AKP ភ្នំពេញ ថ្ងៃទី២០ ខែតុលា ឆ្នាំ២០២៥-- ឯកឧត្តម សុត រស្មី រដ្ឋលេខាធិការ ក្រសួងធនធានទឹក និងឧតុនិយម  បានដឹកនាំក្រុមការងារក្រសួងធនធានទឹក និងឧតុនិយម និងតំណាងក្រសួងសេដ្ឋកិច្ច និងហិរញ្ញវត្ថុ ព្រមទាំងមានការចូលរួមពីនាយកដ្ឋានវិស្វកម្ម នាយកដ្ឋានជលសាស្ត្រ និងការងារទន្លេ ដើម្បីប្រជុំពិនិត្យសំណើចរចាថ្លៃសម្រាប់គម្រោងស្ថាបនា ស្តារ និងជួសជុលប្រព័ន្ធធារាសាស្ត្រ និងគម្រោងការពារច្រាំងទន្លេ ក្នុងខេត្តតាកែវ និងខេត្តកំពង់ចាម  នាព្រឹកថ្ងៃចន្ទ ទី២០ ខែតុលា ឆ្នាំ២០២៥ នេះ  នៅសាលប្រជុំរំដួលនៃទីស្តីការក្រសួងធនធានទឹក និងឧតុនិយម ។

គម្រោងក្នុងខេត្តទាំងពីរនេះរួមមាន៖ ១)គម្រោងសាងសង់ទំនប់អាងទឹកវិទ្យាស្ថានពហុជំនាញយោធាតេជោសែន និងសាងសង់សំណង់ សិល្បការ្យ នៅក្នុងឃុំត្រពាំងក្រញូង ស្រុកត្រាំកក់ ខេត្តតាកែវ និង២)គម្រោងការពារច្រាំងទន្លេមេគង្គ ប្រវែង ៧០០ម៉ែត្រ ស្ថិតនៅភូមិព្រែកស្ដី ឃុំព្រះអណ្តូង ស្រុកស្ទឹងត្រង់ ខេត្តកំពង់ចាម (ជំហានទី២)។

ក្នុងឱកាសនេះដែរ ក៏មានការបើកឯកសារពិគ្រោះថ្លៃ ដោយមានការចូលរួមពីតំណាងក្រុមហ៊ុន រួមមាន៖ ១) ផ្គត់ផ្គង់សំបកកង់រថយន្ត របស់អង្គភាពក្រោមឱវាទក្រសួងធនធានទឹក និងឧតុនិយម ឆ្នាំ២០២៥ ២) ផ្គត់ផ្គង់សម្ភារការិយាល័យ របស់អង្គភាពក្រោមឱវាទក្រសួងធនធានទឹក និងឧតុនិយម ឆ្នាំ២០២៥ ៣) ផ្គត់ផ្គង់សម្ភារ និងបរិក្ខារបច្ចេកទេសព័ត៌មានវិទ្យា របស់អង្គភាពក្រោមឱវាទក្រសួងធនធានទឹក និងឧតុនិយម ឆ្នាំ២០២៥ ៤) ផ្គត់ផ្គង់ឧបករណ៍បម្រើឱ្យការសិក្សាស្រាវជ្រាវតម្រូវការទឹករបស់ដំណាំ សម្ភារ និងបរិក្ខារបច្ចេកទេស មិនមែនព័ត៌មានវិទ្យា និងសម្ភារប្រើប្រាស់ របស់អង្គភាពក្រោមឱវាទក្រសួងធនធានទឹក និងឧតុនិយម ឆ្នាំ២០២៥ ៥)ជួសជុលសម្ភារ និងឧបករណ៍បច្ចេកទេស ឆ្នាំ២០២៥ របស់អង្គភាពក្រោមឱវាទក្រសួងធនធានទឹក និងឧតុនិយម និង៦) ជួសជុលអគារតាមបណ្តាអង្គភាពក្រោមឱវាទក្រសួងធនធានទឹក និងឧតុនិយម ឆ្នាំ២០២៥។

ឯកឧត្តមរដ្ឋលេខាធិការបានបញ្ជាក់ថា កិច្ចប្រជុំនេះជាសក្ខីភាពបញ្ជាក់នូវភាពត្រឹមត្រូវ គណនេយ្យភាព និងតម្លាភាព សម្រាប់ធ្វើការពិនិត្យ និងវាយតម្លៃ រួមគ្នាលើបទដ្ឋានបច្ចេកទេស ស្ថានភាពជាក់ស្តែង ព្រមទាំងតម្លៃ មុននឹងឈានដល់ការសម្រេចឯកភាពជាផ្លូវការ៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)