពាវនាវដល់អាណាព្យាបាល ត្រូវជំរុញកូនចៅឱ្យខិតខំរៀនសូត្រ ចាប់យកចំណេះដឹងជំនាញជាធំ ដើម្បីក្លាយជាទំពាំងស្នងឫស្សីដ៏រឹងមាំសម្រាប់ប្រទេសជាតិ។   កម្មវិធីនេះទទួលបានការចាប់អារម្មណ៍យ៉ាងខ្លាំងពីសំណាក់អ្នកចូលរួម ដោយឆ្លុះបញ្ចាំងពីការយល់ដឹងកាន់តែច្បាស់អំពីបញ្ហាសង្គមទាំងនេះ។

យុវសិស្ស ពិសិដ្ឋ ដែលបានចូលរួមក្នុងកម្មវិធី បានបង្ហាញអារម្មណ៍ថា«ខ្ញុំសប្បាយចិត្តដែលបានចូលរួមកម្មវិធីនេះ ព្រោះវាធ្វើឱ្យខ្ញុំយល់ដឹងច្រើនអំពីរបៀបការពារខ្លួននៅពេលប្រើហ្វេសប៊ុក ឬតិកតុក។ ខ្ញុំនឹងយកចំណេះដឹងនេះទៅប្រាប់មិត្តភក្តិបន្ត ដើម្បីកុំឱ្យគេចាញ់បោកគេតាមអនឡាញ និងខិតខំរៀនសូត្រមិនគិតរឿងស្នេហាវ័យក្មេងនោះទេ។»

ចំណែកឯ អ្នកស្រី ធារី ជាប្រជាពលរដ្ឋរស់នៅក្រុងប៉ោយប៉ែត បានលើកឡើងថា «ការចុះមកផ្សព្វផ្សាយផ្ទាល់បែបនេះពិតជាល្អណាស់ ព្រោះពួកខ្ញុំជាពលរដ្ឋជួនកាលមិនដឹងពីនីតិវិធីធ្វើចំណាកស្រុកឱ្យស្របច្បាប់ទេ។ ថ្ងៃនេះខ្ញុំយល់ច្បាស់ហើយថា បើចង់ទៅធ្វើការស្រុកគេ ត្រូវទៅតាមក្រុមហ៊ុនស្របច្បាប់ ទើបមានសុវត្ថិភាព និងមិនត្រូវបានគេកេងប្រវ័ញ្ចកម្លាំងពលកម្ម។»

គួរបញ្ជាក់ថា យុទ្ធនាការនេះគឺជាផ្នែកមួយនៃផែនការសកម្មភាពរបស់គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តបន្ទាយមានជ័យ ក្នុងការលុបបំបាត់រាល់ទម្រង់នៃការជួញដូរមនុស្ស និងលើកកម្ពស់សុវត្ថិភាពសង្គមនៅតំបន់ព្រំដែន៕

ដោយ ឈុន សារ៉ាត