AKP ភ្នំពេញ ថ្ងៃទី២៨ ខែវិច្ឆិកា ឆ្នាំ២០២៥ -- ឯកឧត្តម បណ្ឌិត ចែម វីឌ្យ៉ា ប្រធានគណៈកម្មការកិច្ចការបរទេស និងសហប្រតិបត្តិការអន្តរជាតិ បានចាត់ទុកប្រទេសនិងប្រជាជនអាល្លឺម៉ង់គឺគំរូល្អមួយដែលប្រជាជនកម្ពុជាគួររៀនសូត្រតាមនូវតម្លៃវប្បធម៌ ចំណេះជំនាញផ្សេងៗ យកគំរូល្អទាំងនោះមកចូលរួមកសាងប្រទេសកម្ពុជាឱ្យរីកចម្រើនរុងរឿងបន្ថែមទៀត។

ក្នុងពិធីទទួលគ្រឿងឥស្សរិយយសជាន់ខ្ពស់ Grand Cross of Merit With Star of the Order  of Merit of the Federal Republic of Germany ពីឯកឧត្តម Stefan Messerer ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសហព័ន្ធអាល្លឺម៉ង់ប្រចាំព្រះរាជាណាចក្រកម្ពុជា នៅវិមានឯកអគ្គរដ្ឋទូតអាល្លឺម៉ង់ រាជធានីភ្នំពេញ នាព្រឹកថ្ងៃសុក្រ ទី២៨ ខែវិច្ឆិកា ឆ្នាំ២០២៥នេះ ឯកឧត្តម បណ្ឌិត ចែម វីឌ្យ៉ា បានសម្ដែងការពេញចិត្តយ៉ាងខ្លាំងចំពោះវប្បធម៌អាល្លឺម៉ង់។

ឯកឧត្តម បណ្ឌិត បានមានប្រសាសន៍ថា«ខ្ញុំមានក្ដីរំភើបដែលបានទទួលគ្រឿងឥស្សរិយយសជាន់លំដាប់ទី២ដែលមានតម្លៃស្មើគ្រឿងឥស្សរិយយស ជាតូបការនៅកម្ពុជា ជាពិសេសបានរៀនសូត្រពីអាល្លឺម៉ង់ ព្រោះអាល្លឺម៉ង់មានវប្បធម៌ល្អណាស់ មានវិន័យក្នុងការធ្វើការច្បាស់លាស់ ធ្វើអ្វីគឺមុតមាំ ដែលជាទុនសម្រាប់ខ្ញុំសម្រាប់បម្រើប្រទេសជាតិប្រកបដោយវិន័យ ប្រកបដោយភាពទៀងទាត់ ប្រកបដោយអំណត់ឧស្សាហ៍ព្យាយាម»។

ទន្ទឹមនឹងក្ដីរំភើបនេះ ឯកឧត្តម បណ្ឌិត ចែម វីឌ្យ៉ា បានគូសបញ្ជាក់ថា គ្រឿងឥស្សរិយយសដែលផ្ដល់ ដោយឯកឧត្តមបណ្ឌិត Frank Walter Steinmeier ប្រធានាធិបតីនៃសាធារណរដ្ឋសហព័ន្ធអាល្លឺម៉ង់ តាមរយៈឯកឧត្តម ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសអាល្លឺម៉ង់ ប្រចាំព្រះរាជាណាចក្រកម្ពុជានេះ វាគឺជាកិត្តិយសលើកទីមួយហើយដែលពលរដ្ឋកម្ពុជា ម្នាក់ត្រូវបានផ្តល់ពានរង្វាន់ពីប្រទេសអាល្លឺម៉ង់។

ឯកឧត្តម Stefan Messerer ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសហព័ន្ធអាល្លឺម៉ង់ប្រចាំព្រះរាជាណាចក្រកម្ពុជា បានមានប្រសាសន៍ថា ការផ្ដល់គ្រឿងឥស្សរិយយសកំពូលទី២ដល់ ឯកឧត្តម បណ្ឌិត ចែម វីឌ្យ៉ា ជាការទទួលស្គាល់នូវការខិតខំរបស់ឯកឧត្តមបណ្ឌិតដែលបានធ្វើឱ្យទំនាក់ទំនង អាល្លឺម៉ង់-កម្ពុជា កាន់តតែល្អប្រសើរ។
សូមជម្រាបជូនថា ឯកឧត្តម បណ្ឌិត ចែម វីឌ្យ៉ា បានរស់នៅនៅសាធារណរដ្ឋសហព័ន្ធអាល្លឺម៉ង់ជាង១ទសវត្សរ៍ ដោយជីវិតជានិស្សិត៩ឆ្នាំ តាំងពីថ្នាក់អនុបណ្ឌិតរហូតដល់ថ្នាក់បណ្ឌិត និងបានសរសេរនិក្ខេបបទជាភាសាអាល្លឺម៉ង់ថែមទៀត។ 

លើសពីនេះទៅទៀត ឯកឧត្តមធ្លាប់ធ្វើជាឯកអគ្គរាជទូតកម្ពុជាប្រចាំប្រទេសអាល្លឺម៉ងចាប់ពីឆ្នាំ២០០៧ រហូតដល់ឆ្នាំ២០១៣។ និយាយជារួមទាំងជីវិតសិក្សានិងការងារ ឯកឧត្តម បានរស់នៅប្រទេសអាល្លឺម៉ង១៥ឆ្នាំកន្លះ។ ដូច្នេះហើយឯកឧត្តម អាចនិយាយនិងស្គាល់វប្បធម៌អាល្លឺម៉ង់យ៉ាងច្បាស់លាស់៕

ដោយ៖ គង់ សិរីរ័ត្ន, រូបថត៖ ហុង ម៉េងឡុង