AKP តាកែវ ថ្ងៃទី១៧ ខែតុលា ឆ្នាំ២០២៥-- ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ នាព្រឹកថ្ងៃទី១៧ ខែតុលា ឆ្នាំ២០២៥ បានដឹកនាំគណៈប្រតិភូទៅទស្សនកិច្ចសិក្សាស្វែងយល់ពីការបង្កាត់ និងភ្ញាស់ពូជបង្កងនៅក្នុងកសិដ្ឋានមួយកន្លែងនៅភូមិហ៊ូចូវ ក្រុងស៊ែរមែន ខេត្តហ្វូជាន សាធាររដ្ឋប្រជាមានិតចិន។

ការចុះសិក្សាស្វែងយល់ពីការបង្កាត់ និងភ្ញាស់ពូជបង្កងរបស់គណៈប្រតិភូ គឺស្របពេលដែលខេត្តតាកែវជាខេត្តមួយនៅក្នុងប្រទេសកម្ពុជា ដែលទទួលទិន្នផលបង្កងធម្មជាតិប្រមាណ៥តោនក្នុងមួយឆ្នាំៗ ដែលប្រកបដោយរសជាតិឈ្ងុយឆ្ងាញ់ ហើយខេត្តតាកែវក៍ជាខេត្តមួយដែលមានការចញ្ចឹមបង្កងនៅតាមបណ្ដាស្រុកមួយចំនួនផងដែរ។ ចំពោះទស្សនកិច្ចរបស់គណៈប្រតិភូខេត្តតាកែវនៅកសិដ្ឋានបង្កាត់ និងភ្ញាស់ពូជបង្កងនៅក្រុងស៊ែរមែននេះនឹងនាំមកនូវអត្ថប្រយោជន៍លើការបង្កាត់ និងភ្ញាស់ពូជបង្កងនៅក្នុងខេត្តតាកែវ។

សូមជម្រាបជូនថា ឯកឧត្តម វ៉ី សំណាង អភិបាលខេត្តតាកែវបានដឹកនាំគណៈប្រតិភូទៅចូលរួមកិច្ចប្រជុំសមាគមព្រែកជីកពិភពលោកនៅក្រុងយ៉ាងចូវ ខេត្តជាងស៊ូ ប្រទេសចិនរយៈពេល៥ថ្ងៃ ចាប់ពីថ្ងៃទី១៥ ដល់ថ្ងៃទី១៩ ខែតុលា ឆ្នាំ២០២៥ នឹងបន្តទៅទីក្រុងស៊ែរមែន ខេត្តហ្វូជាន ដើម្បីធ្វើទស្សនកិច្ចប្រព័ន្ធចម្រោះទឹកកខ្វក់ វិស័យកសិកម្ម ការចិញ្ចឹមសត្វ វារីវប្បកម្ម វិស័យរ៉ែ ហើយគណៈប្រតិភូក៍គ្រោងនឹងបង្ហាញអំពីសក្តានុពលរបស់ខេត្តតាកែវដល់អ្នកវិនិយោគជនជាតិចិនផងដែរ៕

ដោយ៖ ចាន់ សុភឿន (ប្រភព៖ រដ្ឋបាលខេត្តតាកែវ)