AKP បន្ទាយមានជ័យ ថ្ងៃទី១៨ ខែតុលា ឆ្នាំ២០២៥​​ -- លោក ឈឿន សេរីវុធ ប្រធានមន្ទីរទេសចរណ៍ខេត្តបន្ទាយមានជ័យ បានដឹកនាំក្រុមការងារ ចុះអនុវត្តការងារលើកដាក់ ផ្ទាំងប៉ាណូ ផ្សព្វផ្សាយពី រមណីយដ្ឋានទេសចរណ៍អាងទឹកត្រពាំងថ្ម ដ៏សំខាន់មួយ នៅចំណុចផ្លូវបំបែក ភូមិព្រៃមាន់ ឃុំរហាល ស្រុកព្រះនេត្រព្រះ ខេត្តបន្ទាយមានជ័យកាលពីថ្ងៃសុក្រ ទី១៧ ខែតុលា ឆ្នាំ២០២៥ នេះ ។ សកម្មភាពនេះ គឺជាផ្នែកមួយនៃកិច្ចខិតខំប្រឹងប្រែងរបស់អាជ្ញាធរខេត្ត ក្នុងការជំរុញវិស័យទេសចរណ៍ក្នុងតំបន់។

ក្នុងឱកាសចុះអនុវត្តការងារនេះ លោក ឈឿន សេរីវុធ បានបញ្ជាក់អំពីគោលបំណងចម្បងនៃការលើកផ្ទាំងប៉ាណូផ្សព្វផ្សាយនៅតាមផ្លូវបំបែកសំខាន់ៗ ដូចជាចំណុចខាងលើនេះថា «ការលើកផ្ទាំងប៉ាណូផ្សព្វផ្សាយនេះ គឺដើម្បីជំរុញ និងទាក់ទាញដល់ភ្ញៀវទេសចរជាតិ និងអន្តរជាតិ ឱ្យបានស្គាល់ច្បាស់អំពីផ្លូវចូលទៅកាន់រមណីយដ្ឋានទេសចរណ៍អាងទឹកត្រពាំងថ្ម ដែលជាគោលដៅទេសចរណ៍ដ៏សំខាន់មួយរបស់ខេត្ត។ យើងចង់ឱ្យភ្ញៀវទេសចរមានភាពងាយស្រួលក្នុងការស្វែងរក និងចូលមកទស្សនាលេងកម្សាន្តនៅរមណីយដ្ឋានដ៏ស្រស់ស្អាតនេះ ដែលមានទីតាំងស្ថិតនៅភូមិត្រពាំងថ្ម ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ»។

រមណីយដ្ឋានទេសចរណ៍អាងទឹកត្រពាំងថ្ម មិនត្រឹមតែជាតំបន់កម្សាន្តប៉ុណ្ណោះទេ តែជាតំបន់ការពារទេសភាព និងមានសក្តានុពលខ្ពស់ជាច្រើនទៀត។ អាងត្រពាំងថ្ម ស្ថិតនៅក្នុង ភូមិត្រពាំងថ្ម ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។ វាមានចម្ងាយប្រហែល៦៦គីឡូម៉ែត្រ ពីទីរួមខេត្តបន្ទាយមានជ័យ (ក្រុងសិរីសោភ័ណ)។ អាងនេះត្រូវបានចាត់ទុកជា រមណីយដ្ឋានទេសចរណ៍ប្រវត្តិសាស្ត្រ ដែលជាមរតកបន្សល់ទុកពីរបបខ្មែរក្រហម ដែលក្នុងសម័យនោះ ប្រជាពលរដ្ឋរាប់រយនាក់បានលះបង់ជីវិតដោយការបង្ខំឲ្យធ្វើការហួសកម្លាំងដើម្បីសាងសង់ទំនប់នេះ។ ក្រោយមក ទំនប់នេះត្រូវបានជួសជុលស្តារឡើងវិញ និងប្រែក្លាយជាទីកន្លែងផ្តល់ស្នាមញញឹមដល់ប្រជាពលរដ្ឋវិញ។ អាងត្រពាំងថ្មគឺជាប្រព័ន្ធធារាសាស្ត្រខ្នាតធំដ៏សំខាន់មួយរបស់ប្រទេសកម្ពុជា។ អាងនេះអាចស្តុកទឹកបានក្នុងបរិមាណដ៏ច្រើនសន្ធឹកសន្ធាប់ (ប្រមាណ១៨០លានម៉ែត្រគូប នៅរដូវវស្សា ឬរហូតដល់ ៣០០ លានម៉ែត្រគូប ក្រោយការពង្រឹងពង្រីកទំនប់)។ អាងនេះដើរតួនាទីយ៉ាងសំខាន់ក្នុងការ ផ្គត់ផ្គង់ទឹក ដល់ដំណាំស្រែចំការរបស់ប្រជាកសិកររាប់ម៉ឺនហិកតា ដែលអាចស្រោចស្រពលើផ្ទៃដីស្រូវវស្សាទំហំ ២៥,០០០ ហិកតា និងស្រែប្រាំងទំហំ ១២,០០០ ហិកតា ជួយឱ្យពួកគាត់អាចបង្កបង្កើនផលបាន ៣ ដងក្នុងមួយឆ្នាំ។ អាងត្រពាំងថ្ម គឺជាតំបន់អភិរក្សជម្រកសត្វស្លាបកម្រ និងសត្វស្លាបជិតផុតពូជដ៏សំខាន់មួយ ជាពិសេសគឺ សត្វក្រៀល។ តំបន់នេះត្រូវបានកំណត់ជាដែនបម្រុងដ៏សំខាន់តាំងពីឆ្នាំ២០០០ ហើយរហូតដល់ឆ្នាំ២០២៣ ចំនួនសត្វក្រៀលបានកើនឡើងដល់ជាង ៨០០ ក្បាល។

ភ្ញៀវទេសចរអាចរីករាយជាមួយទិដ្ឋភាពវាលស្រែដ៏ធំល្វឹងល្វើយ លាយឡំជាមួយខ្យល់អាកាសបរិសុទ្ធ ព្រមទាំងអាច ងូតទឹកកម្សាន្ត ជិះទូកលេង លើផ្ទៃទឹកដ៏ខៀវស្រងាត់ ទស្សនាសត្វស្លាប និងសត្វព្រៃដ៏សម្បូរបែប ញ៉ាំអាហារប្រចាំតំបន់ (មាន់អាំង ទាអាំង ត្រីស្រស់ៗ) និងថតរូបទុកជាអនុស្សាវរីយ៍។

លោក ឈឿន សេរីវុធ ក៏បានបង្ហាញពីការប្តេជ្ញាចិត្តរបស់មន្ទីរទេសចរណ៍ និងអាជ្ញាធរខេត្តក្នុងការបន្តការអភិវឌ្ឍតំបន់នេះបន្ថែមទៀត។ «យើងនឹងបន្តការងារ អភិរក្ស ធនធានធម្មជាតិ និងជីវចម្រុះក្នុងតំបន់ ស្របពេលជាមួយគ្នានេះ ក៏ជំរុញការងារ អភិវឌ្ឍន៍ហេដ្ឋារចនាសម្ព័ន្ធទេសចរណ៍ និងពង្រីកការផ្សព្វផ្សាយពីសក្តានុពលនៃតំបន់អេកូទេសចរណ៍បែបប្រវត្តិសាស្ត្រនេះឱ្យបានទូលំទូលាយ។ ទន្ទឹមនឹងនេះ អាជ្ញាធរខេត្តក៏មានគម្រោងប្រែក្លាយតំបន់អាងត្រពាំងថ្មឲ្យក្លាយទៅជាកន្លែងទេសចរណ៍កាន់តែទាក់ទាញបន្ថែមទៀតនាពេលអនាគត ដើម្បីរួមចំណែក លើកកម្ពស់ជីវភាពប្រជាពលរដ្ឋ ក្នុងសហគមន៍ឲ្យអាចរកចំណូលបន្ថែមពីវិស័យទេសចរណ៍ ក្រៅពីការធ្វើស្រែចម្ការ»។

អាងទឹកត្រពាំងថ្ម គឺជាតំបន់ទេសចរណ៍ចម្រុះមួយ ដែលភ្ជាប់មកជាមួយនូវប្រវត្តិសាស្ត្រ សម្រស់ធម្មជាតិដ៏ស្រស់ត្រកាល និងសក្តានុពលដ៏ធំធេងក្នុងការបម្រើវិស័យកសិកម្ម និងអេកូទេសចរណ៍ ដែលពិតជាស័ក្តិសមសម្រាប់ការអញ្ជើញទៅលេងកម្សាន្តរបស់ភ្ញៀវជាតិ និងអន្តរជាតិ៕

ដោយ ឈុន សារ៉ាត