AKP ភ្នំពេញ ថ្ងៃទី១៨ ខែតុលា ឆ្នាំ២០២៥ -- ប្រមុខការទូតកម្ពុជាបានគូសបញ្ជាក់ថា កម្ពុជា-ថៃ បានឈានដល់ការឯកភាពគ្នាលើឯកសារនៃកិច្ចព្រមព្រៀងសន្តិភាព សម្រាប់ការចុះហត្ថលេខារវាងនាយករដ្ឋមន្រ្តីប្រទេសទាំងពីរ នៅក្នុងកិច្ចប្រជុំកំពូលអាស៊ានដែលនឹងធ្វើឡើងនៅចុងខែតុលាខាងមុខ ក្នុងប្រទេសម៉ាឡេស៊ី។

ថ្លែងក្នុងកិច្ចសម្ភាសន៍ពិសេសជាមួយទូរទស្សន៍ជាតិកម្ពុជា ក្រោយបញ្ចប់កិច្ចប្រជុំចតុភាគី នៅម៉ាឡេស៊ី ថ្ងៃទី១៨ ខែតុលា ឆ្នាំ២០២៥ នៅអាកាសយានដ្ឋានអន្តរជាតិតេជោ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិបានបញ្ជាក់ថា នៅក្នុងឯកសារនៃកិច្ចព្រមព្រៀងសន្តិភាព ដែលឯកភាពគ្នា នៅប្រទេសម៉ាឡេស៊ីកាលពីថ្ងៃទី១៧ ខែតុលា ឆ្នាំ២០២៥ កម្ពុជា-ថៃ បានប្តេជ្ញាចិត្ត និងការអះអាងជាថ្មីក្នុងការគោរព និងអនុវត្តន៍យ៉ាងម៉ឺងម៉ាត់នូវបទឈប់បាញ់ គោរពគ្នាទៅវិញទៅមក ជាពិសេសគោរពគោលការណ៍អធិបតេយ្យ បូរណភាពទឹកដី ឯករាជ្យជាតិរបស់ប្រទេសនីមួយៗ។ ឯកឧត្ដមឧបនាយករដ្ឋមន្រ្ដីបានលើកឡើងថា ក្នុងកិច្ចប្រជុំនេះ ភាគីទាំងពីរបានតាំងចិត្តសម្រាប់ស្តារទំនុកចិត្តរវាងគ្នាទៅវិញទៅមក និងស្តារប្រក្រតីភាពឡើងវិញទំនាក់ទំនងការទូត ដែលត្រូវបានរដ្ឋាភិបាលកម្ពុជា-ថៃ ទម្លាក់ឱ្យមកនៅទាបបំផុត ត្រឹមលេខាទី២ កាលពីខែកក្កដា កន្លងទៅ បន្ទាប់ពីមានភាពតានតឹងរវាងប្រទេសទាំងពីរ។  ឯកឧត្ដមឧបនាយករដ្ឋមន្រ្ដីបានបន្ដថា ក្នុងឯកសារ នៃកិច្ចព្រមព្រៀងសម្រាប់ការចុះហត្ថលេខានេះដែរ ភាគីទាំងពីរក៏បានរួមគ្នាប្រយុទ្ធប្រឆាំងនឹងឧក្រិដ្ឋកម្មអនឡាញ, ការបោសសម្អាតមីននៅព្រំដែន ជាពិសេសគឺការដកអាវុធធុនធ្ងន់ទាំងឡាយនៅព្រំដែនបញ្ចូលទៅមូលដ្ឋានទ័ពរៀងៗខ្លួនឡើងវិញ ដើម្បីកាត់បន្ថយភាពតានតឹងផងដែរ។ 

ឯកឧត្ដមឧបនាយករដ្ឋមន្រ្ដីបានអះអាងថា ឯកសារសន្តិភាពមួយនេះ នឹងក្លាយទៅជាឯកសារមួយដែលផ្តល់នូវភាពរឹងមាំនៅក្នុងការនាំប្រទេសកម្ពុជា និងថៃ ឆ្ពោះទៅរកការស្តារទំនាក់ទំនងឱ្យវិលទៅរកប្រក្រតីភាពរវាងប្រទេស និងប្រទេស និងប្រជាជន និងប្រជាជនឡើងវិញ។ ទន្ទឹមនេះ ក៏ជាដំណើរឆ្ពោះទៅរកកិច្ចសហប្រតិបត្តិការក្នុងការរស់នៅដោយសន្តិវិធី រវាងអ្នកជិតខាងជាមួយគ្នា ហើយក៏បង្កើតនូវឱកាស

កាលានុវត្តភាពនានា ដើម្បីឱ្យប្រទេសយើងទាំងពីររស់នៅដោយសុខសន្តិភាពជាមួយគ្នា និងមានវិបុលភាពជាមួយគ្នា។ ឯកឧត្ដមឧបនាយករដ្ឋមន្រ្ដីបានសង្កត់ធ្ងន់ថា៖ «យើងសង្ឃឹមយ៉ាងមុតមោះថា ឯកសារហ្នឹងនឹងបានចុះហត្ថលេខាដោយនាយករដ្ឋមន្រ្ដីទាំងពីរកម្ពុជា និងថៃ ដោយមានការចុះហត្ថលេខាជាសាក្សីរបស់ឯកឧត្ដប្រធានាធិបតី ដូណាល់ ត្រា ប្រធានាធិបតីសហរដ្ឋអាមេរិក មកចូលរួមកិច្ចប្រជុំកំពូលនេះដែរគឺកិច្ចប្រជុំកំពូលអាស៊ាននេះ និងនាយករដ្ឋមន្រ្ដីម៉ាឡេស៊ី អាន់វ៉ា អីប្រាហ៊ីម ដែលជាប្រធានអាស៊ាន និងជាម្ចាស់ផ្ទះនៃកិច្ចប្រជុំនេះ»៕

ដោយ៖ ប៊ុនរិទ្ធ