AKP តាកែវ ថ្ងៃទី១៨ ខែតុលា ឆ្នាំ២០២៥-- នៅមន្ទីរព័ត៌មានខេត្តតាកែវ ក្រសួងព័ត៌មានបានសហការជាមួយរដ្ឋបាលខេត្តតាកែវ រៀបចំបើកសិក្ខាសាលាផ្សព្វផ្សាយ ស្ដីពីកម្មវិធីកែទម្រង់វិមជ្ឈការ និងវិសហមជ្ឈការ ក្នុងដំណាក់កាលទី២ ការពិនិត្យឡើងវិញមុខងារដែលក្រសួងព័ត៌មានបានធ្វើប្រតិភូកម្ម នៅមន្ទីរព័ត៌មាននៅរដ្ឋបាលថ្នាក់ក្រោមជាតិ ក្នុងការផ្តល់សេវាវិស័យព័ត៌មាននិងសោតទស្សន៍។

សិក្ខាសាលានេះប្រព្រឹត្តទៅក្រោមអធិបតីភាព ឯកឧត្តម រស់ ថាន់សន រដ្ឋលេខាធិការក្រសួងព័ត៌មាន លោក លី សាវេត អភិបាលរងនៃគណៈអភិបាលខេត្តតាកែវ ព្រមទាំងមានការអញ្ជើញចូលរួមពីលោកលោកស្រីប្រធានអនុប្រធានមន្ទីរព័ត៌មានខេត្តតាកែវ លោកអភិបាលអភិបាលរងក្រុងដូនកែវ និងមន្ត្រីរាជការមកពីបណ្តាមន្ទីរព័ត៌មានរាជធានី-ខេត្តចំនួន៨ កាលពីថ្ងៃទី១៧ ខែតុលា ឆ្នាំ២០២៥។

ក្នុងពិធីបើកអង្គសិក្ខាសាលាក្នុងពេលនោះ ឯកឧត្តម រស់ ថាន់សន រដ្ឋលេខាធិការក្រសួងព័ត៌មាន បានគូសបញ្ជាក់ថា កំណែទម្រង់វិមជ្ឈការ និងវិសហមជ្ឈការ គឺជាស្នូលនៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។កំណែទម្រង់នេះមានគោលដៅពង្រឹងអភិបាលកិច្ច និងការផ្តល់សេវាសាធារណៈឱ្យកាន់តែខិតជិតប្រជាពលរដ្ឋ។ បើទោះបីជាក្រសួងព័ត៌មានបានផ្ទេរមុខងារមួយចំនួន ទៅឱ្យរដ្ឋបាលក្រុង ស្រុករួចហើយក្តី ក៏ការអនុវត្តជាក់ស្តែងនៅមានភាពយឺតយ៉ាវនិងមិនរលូន។ ដោយសារមន្ត្រីនៅថ្នាក់មូលដ្ឋានមួយចំនួន មិនទាន់បានយល់ច្បាស់អំពីទស្សនទាននៃកំណែទម្រង់នេះ។ ហេតុដូច្នេះសិក្ខាសាលានេះមានសារៈសំខាន់ណាស់ក្នុងការកំណត់ឡើងវិញ នូវប្រភេទនិងទំហំមុខងារ ព្រមទាំងកម្រៃសេវាក្នុងវិស័យព័ត៌មាននិងសោតទស្សន៍ សម្រាប់ធ្វើប្រតិភូកម្មក្នុងជំហានបន្តបន្ទាប់។

ឯកឧត្តម រស់ ថាន់សន បានមានប្រសាសន៍បន្តថា ក្រសួងព័ត៌មានក៏បានបង្កើត មន្ត្រីសម្របសម្រួលព័ត៌មាន និងសាធារណៈមតិចំនួន៥រូប នៅតាមរាជធានី-ខេត្តនីមួយៗ។ដើម្បីផ្សព្វផ្សាយព័ត៌មានពិតអំពីកម្ពុជា ក្រោមអភិក្រម«ថ្មី ពិត លឿន និងទូលំទូលាយ» សំដៅរួមចំណែកថែរក្សាសន្តិសុខព័ត៌មាននិងសន្តិសុខជាតិ។

លោក លី សាវេត អភិបាលរងនៃគណៈអភិបាលខេត្តតាកែវ ក៏បានគូសបញ្ជាក់ថា សិក្ខាសាលានេះ រៀបចំឡើងក្នុងគោលបំណងផ្សព្វផ្សាយ អំពីកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិជំហានទី២ ពិនិត្យមើលនិងវាយតម្លៃការអនុវត្តមុខងារ ដែលក្រសួងព័ត៌មានបានធ្វើប្រតិភូកម្មនៅមន្ទីរព័ត៌មាន និងរដ្ឋបាលថ្នាក់ក្រោមជាតិកន្លងមក។ ប្រមូលមតិយោបល់ ចំណុចប្រឈម និងសំណូមពរនានាពីមន្ត្រីថ្នាក់ក្រោមជាតិ ដើម្បីដោះស្រាយបញ្ហា និងរៀបចំផែនការសម្រាប់ជំហានបន្ទាប់៕

ដោយ អ៊ុច សៀង