AKP ភ្នំពេញ ថ្ងៃទី១៨ ខែតុលា ឆ្នាំ២០២៥​ -- នៅក្នុងសចក្ដីថ្លែងការណ៍រួម ឬកិច្ចព្រមព្រៀងដើម្បីសន្តិភាពរវាងកម្ពុជា-ថៃ បានលម្អិតពីការប្ដេជ្ញាចិត្តគោរពបទឈប់បាញ់ ស្ដារទំនុកចិត្ត និងរួមគ្នាប្រយុទ្ធប្រឆាំងឧក្រិដ្ឋកម្មឆ្លងដែន។ នេះជាការបញ្ជាក់របស់ ឯកឧត្តម ឧបនាយករដ្ឋមន្ត្រី រដ្ឋមន្រ្តីក្រសួងការបរទេស។

ក្នុងបទសម្ភាសន៍ជាមួយអ្នកសារព័ត៌មាន នៅអាកាសយានដ្ឋានអន្តរជាតិតេជោ នាថ្ងៃទី១៨ ខែតុលា ឆ្នាំ២០២៥ បន្ទាប់ពីមាតុភូមិនិវត្តន៍ពីការចូលរួមកិច្ចប្រជុំចតុភាគី នៅប្រទេសម៉ាឡេស៊ី ឯកឧត្តម ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បានថ្លែងថា ភាគីទាំងពីរអះអាងសាជាថ្មីអំពីការប្ដេជ្ញាចិត្ត ក្នុងការគោរពនិងអនុវត្តឱ្យបានម៉ឺងម៉ាត់នូវបទឈប់បាញ់។

ជាពិសេស ភាគីទាំងពីរគោរពនូវគោលការណ៍អធិបតេយ្យ បូរណភាពទឹកដី ឯកភាពរាជ្យជាតិរបស់ប្រទេសនីមួយៗ និងការតាំងចិត្តសម្រាប់ស្ដារទំនុកចិត្តរវាងគ្នាទៅវិញទៅមកដែលនេះជាការនាំឆ្ពោះទៅរកសន្តិភាពពេញលេញឡើងវិញរវាងប្រទេសទាំងពីរ។

ឯកឧត្តម ឧបនាយករដ្ឋមន្រ្តី ប្រាក់ សុខុន បានថ្លែងថា «ការពង្រឹងនូវទំនុកចិត្តនិងស្ដារទំនាក់ទំនងប្រក្រតីភាពឡើងវិញរវាងប្រទេសយើងទាំងពីរ ក្នុងនោះមាន ឧទាហរណ៍ដូចជា ការស្ដារទំនុកចិត្ត ការស្តារទំនាក់ទំនងការទូតជាមួយគ្នាឡើងវិញ នាំគ្នាធ្វើការឆ្ពោះទៅរកការទំនាក់ទំនងការទូត កន្លងមកទម្លាក់កម្រិតទំនាក់ទំនងការទូតមកត្រឹមថ្នាក់លេខាធិការរបស់ស្ថានទូត ការរួមគ្នាសហការគ្នាដើម្បីប្រយុទ្ធប្រឆាំងឧក្រិដ្ឋកម្មឆ្លងដែនជាដើម ក្នុងនោះក៏មានបញ្ហា Online Scam ដែលជាបញ្ហាធំសម្រាប់ប្រទេសយើងទាំងពីរ»។

ឯកឧត្តម ឧបនាយករដ្ឋមន្រ្តី ក៏បានឱ្យដឹងបន្ថែមថា នៅក្នុងការជជែកគ្នាចតុភាគីដែលមានសហរដ្ឋអាមេរិក កម្ពុជា ថៃ និងម៉ាឡេស៊ីប្រធានប្ដូរវេនអាស៊ានជាអ្នកសម្រាបសម្រួលនោះ ក៏បាននិយាយពីការដកអាវុធធន់ធ្ងន់ទាំងឡាយពីព្រំដែន ដើម្បីបញ្ជូនទៅកាន់មូលដ្ឋានទ័ពរបស់ខ្លួនរៀងៗខ្លួនវិញ ដើម្បីឈានទៅកាត់បន្ថយនូវភាពតានតឹងនៅតាមតំបន់ទល់ដែនផងដែរ៕

ដោយ៖ គង់ សិរីរ័ត្ន