AKP ភ្នំពេញ ថ្ងៃទី២០ ខែតុលា ឆ្នាំ២០២៥-- "ភូមិខ្មែរអ្នកធ្វើ" ផ្សារទេសចរណ៍ខ្មែរ ត្រូវបានបង្កើតឡើងក្នុងគោលបំណងជួយជំរុញសក្ដានុពលទេសចរណ៍ដ៏សម្បូរបែប និងការអភិវឌ្ឍផលិតផលទេសចរណ៍ រួមជាមួយការប្រមូលផ្ដុំផលិតផលក្នុងស្រុក ដែលសុទ្ធសឹងតែជាស្នាដៃរបស់បងប្អូនខ្មែរនៅតាមមូលដ្ឋានដូចជា បន្លែ ផ្លែឈើ សម្ភារប្រើប្រាស់ វត្ថុអនុស្សាវរីយ៍ ម្ហូបអាហារប្រចាំតំបន់ សេវាកម្មផ្សេងៗ បានមកប្រមូលផ្ដុំនៅក្នុងផ្សារទំនើប ជីប ម៉ុង ២៧១ មេហ្កាម៉ល។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ កាលពីថ្ងៃទី១៩ ខែតុលា ឆ្នាំ២០២៥ បានអញ្ជើញទស្សនាការដាក់លក់ផលិតផលក្នុងស្រុកនេះ ក្រោមការស្វាគមន៍យ៉ាងកក់ក្តៅពីលោកអ្នឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន និងលោកជំទាវ អ្នកឧកញ៉ា លាង ម៉េង សហស្ថាបនិក និងជាប្រធានក្រុមអគ្គនាយកក្រុមហ៊ុន និងលោកជំទាវ អ្នកឧកញ៉ា លាង ហួង  អគ្គនាយកពហុពាណិជ្ជកម្មក្រុមហ៊ុនជីបម៉ុង និងលោកជំទាវ ព្រមទាំងអ្នកឧកញ៉ា ឧកញ៉ា និងលោកជំទាវសហស្ថាបនិកក្រុមហ៊ុន ជីប ម៉ុង គ្រុប និងបណ្តាអគ្គនាយកក្រុមហ៊ុន ជីប ម៉ុង គ្រុបផងដែរ។

សូមជម្រាបជូនថា "ភូមិខ្មែរអ្នកធ្វើ" មិនត្រឹមតែជាផ្សារលក់ផលិតផល ប៉ុន្តែក៏រួមបញ្ចូលជាមួយនឹងស្ថាបត្យកម្ម រចនាបទខ្មែរ សិល្បៈ វប្បធម៌ ប្រពៃណីដែលជាអត្តសញ្ញាណជាតិខ្មែរផងដែរ។

ក្នុងន័យនេះ ដើម្បីបង្ហាញពីភាពទាក់ទាញ និងបង្កើនការចាប់អារម្មណ៍ គម្រោង "ភូមិខ្មែរអ្នកធ្វើ" ឱ្យកាន់តែទូលំទូលាយ សូមអញ្ជើញបងប្អូនក្រុមអ្នកផលិតមាតិកាទេសចរណ៍កម្ពុជា (Influencers) KOL ទាំងអស់ចូលរួមផ្សព្វផ្សាយផ្សារទេសចរណ៍ខ្មែរ "ភូមិខ្មែរអ្នកធ្វើ" ទៅកាន់សាធារណជន ភ្ញៀវទេសចរជាតិ-អន្តរជាតិចូលរួមឱ្យកាន់តែច្រើន៕ 

ដោយ៖ ចាន់ សុភឿន (ប្រភព៖ ក្រសួងទេសចរណ៍)