AKP បន្ទាយមានជ័យ ថ្ងៃទី២៨ ខែវិច្ឆិកា ឆ្នាំ២០២៥-- រដ្ឋបាលស្រុកមង្គលបូរីបានរៀបចំកិច្ចប្រជុំឆ្លុះបញ្ចាំងស្តីពីការអនុវត្តការងារគណនេយ្យភាពសង្គម (ISAF) ដែលប្រព្រឹត្តទៅនៅសាលប្រជុំសាលាស្រុកមង្គលបូរី ក្រោមអធិបតីភាពលោក កែវ តុម ប្រធានក្រុមប្រឹក្សាស្រុក និង លោក រ័ត្ន ដាស៊ីណង់ អភិបាលនៃគណ:អភិបាលស្រុកមង្គលបូរីកាលពីព្រឹកថ្ងៃសុក្រ ទី២៨ ខែវិច្ឆិកា ឆ្នាំ២០២៥។

កិច្ចប្រជុំដ៏មានសារសំខាន់នេះទទួលបានការគាំទ្រពីអង្គការទស្សនៈពិភពលោកអន្តរជាតិកម្ពុជា (World Vision) ប្រចាំស្រុកមង្គលបូរី ដោយមានការចូលរួមពី លោក លោកស្រី ជាសមាជិកក្រុមប្រឹក្សាស្រុក អភិបាលរងស្រុក មេឃុំ និងស្មៀនឃុំទាំង១៣ ប្រធានកម្រងសាលាបឋមសិក្សាទាំង១៧ ប្រធានមណ្ឌលសុខភាពទាំង១៤ តំណាងអង្គការដៃគូអភិវឌ្ឍន៍ និងអ្នកសម្របសម្រួលគណនេយ្យភាពសហគមន៍ (CAF) ជាច្រើនរូប។

ក្នុងឱកាសនោះ លោក សូ សាវលិញ ប្រធានការិយាល័យផែនការ និងគាំទ្រឃុំ បានធ្វើបទបង្ហាញយ៉ាងលម្អិតអំពីវឌ្ឍនភាពការងារប្រចាំឆ្នាំ២០២៥ ដោយលើកឡើងនូវចំណុចសំខាន់ៗមាន សាវតារការងារគណនេយ្យភាពសង្គម គោលបំណង គោលការណ៍ យុទ្ធសាស្ត្រ សមាសភាពគណនេយ្យភាពសង្គមដំណាក់កាលទី២ យន្តការអនុវត្ត រចនាសម្ព័ន្ធនៃផែនការអនុវត្តដំណាក់កាលទី២ វដ្តសកម្មភាព និងជំហានការងារនិងឧបករណ៍សំខាន់ៗសម្រាប់ការអនុវត្ត។

លោកប្រធានការិយាល័យបានគូសបញ្ជាក់បន្ថែមថា «គណនេយ្យភាពសង្គមគឺជាយន្តការដ៏សំខាន់ក្នុងការផ្សារភ្ជាប់ទំនាក់ទំនងរវាងប្រជាពលរដ្ឋ និងរដ្ឋបាលថ្នាក់ក្រោមជាតិ។ វាជាវេទិកាដែលផ្តល់ឱកាសឱ្យប្រជាពលរដ្ឋអាចសម្តែងមតិ និងចូលរួមតាមដានការបំពេញការងាររបស់អង្គភាពផ្តល់សេវា ដែលមិនអាចខ្វះបានរវាងផ្នែកផ្គត់ផ្គង់ (រដ្ឋ) និងផ្នែកតម្រូវការ (ប្រជាពលរដ្ឋ)»។

ក្នុងឱកាសនោះ លោក រ័ត្ន ដាស៊ីណង់ អភិបាលស្រុកមង្គលបូរី បានវាយតម្លៃខ្ពស់ចំពោះកិច្ចប្រជុំឆ្លុះបញ្ចាំងនេះ ដោយចាត់ទុកថាជាមូលដ្ឋានគ្រឹះក្នុងការកំណត់គោលដៅយុទ្ធសាស្ត្រសម្រាប់អនុវត្តបន្តនៅឆ្នាំ២០២៦ និងបានសង្កត់ធ្ងន់ថា «ការអនុវត្តការងារនេះគឺស្របទៅនឹងគោលនយោបាយកំណែទម្រង់វិមជ្ឈការ និងវិសហមជ្ឈការ និងកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ ជាងនេះទៅទៀត វាឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្នុងការបង្កើនវប្បធម៌ប្រជាធិបតេយ្យ ការទទួលយកសំណូមពរ និងការដោះស្រាយបញ្ហាប្រឈមជូនប្រជាពលរដ្ឋប្រកបដោយប្រសិទ្ធភាព និងការទទួលខុសត្រូវ»។

ជាមួយគ្នានោះ លោក រ័ត្ន ដាស៊ីណង់ បានថ្លែងអំណរគុណយ៉ាងជ្រាលជ្រៅចំពោះអង្គការទស្សនៈពិភពលោក ដែលជាដៃគូដ៏សំខាន់ និងសកម្មក្នុងការគាំទ្រដំណើរការគណនេយ្យភាពសង្គមរហូតមក ហើយលោកសង្ឃឹមយ៉ាងមុតមាំថា អង្គការនឹងបន្តកិច្ចសហការ និងការគាំទ្រដ៏ល្អនេះបន្តទៀតនៅថ្ងៃអនាគត៕

ដោយ ឈុន សារ៉ាត