AKP បន្ទាយមានជ័យ ថ្ងៃទី១៨ ខែតុលា ឆ្នាំ២០២៥​ -- អង្គការសមាគមខ្មែរកម្ពុជាក្រោមនៅកម្ពុជា តំណាងឱ្យប្រជាពលរដ្ឋខ្មែរកម្ពុជាក្រោម បាននាំយកអំណោយជាស្បៀងអាហារ និងថវិកាជូនដល់ពលរដ្ឋខ្មែរប្រមាណ ២០០គ្រួសារ ដែលកំពុងរស់នៅក្នុងភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នៅព្រឹកថ្ងៃសៅរ៍ ទី១៨ ខែតុលា ឆ្នាំ២០២៥។

ភូមិទាំងពីរនេះ គឺជាភូមិដែលរងការយាយីពីកងទ័ពថៃ ដោយពួកគេបានយកបន្លាលួសព័ទ្ធយកដីភូមិ ដីចម្ការ ស្រែ និងផ្ទះសម្បែងរបស់ប្រជាពលរដ្ឋមួយចំនួន កាលពីថ្ងៃទី១២ និងទី១៣ ខែសីហា ឆ្នាំ២០២៥នេះ។ ពលរដ្ឋនៅក្នុងភូមិជោគជ័យ និងព្រៃចាន់ បានប្រឈមការលំបាកក្នុងជីវភាព ដោយខ្លះត្រូវបានកងកម្លាំងចម្រុះរបស់ថៃរាយបន្លាលួសព័ទ្ធយកផ្ទះ ហើយពលរដ្ឋខ្លះទៀតក៏មិនបានទៅប្រកបរបរអ្វីនោះដែរ ដោយពួកគាត់បានត្រៀមខ្លួនទប់ស្កាត់ការរាយបន្លាលួសថ្មីៗបន្ថែមទៀតពីសំណាក់កងកម្លាំងចម្រុះរបស់ថៃ។

កម្មវិធីចែកស្បៀងអាហារ និងថវិកាជូនពលរដ្ឋដែលកំពុងជួបការលំបាកព្រោះកងកម្លាំងថៃរាយបន្លាលួសនេះ ដឹកនាំដោយ លោក គីម វ៉ាន់ឆេង ដែលមាន ៦សមាគមខ្មែរក្រោមផ្សេងទៀតជាសមាជិក រួមនិងលេខាធិការដ្ឋានអង្គការសមាគមខ្មែរក្រោម ដឹកនាំដោយ លោក ញឹម រិទ្ធី។ ក៏មានការនិមន្តចូលរួមពីព្រះសង្ឃខ្មែរដើមកំណើតខ្មែរក្រោមចំនួន ១០ អង្គ មកពីវត្តអង្គតាមិញ វត្តសាមគ្គីរង្សី វត្តតាំងក្រសាំងខាងត្បូង វត្តបុទុមវតី និងវត្តនាគវ័ន្តផងដែរ។ សកម្មភាពមនុស្សធម៌នេះ មានការសម្របសម្រួលដោយក្រុមការងារ ឯកឧត្ដម សាន សាង ទីប្រឹក្សាសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

អំណោយដែលបានយកទៅចែកជូនរួមមាន៖ អង្ករមួយតោនកន្លះ មី១៥០កេស ទឹកត្រី១៥០ យួរ ទឹកស៊ីអ៊ីវ១៥០យួរ ភួយចំនួន៩០ភួយ និងថវិកាចំនួន ១,៥០០,០០០រៀល។

ព្រះគ្រូវិនិយានុរ័ក្ខធម្ម យ៉ាន់ ថាត ព្រះចៅអធិការវត្តអង្គតាមិញ ដែលបាននិមន្តយកអំណោយជូនប្រជាពលរដ្ឋ បានមានសង្ឃដីកាថា ខ្មែរកម្ពុជាក្រោម និងខ្មែរនៅកម្ពុជា គឺជាខ្មែរតែមួយ។ នៅពេលឃើញខ្មែរនៅកម្ពុជាជួបការលំបាក បងប្អូនខ្មែរក្រោមនៅគ្រប់ទីកន្លែងក៏បានរៃអង្គាសគ្នា ដើម្បីជួយរំលែកនូវការលំបាកទាំងឡាយ ហើយនេះជាទឹកព្រះទ័យ និងទឹកចិត្តរបស់បងប្អូនខ្មែរក្រោម ដែលតែងរួមសុខរួមទុក្ខជានិច្ចជាមួយបងប្អូនខ្មែរនៅកម្ពុជា។

ជាមួយគ្នានោះ ឯកឧត្ដម សាន សាង ក៏បានបន្ថែមថា អំណោយជំនួយទាំងនេះបានមកពីការចូលរួមរបស់បងប្អូនខ្មែរក្រោមនៅគ្រប់ទីកន្លែង ហើយសកម្មភាពមនុស្សធម៌របស់ព្រះសង្ឃ និងបងប្អូនប្រជាពលរដ្ឋខ្មែរកម្ពុជាក្រោមនាពេលនេះ គឺជាការស្តែងឱ្យឃើញនូវស្មារតីសាមគ្គី និងការជួយយកអាសាគ្នាក្នុងគ្រាលំបាក រវាងប្រជាពលរដ្ឋខ្មែរកម្ពុជាក្រោម និងប្រជាពលរដ្ឋនៅកម្ពុជា ស្របតាមស្មារតីរបស់សម្តេចតេជោ ហ៊ុន សែន គឺ ខ្មែរគ្រប់ទីកន្លែងជាខ្មែរតែមួយ។

សូមបញ្ជាក់ថា ចាប់តាំងពីប្រទេសកម្ពុជាជួបការលំបាកដោយការឈ្លានពានពីសំណាក់កងទ័ពថៃមក ព្រះសង្ឃ និងប្រជាពលរដ្ឋខ្មែរកម្ពុជាក្រោម កំពុងរស់នៅកម្ពុជា ក៏ដូចជារស់នៅតាមប្រទេសនានា បានចូលរួមធ្វើសកម្មភាពមនុស្សធម៌នៅតាមខេត្តជាប់ព្រំដែនប្រទេសថៃជាបន្តបន្ទាប់។ រហូតមកដល់ពេលនេះ ពួកគេបានធ្វើសកម្មភាពមនុស្សធម៌ចំនួន ៧ លើក មកហើយ ដែលបានស្តែងឱ្យឃើញថា សហគមន៍ខ្មែរកម្ពុជាក្រោម តែងតែផ្សារភ្ជាប់ជានិច្ចជាមួយប្រជាពលរដ្ឋកម្ពុជា ជាពិសេសក្នុងគ្រាមានទុក្ខលំបាក៕

ដោយ ឈុន សារ៉ាត