AKP កណ្ដាល ថ្ងៃទី២០ ខែតុលា ឆ្នាំ២០២៥--សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាព្រឹកថ្ងៃទី២០ ខែតុលា ឆ្នាំ២០២៥នេះ នឹងអញ្ជើញជាអធិបតីក្នុងក្នុងពិធីបើកសម្ពោធជាផ្លូវការអាកាសយានដ្ឋានអន្តរជាតិតេជោ (TIA) ជាអាកាសយានដ្ឋានលំដាប់ថ្នាក់ 4F រួមទាំងហេដ្ឋារចនាសម្ព័ន្ធគាំទ្រ ត្រូវបានចំណាយទុនវិនិយោគសរុប ២,៣០០ (ពីរពាន់បីរយ) លានដុល្លារអាម៉េរិក និងបានសាងសង់នៅលើផ្ទៃដីសរុប ទំហំ ២,៦០០ (ពីរពាន់ប្រាំមួយរយ) ហិកតា ស្ថិតក្នុងភូមិសាស្ត្រស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវ និងមានចម្ងាយប្រមាណ ២៦គីឡូម៉ែត្រពីចំណុចកណ្ដាលរាជធានីភ្នំពេញ ។

ក្រុមហ៊ុន OCIC ដែលជាក្រុមហ៊ុនអភិវឌ្ឍអចលទ្រព្យ និងហេដ្ឋារចនាសម្ព័ន្ធដ៏ធំមួយ ដែលបានទទួល​សិទ្ធិ​ពី​រាជរដ្ឋាភិបាលកម្ពុជា ក្នុងការអភិវឌ្ឍន៍ និងសាងសង់អាកាសយានដ្ឋាន​អន្តរជាតិ ដែល​បច្ចុប្បន្ន​មាន​ឈ្មោះជាផ្លូវការថា អាកាសយានដ្ឋានអន្តរជាតិតេជោ Techo International Airport (TIA) ដែល​ប្រសិទ្ធនាម​ដោយ​សម្តេចអគ្គ​មហា​សេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុម​ឧត្តមប្រឹក្សាផ្ទាល់ ព្រះមហាក្សត្រ នៃព្រះរាជាណាចក្រ​កម្ពុជា។

ការវិនិយោគសាងសង់ TIA (ដំណាក់កាលទី១) មានចំនួន ២,៣០០ លានដុល្លារអាម៉េរិកដោយ​រួមបញ្ចូលចំណាយសាងសង់ស្ថានីយអ្នកដំណើរ ស្ថានីយ​អ្នកដំណើរពិសេស (VVIP Terminal) ទីលាន​ចុះចតយន្តហោះ អគារ និងហេដ្ឋារចនាសម្ព័ន្ធ​ទ្រទ្រង់ប្រតិបត្តិការអាកាសយានដ្ឋាន រួមមានផ្លូវ ស្ពានអាកាស ឃ្លាំងទំនិញ ចំណាយ​ហិរញ្ញប្បទាន និង​ចំណាយសម្រាប់ការផ្ទេរ​ប្រតិបត្តិការ​ពី​អាកាសយាន​ដ្ឋាន​​​អន្តរជាតិ​ភ្នំពេញ មក TIA។

ទុនវិនិយោគ គឺប្រើដើមទុនផ្ទាល់របស់ក្រុមហ៊ុន OCIC និងការចូលរួមទុន​តាមរយៈ​​​មូលបត្រ​បំណុល ពីស្ថាប័នធនាគារ និងហិរញ្ញវត្ថុក្នុងស្រុក។

អាកាសយានដ្ឋានអន្តរជាតិស្តង់ដារកម្រិត4Fនេះ ត្រូវបានគ្រប់គ្រង និង​សាងសង់​ទាំងមូល​ដោយ​ក្រុមហ៊ុន OCIC និងក្រុមហ៊ុន CAIC។

គម្រោងនេះ ក៏មានការចូលរួមពីក្រុមហ៊ុនអន្តរជាតិល្បីៗជាច្រើនដូចជា ក្រុមហ៊ុន Foster + Partners ជា​ស្ថាបត្យករ​នៃស្ថានីយ៍អ្នកដំណើរ ក្រុមហ៊ុន​កាណាដា ATKINS ដែលជា Consultant ​រៀបចំ​ផែនការដើម ក្រុមហ៊ុនកូរ៉េ​ខាងត្បូង Heerim Architects & Planners ដែលជា Consultant រៀបចំ​គម្រោង​នៅ​ពេលសាងសង់ ក្រុមហ៊ុនហូឡង់ NACO ជាអ្នករៀបចំផែនការមេ (Master Planer) ​ក្រុមហ៊ុន​សិង្ហបុរី Changi ដែលជាអ្នកប្រឹក្សាលើផែន​ការ​​អាជីវកម្ម ការរៀបចំ​ទទួល​វិញ្ញាបន​បត្រ​អាកាសចរ និង ការងារត្រៀមប្រតិបត្តិការ និងផ្ទេរពីព្រលានចាស់មកព្រលានថ្មី(ORAT，Operational Readiness and Airport Transfer) ។ ក្រុមហ៊ុន 中建三局(China State Construction Third Engineering Bureau Co., Ltd.) ដែលមកពីប្រទេសចិន​ជា​ក្រុមហ៊ុន​ម៉ៅការ​សាងសង់​ស្ថានីយអ្នកដំណើរ។

អាកាសយានដ្ឋានអន្តរជាតិតេជោ ត្រូវបានសាងសង់​រួមមានបី​ដំណាក់កាល ដោយដំណាក់​កាល​ទី១មានសមត្ថភាពអាចទទួលអ្នកដំណើរបាន១៣លាននាក់ក្នុងមួយឆ្នាំ។ ដំណាក់កាលទី២អាច​ទទួលអ្នកដំណើរបាន ៣០លាននាក់ក្នុងមួយឆ្នាំ និងដំណាក់កាល​ទី៣អាចទទួលអ្នកដំណើរបាន ៥០លាននាក់ក្នុងមួយឆ្នាំ។

គោលដៅរួមរបស់ក្រុមហ៊ុន ​CAIC និងប្រតិបត្តិករអាកាសយានដ្ឋាន Société Concessionnaire de l’Aéroport (SCA) ដែលជាក្រុមហ៊ុនបុត្រសម្ព័ន្ធរបស់ VINCI Airports គឺធ្វើយ៉ាងណាបង្កើនចំនួន​អ្នកដំណើរ​នៅ TIA ពី៥.៣លាននាក់ ក្នុងឆ្នាំ២០២៥ ដល់ ១០លាននាក់ នៅឆ្នាំ២០៣០។ គោលដៅមួយនេះ អាចសម្រេចទៅបានដោយការបង្កើនសមត្ថភាពក្រុមហ៊ុនអាកាសចរណ៍ និងទាក់ទាញ​​ក្រុមហ៊ុន​អាកាសចរណ៍​ថ្មីៗ បន្ថែមទៀត ក្រោមការគាំទ្រពី​រាជរដ្ឋាភិបាលកម្ពុជា តាមរយៈក្រសួងទេសចរណ៍ និងរដ្ឋលេខាធិការដ្ឋាន​អាកាសចរណ៍ស៊ីវិល (SSCA)។

ផ្អែកតាមកម្មវិធីការងារបានចំណាយពេលសាងសង់ចំនួនជាង ៥ឆ្នាំ ចាប់ផ្តើមនៅថ្ងៃទី០៧ ខែមករា ឆ្នាំ២០២០ និងបញ្ចប់នៅថ្ងៃទី៣១ខែកក្កដា ឆ្នាំ២០២៥៕

ដោយ៖ គង់ សិរីរ័ត្ន