AKP ភ្នំពេញ ថ្ងៃទី១៩ ខែតុលា ឆ្នាំ២០២៥ -- ឯកឧត្តមបណ្ឌិត ជា ច័ន្ទបរិបូរណ៍ ឯកអគ្គរាជទូតនៃព្រះរាជាណាចក្រកម្ពុជាកោតបានមានប្រសាសន៍កោតសរសើរចំពោះតួនាទីយ៉ាងសកម្ម របស់ប្រទេសហ្វីលីពីន ក្នុងកិច្ចសហប្រតិបត្តិការតំបន់ និងពហុភាគី សម្រាប់ការលើកកម្ពស់សហគមន៍អាស៊ាន និងក្នុងការរក្សាសន្តិភាព និងស្ថិរភាពតំបន់។ ការលើកឡើងរបស់ឯកឧត្ដមឯកអគ្គរាជទូតបែបនេះ ក្នុងឱកាសទទួលជួបសម្តែងការគួរសម និងពិភាក្សាការងារជាមួយ ឯកឧត្តម Noel Servigon ឯកអគ្គរដ្ឋទូតនៃសាធារណរដ្ឋហ្វីលីពីន ប្រចាំប្រទេសរូម៉ានី កាលពីថ្ងៃទី១៧ ខែតុលា ឆ្នាំ ២០២៥ នៅស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំសាធារណរដ្ឋប៊ុលហ្គារី។

ឯកឧត្តមបណ្ឌិត ជា ច័ន្ទបរិបូរណ៍ បានសម្ដែងនូវការអបអរសាទរយ៉ាងកក់ក្តៅចំពោះឯកឧត្តម ក្នុងឱកាសដែលឯកឧត្តមទទួលបានការតែងតាំងជា ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋហ្វីលីពីន ប្រចាំប្រទេសរូម៉ានី ហើយឯកឧត្ដមជឿជាក់ថា ក្រោមការដឹកនាំដ៏ឆ្លាតវៃរបស់ឯកឧត្តមឯកអគ្គរដ្ឋទូត ទំនាក់ទំនងមិត្តភាពជិតស្និទ្ធរវាងប្រទេសទាំងពីរ នឹងបន្តរីកចម្រើនរឹងមាំឡើងទៅទៀត។

ឯកឧត្ដមឯកអគ្គរាជទូតបានលើកឡើងថា រយៈពេលជាច្រើនទសវត្សរ៍កន្លងមកនេះ ប្រទេសយើងទាំងពីរបានចែករំលែកនូវបទពិសោធន៍ ការរឹតចំណងមិត្តភាព ការគោរពគ្នាទៅវិញទៅមក និងការសហការដ៏ជិតស្និទ្ធទាំងផ្នែកទ្វេភាគី និងក្នុងសមាគមអាស៊ាន។ ឯកឧត្ដមបានថ្លែងបញ្ជាក់ថា៖ «ក្នុងវិស័យសហប្រតិបត្តិការតំបន់ និងពហុភាគី កម្ពុជាសូមកោតសរសើរចំពោះតួនាទីយ៉ាងសកម្ម របស់ប្រទេសហ្វីលីពីន ក្នុងការលើកកម្ពស់សហគមន៍អាស៊ាន និងក្នុងការរក្សាសន្តិភាព និងស្ថិរភាពតំបន់។ យើងរំពឹងថានឹងបន្តធ្វើការជិតស្និទ្ធជាមួយឯកឧត្តម ដើម្បីបង្កើនសាមគ្គីភាព និងឯកភាពអាស៊ាន ព្រមទាំងការប្តេជ្ញារួមសម្រាប់ការអភិវឌ្ឍប្រកបដោយចីរភាព»។

កាលពីពេលថ្មីៗនេះ ដំណើរទស្សនកិច្ចផ្លូវរដ្ឋរបស់លោកប្រធានាធិបតីហ្វីលីពីនទៅប្រទេសកម្ពុជាកាលពីអំឡុងខែកញ្ញា ឆ្នាំ២០២៥កន្លងមកនេះ បានរួមចំណែកពង្រឹងបន្ថែមកាន់តែខ្លាំងថែមទៀតនូវចំណងមិត្តភាព និងសាមគ្គីភាព ព្រមទាំងកិច្ចសហប្រតិបត្តិការលើគ្រប់វិស័យ រវាងប្រទេស និងប្រជាជនប្រទេសទាំងពីរ។
ឯកឧត្ដមឯកអគ្គរាជទូតក៏សូមសម្ដែងនូវការពេញចិត្តចំពោះការរឹតចំណងមិត្តភាព និងសាមគ្គីភាព ព្រមទាំងកិច្ចសហប្រតិបត្តិការលើគ្រប់វិស័យរបស់ប្រទេស និងប្រជាជនទាំងពីរ។ ឯកឧត្ដមឯកអគ្គរាជទូតជឿជាក់យ៉ាងមុតមាំថា នឹងមានសក្តានុពលយ៉ាងច្រើនជាបន្តបន្ទាប់ទៀត សម្រាប់ពង្រីកកិច្ចសហប្រតិបត្តិការប្រទេសទាំងពីរ ជាពិសេសក្នុងការលើកកម្ពស់ពាណិជ្ជកម្ម និងវិនិយោគ កសិកម្ម ថាមពលកកើតឡើងវិញ និងការផ្លាស់ប្តូរឌីជីថល។

ជាមួយគ្នានេះ ឯកឧត្តមបណ្ឌិត ជា ច័ន្ទបរិបូរណ៍ ក៏បានរម្លឹកអំពីបញ្ហាជម្លោះកម្ពុជា-ថៃ ដោយកម្ពុជាប្តេជ្ញា និងស្មោះត្រង់គោរព កិច្ចព្រមព្រៀងឈប់បាញ់ ថ្ងៃទី២៨ ខែកក្កដា ឆ្នាំ២០២៥ នៅប្រទេសម៉ាឡេស៊ី ក៏ប៉ុន្តែ ភាគីថៃមិនបានអនុវត្តន៍ដោយស្មោះត្រង់ឡើយ ដោយចាប់ផ្តើម រាយបន្លាលួស ដាក់កង់ឡាន ទន្ទ្រានចូលអធិបបតេយ្យភាព កម្ពុជា ដោយខុសច្បាប់។ មិនតែប៉ុណ្ណោះ ពួកគេបានចាក់សំឡេងសត្វឆ្កែលូ ឆ្កែព្រូស និងសំឡេងខ្មោច ដើម្បីបន្លាចប្រជាពលរដ្ឋកម្ពុជា នៅភូមិព្រៃចាន់ ដើម្បីរំខានមិនដេកបាន គោលបំណងបង្ខំឱ្យពួកគេជម្លៀសចេញពីតំបន់នេះ។ ឯកឧត្ដមឯកអគ្គរាជទូតក៏បានជម្រាបជូនទៀតថា កម្ពុជា មិនឈ្លានពានថៃ ហើយក៏មិនឱ្យបាត់បង់ទឹកដី ដែលយើងមានក្រោយសន្ធិសញ្ញា  បារាំង-សៀម ១៩០៤ និង ១៩០៧ កម្ពុជាត្រូវការសន្តិភាព ក្នុងការដោះស្រាយគ្នាមិនបាន សូមភាគីថៃក្លាហានទៅដោះស្រាយនៅតុលាការអន្តរជាតិ ICJ ។

សូមបញ្ជាក់ថា កម្ពុជា និងហ្វីលីពីន បានភ្ជាប់ទំនាក់ទំនងផ្លូវការនៅថ្ងៃទី២០ ខែសីហា ឆ្នាំ១៩៥៧      តែត្រូវបានកាត់ផ្តាច់នៅឆ្នាំ១៩៧៥ ក្នុងរបបខ្មែរក្រហម។ លុះខែកុម្ភៈ ឆ្នាំ១៩៩២ បន្ទាប់ពីកម្ពុជា មានកិច្ចព្រមព្រៀងសន្តិភាពទីក្រុងប៉ារីស ប្រទេសហ្វីលីពីន ក៏បានភ្ជាប់ទំនាក់ទំនងឡើងវិញ។ ចាប់ពីឆ្នាំ១៩៩២មក ទំនាក់ទំនងរវាងកម្ពុជា និងហ្វីលីពីន ត្រូវបានលើកកម្ពស់ និងពង្រីកជាបន្តបន្ទាប់។ កិច្ចសហប្រតិបត្តិការរវាងកម្ពុជា និង   ហ្វីលីពីន ដែលបានធ្វើរួមគ្នានាពេលកន្លងមកនោះ មានដូចជា វិស័យសេដ្ឋកិច្ច, វិស័យសន្តិសុខ ការពារជាតិ, វិស័យអប់រំ សុខាភិបាល, វិស័យការងារ បណ្តុះបណ្តាលវិជ្ជាជីវៈ, វិស័យកសិកម្ម ពាណិជ្ជកម្ម, វិស័យវិទ្យាសាស្ត្រ បច្ចេកវិទ្យា និងនវានុវត្តន៍, វិស័យបរិស្ថាន៕

ដោយ៖ រិទ្ធី ប្រភព៖ ឯកអគ្គរាជទូតកម្ពុជាប្រចាំសាធារណរដ្ឋប៊ុលហ្គារី