AKP  ថ្ងៃទី១៩ ខែតុលា ឆ្នាំ២០២៥ -- ឯកឧត្តម តូច ប៊ុនហ៊ួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងសហការី អាជ្ញាធរខេត្ត អាជ្ញាធរមូលដ្ឋានស្រុក ឃុំ និងមន្ត្រីកសិកម្មឃុំ ថ្ងៃទី១៨ ខែតុលា ឆ្នាំ២០២៥ បានចុះពិនិត្យ និងវាយតម្លៃស្ថានភាពនៃផលប៉ះពាល់ដំណាំស្រូវដោយទឹកជំនន់នៅស្រុកទ្រាំង ស្រុកបូរីជលសារ និងស្រុកកោះអណ្តែត ខេត្តតាកែវ ដោយបានជួបសំណេះសំណាលជាមួយបងប្អូនប្រជាពលរដ្ឋរងគ្រោះ និងបានណែនាំដល់មន្ទីរកសិកម្មខេត្ត អាជ្ញាធរមូលដ្ឋានស្រុក-ឃុំ និងមន្ត្រីកសិកម្មឃុំ វាយតម្លៃផលប៉ះពាល់ជាក់ស្តែង និងកំណត់អត្តសញ្ញាណគ្រួសារកសិករដែលរងការខូចខាតដំណាំស្រូវ និងងាយរងគ្រោះ ដើម្បីស្នើសុំកិច្ចអន្តរាគមន៍ពីប្រព័ន្ធស្បៀងបម្រុងកម្ពុជា សម្រាប់ការដាំដុះឡើងវិញបានទាន់ពេលវេលាបន្ទាប់ពីទឹកស្រកទៅ។ 

តាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តតាកែវបានឱ្យដឹងថា ទឹកទន្លេដែលហូរមកពីទន្លេបាសាក់ និងទឹកភ្លៀង បានបង្កការជន់លិចដំណាំស្រូវរបស់ប្រជាពលរដ្ឋនៅស្រុកចំនួន៦ រួមមាន៖ ស្រុកអង្គរបូរី ទ្រាំង បូរីជលសារ កោះអណ្តែត ព្រៃកប្បាស និងស្រុកសំរោង ក្នុងនោះ ភូមិចំនួន ៧៨ ក្នុងឃុំសរុបចំនួន ២២ឃុំ បានរងផលប៉ះពាល់ ដោយភាគច្រើនលើដំណាំស្រូវដែលទើបព្រោះបាន១ ទៅ ២សប្តាហ៍ និងនៅដំណាក់កាលពន្លូតដើម និងចេញផ្កា។ 

សូមបញ្ជាក់ផងដែរថា រយ:ពេលជាង១៥ឆ្នាំហើយ នៅភូមិសាស្រ្តភូមិ-ឃុំ នៃស្រុកទាំង៣ មិនដែលជួបបញ្ហាលិចលង់នេះទេ។ បច្ចុប្បន្នមន្ទីរកសិកម្ម រុក្ខាប្រមាញ់ និងនេសាទខេត្ត និងអាជ្ញាធរមូលដ្ឋានពាក់ព័ន្ធកំពុងតាមដានស្ថានភាពជន់លិចនេះបន្តទៀត៕

ដោយ៖ ចាន់ សុភឿន (ប្រភព៖ ក្រសួងកសិកម្ម)