AKP បន្ទាយមានជ័យ ថ្ងៃទី២០ ខែតុលា ឆ្នាំ២០២៥-- ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានថ្លែងអំណរគុណយ៉ាងជ្រាលជ្រៅបំផុត ចំពោះបងប្អូនប្រជាពលរដ្ឋខ្មែរដែលកំពុងរស់នៅក្រៅប្រទេស ដែលបានចាត់តំណាងនាំយកនូវអំណោយជា ថ្នាំ និងបរិក្ខារពេទ្យ មួយចំនួនធំ ជូនដល់ក្រុមគ្រូពេទ្យប្រចាំការនៅតាមបន្ទាត់ព្រំដែន ដើម្បីចែកជូនបន្តដល់បងប្អូនប្រជាពលរដ្ឋខ្មែរសម្រាប់ប្រើប្រាស់។ ពិធីទទួលអំណោយនេះ បានធ្វើឡើងកាលពីព្រឹកថ្ងៃទី២០ ខែតុលា ឆ្នាំ២០២៥ នេះនៅសាលាខេត្ត។

ក្នុងឱកាសនោះ ឯកឧត្តមអភិបាលខេត្តបានមានប្រសាសន៍ថា «តាំងនាមរដ្ឋបាលខេត្តបន្ទាយមានជ័យ ខ្ញុំបាទសូមថ្លែងអំណរគុណយ៉ាងជ្រាលជ្រៅបំផុតចំពោះបងប្អូនប្រជាពលរដ្ឋខ្មែរដែលរស់នៅក្រៅប្រទេស ដែលបាននាំយកនូវថ្នាំ បរិក្ខារពេទ្យ ជូនដល់ក្រុមគ្រូពេទ្យ ប្រចាំការនៅតាមបន្ទាត់ព្រំដែន សម្រាប់ចែកជូនដល់បងប្អូនប្រជាពលរដ្ឋសម្រាប់ប្រើប្រាស់»។

ឯកឧត្តមបានបន្តទៀតថា កាយវិការដ៏ប្រពៃនេះ ពិតជាបានឆ្លុះបញ្ចាំងពី ទឹកចិត្តស្នេហាជាតិ និងស្មារតីសាមគ្គីភាពដ៏មោះមុត របស់កូនខ្មែរគ្រប់រូប ទោះបីជាពួកគេកំពុងរស់នៅឆ្ងាយពីមាតុភូមិក៏ដោយ។ ការបរិច្ចាគនេះមិនត្រឹមតែជាជំនួយផ្នែកសុខភាពប៉ុណ្ណោះទេ តែថែមទាំងបានបង្ហាញយ៉ាងច្បាស់នូវ ឆន្ទៈរួមគ្នា ក្នុងការយកចិត្តទុកដាក់ និងគាំទ្រដល់កិច្ចការងារការពារជាតិ ការពារព្រំដែន និងសុខុមាលភាពរបស់ប្រជាពលរដ្ឋតាមតំបន់ព្រំដែន។ ការផ្តល់ជំនួយនៅពេលនេះ គឺជាការបង្ហាញនូវ សារសំខាន់នៃស្មារតីសាមគ្គីរួមគ្នា ក្នុងបុព្វហេតុជាតិ ដែលបង្ហាញថា កូនខ្មែរទាំងអស់មិនថានៅទីណាទេ តែងតែមានក្តីស្រឡាញ់ និងការទទួលខុសត្រូវខ្ពស់ចំពោះប្រទេសជាតិខ្លួន។

ជាមួយគ្នានោះដែរ ឯកឧត្តមអភិបាលខេត្តបន្ទាយមានជ័យ ក៏បានថ្លែងជូនពរបងប្អូនប្រជាពលខ្មែរដែលរស់នៅក្រៅប្រទេសទាំងអស់ សូមទទួលបាននូវ សុខភាពល្អ សំណាងល្អ ជួបប្រទះតែពុទ្ធពរ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយ ឈុន សារ៉ាត