AKP បន្ទាយមានជ័យ ថ្ងៃទី១៧ ខែតុលា ឆ្នាំ២០២៥-- ក្រោមការចង្អុលបង្ហាញដ៏ខ្ពង់ខ្ពស់ពីឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ លោកជំទាវ ជ័យ ណារី អ៊ុ រាត្រី អនុប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត បានដឹកនាំគណៈប្រតិភូ ចុះសួរសុខទុក្ខ និងនាំយកអំណោយទៅចែកជូនដល់កងទ័ពជួរមុខចំនួន១២នាក់ ដែលកំពុងសម្រាកព្យាបាលនៅគិលានដ្ឋានកងរាជអាវុធហត្ថខេត្តបន្ទាយមានជ័យ នៅព្រឹកថ្ងៃសុក្រ ទី១៧ ខែតុលា ឆ្នាំ២០២៥។ កងទ័ពទាំង១២នាក់ខាងលើនេះ គឺជាកងកម្លាំងដែលបានឈរជើងការពារបូរណភាពទឹកដីយ៉ាងអង់អាចក្លាហាន នៅតាមភូមិសាស្ត្រ ភូមិព្រៃចាន់ និងភូមិជោគជ័យឃុំអូរបីជាន់ស្រុកអូរជ្រៅខេត្តបន្ទាយមានជ័យ ជាប់ព្រំដែនថៃ។

ក្នុងឱកាសនោះ លោកជំទាវ ជ័យ ណារី អ៊ុ រាត្រី បានពាំនាំនូវការនឹករលឹក ការយកចិត្តទុកដាក់ និងការសួរសុខទុក្ខយ៉ាងខ្ពង់ខ្ពស់ពីសំណាក់ថ្នាក់ដឹកនាំរាជរដ្ឋាភិបាល ក៏ដូចជាអាជ្ញាធរខេត្ត ចំពោះកងកម្លាំងប្រដាប់អាវុធគ្រប់ជាន់ថ្នាក់ ជាពិសេសចំពោះកងកម្លាំងទាំងអស់ដែលបានឈរជើងយ៉ាងរឹងមាំ ដើម្បីការពារបូរណភាពទឹកដីពីការឈ្លានពានរបស់សត្រូវ ព្រមទាំងបាន កោតសរសើរយ៉ាងស្មោះអស់ពីចិត្តចំពោះវីរភាពដ៏អង់អាចក្លាហានរបស់កងកម្លាំងប្រដាប់អាវុធទាំងអស់ និងបានជូនពរកងទ័ពជួរមុខទាំង១២នាក់ ដែលកំពុងសម្រាកព្យាបាលនៅគិលានដ្ឋានកងរាជអាវុធហត្ថខេត្ត សូមឆាប់បានជាសះស្បើយ និងមានកម្លាំងកាយមាំមួនត្រលប់ទៅបំពេញភារកិច្ចវិញ។

សូមជម្រាបជូនថា អំណោយ និងថវិកាដែលបានចែកជូនដល់កងទ័ពទាំង១២នាក់ រួមមាន៖ ថវិកាសរុប ៥,៦០០,០០០ រៀល (ក្នុងនោះម្នាក់ទទួលបាន៤៥០,០០០ រៀល) ដោយបានមកពីរដ្ឋបាលខេត្ត ២,៤០០,០០០ រៀល  ពីឯកឧត្តម អ៊ុ រាត្រី អភិបាលខេត្ត និងលោកជំទាវ ១,៤០០,០០០ រៀល និងពីសមាគមនារីខេត្ត ១,៨០០,០០០ រៀល។ គ្រឿងឧបភោគបរិភោគចំនួន១២ឃីត រួមមាន៖ អង្ករ ២០ គីឡូក្រាម ទឹកសុទ្ធ១កេស មី១កេស ត្រីខ១យួរ។

គណៈប្រតិភូដែលបានចូលរួមក្នុងពិធីនេះរួមមាន លោកស្រី រស់ សុផានី អភិបាលរងខេត្ត និងជាប្រធានសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត ព្រមទាំងសមាជិកាសហការជាមួយរដ្ឋបាលខេត្តផងដែរ។ កាយវិការមនុស្សធម៌នេះបានបង្ហាញយ៉ាងច្បាស់ពីការយកចិត្តទុកដាក់របស់ថ្នាក់ដឹកនាំខេត្ត ចំពោះសុខទុក្ខរបស់កងកម្លាំងដែលបានពលីកម្លាំងកាយចិត្តដើម្បីបុព្វហេតុជាតិ៕

ដោយ ឈុន សារ៉ាត