AKP កំពង់ធំ ថ្ងៃទី២៨ ខែវិច្ឆិកា ឆ្នាំ២០២៥-- ក្រសួងការងារ និងបណ្តុះបណ្តាលវិជ្ជាជីវៈ បានរៀបចំពិធីចែកសម្ភារសិក្សា និងមធ្យោបាយធ្វើដំណើរជូនកុមារចំនួន៦០នាក់ មកពីស្រុកសន្ទុក និងស្រុកស្ទោង ខេត្តកំពង់ធំ គម្រោងកិច្ចអន្តរាគមន៍ស្នូលឆ្នាំ២០២៥ ដើម្បីគាំពារ និងទប់ស្កាត់ពលកម្មកុមារ ពិសេសក្នុងវិស័យសិប្បកម្មផលិតឥដ្ឋ-ក្បឿង ក្រោមអធិបតីភាពលោកជំទាវ សួស រដ្ឋារី តំណាងឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដោយមានការចូលរួមពីលោក លី វេត អភិបាលរងខេត្តកំពង់ធំ មន្ទីរពាក់ព័ន្ធ ម្ចាស់សិប្បកម្ម អាណាព្យាបាល និងសិស្សានុសិស្សនៅសាលាបឋមសិក្សា និងអនុវិទ្យាល័យបញ្ញាជី ឃុំត្បូងក្រពើ ស្រុកសន្ទុក ខេត្តកំពង់ធំ កាលពីថ្ងៃទី២៧ ខែវិច្ឆិកា ឆ្នាំ២០២៥។

លោក អៀង សុភាព ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ធំ បានបញ្ជាក់ថា គម្រោងកិច្ចអន្តរាគមន៍ស្នូលដើម្បីទប់ស្កាត់ពលកម្មកុមារក្នុងវិស័យសិប្បកម្ម និងកសិឧស្សាហកម្ម ត្រូវបានអនុវត្តតាំងពីឆ្នាំ២០១៧ ដោយជ្រើសរើសកុមារគោលដៅដែលឪពុកម្តាយធ្វើការនៅសិប្បកម្មឥដ្ឋ-ក្បឿង ដើម្បីបង្ការការបោះបង់ការសិក្សា កុមារទាំងនេះ ត្រូវបានគាំទ្រជាសម្ភារសិក្សា សម្លៀកបំពាក់ កង់និងការសិក្សាបំប៉ន៣ខែរួមទាំងបណ្តុះបណ្តាលបំណិនជីវិត និងជំនាញវិជ្ជាជីវៈ ព្រមទាំងផ្តល់ពូជមាន់និងបន្លែដើម្បីជួយលើកស្ទួយជីវភាពគ្រួសារ។

លោក លី វេត បានមានប្រសាសន៍ថា រាជរដ្ឋាភិបាលបានយកចិត្តទុកដាក់ខ្ពស់លើការអភិវឌ្ឍទីផ្សារការងារឱ្យមានភាពធន់ ការងារល្អនិងប្រាក់ចំណូលខ្ពស់ សម្រាប់ប្រជាពលរដ្ឋ។ ការយកចិត្តទុកដាក់នេះមានគោលបំណងលើកកម្ពស់លក្ខខណ្ឌការងារ និងសុខុមាលភាពនិយោជិកទាំងក្នុងនិងក្រៅប្រព័ន្ធព្រមទាំងលើកកម្ពស់ជីវភាពប្រជាពលរដ្ឋ ជាមួយនឹងការជំរុញឱ្យធុរកិច្ចមានភាពរស់រវើកនិងវិនិយោគប្រកបដោយចីរភាពដើម្បីឆ្លើយតបទៅសេដ្ឋកិច្ចសង្គម និងទីផ្សារការងារ។ 

លោកជំទាវ សួស រដ្ឋារី បានលើកឡើងថាការគាំទ្រដល់ក្រសួង និងមន្ទីរការងារក្នុងការអនុវត្តគម្រោងនេះបង្ហាញពីការយកចិត្តទុកដាក់ខ្ពស់ក្នុងការអនុវត្តច្បាប់ និងគោលនយោបាយពាក់ព័ន្ធនឹងការទប់ស្កាត់ពលកម្មកុមារ និងការការពារកុមារ។ លោកជំទាវបានបញ្ជាក់ថា ពលកម្មកុមារជាបញ្ហាសកល ដែលបណ្តាលមកពីកត្តាអប់រំសង្គមការអនុវត្តច្បាប់និងអំពើល្មើសហើយបង្កផលប៉ះពាល់ធ្ងន់ធ្ងរដល់អនាគតកុមារ។ ដូច្នេះការទប់ស្កាត់បញ្ហានេះត្រូវការការសហការពីគ្រប់ភាគីព្រមទាំងអាជ្ញាធរ ម្ចាស់សិប្បកម្ម អាណាព្យាបាល និងកុមារផងដែរដោយមានទំនួលខុសត្រូវរួម។

ក្នុងឱកាសនោះលោកជំទាវ បានអំពាវនាវឱ្យមានការចូលរួមទប់ស្កាត់ពលកម្មកុមារនៅមូលដ្ឋាន៖ ទី១. នៅសាលារៀន គ្រូបង្រៀនត្រូវមានតួនាទីតាមដាននិងឃ្លាំមើលសិស្សកុំឱ្យបោះបង់ការសិក្សាដើម្បីទៅធ្វើការ។ ទី២. អាជ្ញាធរភូមិ ឃុំ ត្រូវធ្វើការគ្រប់គ្រងនិងតាមដានតាមខ្នងផ្ទះដើម្បីទប់ស្កាត់កុមារមិនឱ្យចូលទៅកន្លែងធ្វើការ ពិសេសក្នុងវិស័យសិប្បកម្មផលិតឥដ្ឋ។ទី៣. អាណាព្យាបាលដែលធ្វើការឬស្នាក់នៅក្នុងបរិវេណសិប្បកម្មមិនត្រូវនាំកូនចូលទៅក្នុងបរិវេណផលិតកម្មឬប្រើប្រាស់ពលកម្មកុមារឡើយ ហើយត្រូវបញ្ជូនកូនឱ្យទៅរៀនឱ្យបានគ្រប់ៗគ្នា។ ទី៤. និយោជកឬម្ចាស់សិប្បកម្ម ត្រូវមានការប្រុងប្រយ័ត្ន មិនជ្រើសរើសកុមារក្រោមអាយុ១៥ឆ្នាំឱ្យចូលធ្វើការ។ ដោយឡែក ក្រុមអធិការកិច្ចការងារត្រូវចុះត្រួតពិនិត្យលក្ខខណ្ឌការងារ និងទប់ស្កាត់មិនឱ្យកុមារចូលធ្វើការនៅកន្លែងផលិតកម្ម៕

ដោយ ស៊ុម វណ្ណា