AKP ភ្នំពេញ ថ្ងៃទី២៨ ខែវិច្ឆិកា ឆ្នាំ២០២៥-- ឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទី មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសំអាតមីន និងកាកសំណល់សង្គ្រាម បានវាយតម្លៃខ្ពស់ចំពោះរដ្ឋាភិបាល ក្រសួងការពារជាតិ កងទ័ព យោធាចារ្យ អនុព័ន្ធយោធា  និងឯកអគ្គរដ្ឋទូតអូស្ត្រាលីប្រចាំកម្ពុជា ដែលតែងតែជួយឧបត្ថម្ភគាំទ្រដល់មជ្ឈមណ្ឌលជាតិ ក្នុងការរួមចំណែកបង្កើនសមត្ថភាពតាំងពីដើមរៀងមក ក្នុងន័យលើកកម្ពស់សក្តានុពលកងទ័ពកម្ពុជាឱ្យមានសមត្ថភាពគ្រប់គ្រាន់ក្នុងការចូលរួមបេសកកម្មរក្សាសន្តិភាពអង្គការសហប្រជាជាតិ។ ការវាយតម្លៃរបស់ ឯកឧត្តម ឧត្តមសេនីយ៍ទោ សែម រតនា យ៉ាងដូច្នេះធ្វើឡើងក្នុងពិធីបិទវគ្គបណ្តុះបណ្តាលស្តីពីការការពារជនស៊ីវិលសម្រាប់ប្រតិបត្តិការរក្សាសន្តិភាពអង្គការសហប្រជាជាតិ នាព្រឹកថ្ងៃទី២៨ ខែវិច្ឆិកា ឆ្នាំ ២០២៥ ដោយមានការអញ្ជើញចូលរួមពីសំណាក់លោកស្រី វរនាវីត្រី Karleah Fitzpatrick អនុព័ន្ធយោធារងអូស្ត្រាលីប្រចាំកម្ពុជា។

ឯកឧត្តម ឧត្តមសេនីយ៍ទោ សែម រតនា បានគូសបញ្ជាក់ថា តាមរយៈការរៀបចំវគ្គនានាក្រោមការឧបត្ថម្ភគាំទ្រពីរដ្ឋាភិបាលអូស្ត្រាលី គឺបានឆ្លុះបញ្ចាំងពីកិច្ចសហប្រតិបត្តិការកាន់តែប្រសើរឡើងជាលំដាប់ ហើយថារាល់វគ្គបណ្តុះបណ្តាលទាំងនោះបានក្លាយជាទុនបន្ថែមក្នុងការអនុវត្តភារកិច្ចប្រកបដោយបរិយាប័ន្ន ជាកម្លាំងរក្សាសន្តិភាពសម្រាប់បេសកកម្មអង្គការសហប្រជាជាតិផង និងដើម្បីប្រទេសជាតិផង។ ឯកឧត្តម ឧត្តមសេនីយ៍ទោ បានរំលឹកថា ក្រោមកិច្ចខិតខំប្រឹងប្រែង និងការធ្វើពលីកម្មគ្រប់បែបយ៉ាងរបស់ ឯកឧត្តម សែម សុវណ្ណនី អតីតអគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសំអាតមីន និងកាកសំណល់សង្គ្រាម បានធ្វើឱ្យមានកិច្ចសហប្រតិបត្តិការទាំងទ្វេភាគី និងពហុភាគី។ ជាក់ស្តែងកិច្ចសហប្រតិបត្តិការជាមួយប្រទេសអូស្ត្រាលី គឺមានតាំងពីការកកើតឡើងនូវមជ្ឈមណ្ឌលជាតិមកម៉្លេះ ដោយភាគីអូស្ត្រាលីបានជួយដល់ការរៀបចំកងអនុសេនាធំបោសសំអាតមីនលេខ១៣៥ ដែលជាកងដំបូងនៃកទ័ពមួកខៀវកម្ពុជាចេញទៅបំពេញបេសកកម្មនៅប្រទេសស៊ូដង់។ គិតចាប់ពីពេលនោះមកអូស្ត្រាលីបានពង្រីកកិច្ចសហការរហូតផ្តល់វគ្គហ្វឹកហ្វឺនជាបន្តបន្ទាប់ ទាំងក្នុង និងក្រៅប្រទេសសរុបចំនួន ៣៧វគ្គ មានសិក្ខាកាមចូលរួមសរុប ៣៩៥នាក់។

សម្រាប់បេសកកម្មនៅលើឆាកអន្តរជាតិ ឯកឧត្តម ឧត្តមសេនីយ៍ទោ សែម រតនា បានលើកឡើងថា កម្ពុជាត្រៀមខ្លួនក្នុងការសម្រេច «ភាពប្រសើរឡើងជាមួយគ្នា» ដោយសហការជាមួយរដ្ឋសមាជិកទាំងអស់ ប្រព័ន្ធអង្គការសហប្រជាជាតិ និងដៃគូនៅទូទាំងពិភពលោក ដើម្បីធានាថាក្នុងអនាគតរាប់ទសវត្សរ៍ទៅមុខទៀតនឹងពោរពេញទៅដោយសន្តិភាព ការអភិវឌ្ឍប្រកបដោយចីរភាព និងសេចក្តីថ្លៃថ្នូរ ដែលមិនអាចកាត់ថ្លៃបានសម្រាប់មនុស្សគ្រប់រូប ហើយថាក្នុងឆ្នាំនេះ និងទៅអនាគត កម្ពុជានៅតែប្តេជ្ញាចិត្តខ្ពស់បន្តសកម្មភាពជាអាទិភាពក្នុងប្រតិបត្តិការរក្សាសន្តិភាព និងពង្រឹងសន្តិភាព ស្ថេរភាពក្នុងប្រទេស ក៏ដូចជាបន្តសកម្មភាពមនុស្សធម៌ តាមរយៈការចូលរួមបេសកកម្មអង្គការសហប្រជាជាតិ  ដែលនិន្នាការនេះក៏ស្របគ្នានឹងការលើកឡើងរបស់ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដែលបានថ្លែងក្នុងមហាអង្គសន្និបាតអង្គការសប្រជាជាតិខួបលើកទី៨០ កាលពីខែកញ្ញា ឆ្នាំ២០២៥កន្លងទៅនេះ៕

ដោយ៖ ចាន់ សុភឿន