AKP តាកែវ ថ្ងៃទី១៨ ខែតុលា ឆ្នាំ២០២៥ -- សាខាកាកបាទក្រហមកម្ពុជាខេត្តតាកែវបានចុះសួរសុខទុក្ខ និងនាំយកអំណោយមនុស្សធម៌ ចែកជូនបងប្អូនប្រជាពលរដ្ឋរងគ្រោះដោយទឹកជំនន់ ខ្យល់កន្ត្រាក់ ចាស់ជរាគ្មានទីពឹង និងទីទ័លក្រចំនួន២១គ្រួសារ មកពីភូមិចំនួន៥ក្នុងសង្កាត់បារាយណ៍ ក្រុងដូនកែវ ខេត្តតាកែវ ដោយមានការចូលរួមពីលោក ម៉ឹង វុធី អភិបាលរងនៃគណៈអភិបាលខេត្តតាកែវ និងជាអនុប្រធានអចិន្ត្រៃយ៍គណៈកម្មាធិការសាខា កាកបាទក្រហមកម្ពុជាខេត្តតាកែវ រួមជាមួយលោកនាយកសាខាកាកបាទក្រហមកម្ពុជាខេត្តតាកែវ សមាជិកសមាជិកាសាខា ប្រធានអនុប្រធាន សមាជិកអនុសាខាកាកបាទក្រហមកម្ពុជាក្រុងដូនកែវ។

មានប្រសាសន៍សំណេះសំណាលក្នុងឱកាសនោះលោក ម៉ឹង វុធី បានពាំនាំនូវការផ្ដាំផ្ញើរសួរសុខទុក្ខពីសំណាក់ ឯកឧត្ដម វ៉ី សំណាង ប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ និងឯកឧត្ដមបណ្ឌិត ជា វ៉ាន់ដេត ប្រធានកិត្តិយសសាខាកាកបាទក្រហមកម្ពុជាខេត្តតាកែវ ពិសេសពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្ដេចតែងតែយកចិត្តទុកដាក់គិតគូរខ្ពស់អំពីសុខទុក្ខ របស់បងប្អូនប្រជាពលរដ្ឋដែលរងគ្រោះនិងងាយរងគ្រោះគ្រប់ប្រភេទ នៅគ្រប់ទីកន្លែងដោយមិនប្រកាន់និន្នាការ ពូជសាសន៍ សាសនា អ្វីឡើយ ដូចពាក្យស្លោក ទីណាមានការលំបាកទីនោះមានកាកបាទក្រហមកម្ពុជា។

លោក ម៉ឹង វុធី បានមានប្រសាសន៍បន្តថា ឱ្យតែបងប្អូនជួបការលំបាក កាកបាទក្រហមកម្ពុជាតែងតែចុះយកអំណោយចែកជូនបងប្អូនភ្លាមៗ ដោយមិនទុកឱ្យបងប្អូនមានជីវភាពខ្វះខាត កាន់តែធ្ងន់ធ្ងរជាងនេះទៀតនោះទេ ពោលគឺត្រូវជួយដោះទុក្ខលំបាករបស់បងប្អូន ឱ្យបានទាន់ពេលវេលា ដោយធ្វើយ៉ាងណាឱ្យបងប្អូនប្រជាពលរដ្ឋ ដែលជួបប្រទះការលំបាកខ្វះខាត មានជីវភាពរស់នៅសមរម្យ មានចំណីអាហារបរិភោគគ្រប់គ្រាន់។

លោក ម៉ឹង វុធី បានសំណូមពរដល់បងប្អូនប្រជាពលរដ្ឋទាំងអស់ ត្រូវយកចិត្តទុកដាក់ថែទាំសុខភាព និងរស់នៅប្រកបដោយអនាម័យខ្ពស់ ហូបស្អាត ផឹកស្អាត រស់នៅស្អាត ដើម្បីជៀសវាងជំងឺដង្កាត់ផ្សេងៗក្នុងរដូវទឹកជំនន់នេះ។ហើយម្យ៉ាងទៀតត្រូវស្វែងយល់ ពីការប្រែប្រួលអាកាសធាតុ ដែលក្រសួងធនធានទឹកនិងឧតុនិយម បានផ្សព្វផ្សាយពីបញ្ហាទឹកជំនន់ ងាយស្រួលក្នុងការជម្លៀសទៅកាន់ទីទួលសុវត្ថិភាព បានទាន់ពេលវេលាមុនពេលមានគ្រោះទឹកជំនន់មកដល់។

អំណោយដែលបានប្រគល់ជូនបងប្អូនប្រជាពលរដ្ឋ ទាំង២១គ្រួសារនៅពេលនោះដោយមួយគ្រួសារៗទទួលបាន អង្ករ២៥ គីឡូក្រាម ត្រីខ១យួរ មី១កេស ប្រេងឆា១លីត្រ នំ១ប្រអប់ ទឹកត្រី៣ដប ទឹកស៊ីអ៊ីវ៣ដប កន្ទេល១ មុង១ ភួយ១ សារុង១ ក្រម៉ា១ និងថវិកា២ម៉ឺនរៀល៕ 

ដោយ អ៊ុច សៀង