AKP កំពង់ធំ ថ្ងៃទី១៧ ខែតុលា ឆ្នាំ២០២៥-- នៅទីបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី១៧ ខែតុលា ឆ្នាំ២០២៥ បានបើកកិច្ចប្រជុំត្រួតពិនិត្យលទ្ធផលការងារគ្រប់គ្រងការពារទប់ស្កាត់ បង្ក្រាបបទល្មើសធនធានធម្មជាតិ និងដាក់ចេញនូវទិសដៅសម្រាប់អនុវត្តបន្ត និងប្រគល់ស្បៀងអាហារគ្រឿងឧបភោគបរិភោគ ប្រេងឥន្ធនៈ ថវិកា ជូនដល់ទីបញ្ជាការស្រាលចំនួន១៧គោលដៅក្នុងកិច្ចការពារទប់ស្កាត់ និងបង្ក្រាបបទល្មើសធនធានធម្មជាតិនៅក្នុងខេត្តកំពង់ធំ ក្រោមអធិបតីភាព ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍គណៈកម្មការការពារ ទប់ស្កាត់និងបង្ក្រាបបទល្មើសធនធានធម្មជាតិខេត្តកំពង់ធំ។

លោកវរសេនីយ៍ឯក សោម សុភាវុធ មេបញ្ជាការរង និងជាអនុប្រធានក្រុមលេខាធិការដ្ឋាននៃគណៈកម្មការ ការពារ ទប់ស្កាត់ និងបង្ក្រាបបទធនធានធម្មជាតិខេត្តកំពង់ធំ បានឡើងរាយការណ៍អំពីលទ្ធផលសំខាន់ៗ ដែលកងកម្លាំងចម្រុះ អនុវត្តសម្រេចបានក្នុងភារកិច្ចការពារ ទប់ស្កាត់និងបង្ក្រាបបទល្មើសធនធានធម្មជាតិក្នុងរយៈពេលកន្លងទៅដោយបានរកឃើញនិងដករហូតដីព្រៃឈើរបស់រដ្ឋដែលជនល្មើសលួចកាប់ទន្ទ្រានកន្លងទៅបានចំនួន៤០៣១ហិកតា។ រឹបអូសមធ្យោបាយប្រព្រឹត្តបទល្មើសព្រៃឈើចំនួន១៩០គ្រឿងនិងរណាយន្តចំនួន១២៤គ្រឿង។ មធ្យោបាយប្រព្រឹត្តបទល្មើសនេសាទ កាណូត ចំនួន៣៧គ្រឿង។ បំផ្លាញឧបករណ៍នេសាទល្មើសច្បាប់អួនក្រឡាញឹកនិងស្បៃមុងបានប្រវែង២០៩៤៨៨ម៉ែត្រ។ សហការចាប់ឃាត់ការដឹកជញ្ជូនលៀសខុសច្បាប់ចំនួន០៨គ្រឿង និងចាក់លែងលៀសចូលក្នុងទន្លេបានចំនួនជាង៣៣តោន និងបានចាប់ឃាត់ខ្លួនជនសង្ស័យប្រព្រឹត្តបទល្មើសបញ្ជូនទៅសមត្ថកិច្ចជំនាញ ដើម្បី កសាងសំណុំរឿងបញ្ជូនទៅកាន់តុលាការផ្តន្ទាទោសតាមផ្លូវច្បាប់បានចំនួន៥០នាក់។

លោក អោង ប៊ុនធឿន ប្រធានមន្ទីរបរិស្ថានខេត្ត និងលោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានថ្លែងអំណរគុណចំពោះកងកម្លាំងចម្រុះពិសេសកងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានសហការល្អជាមួយស្ថាប័នមន្ទីរពាក់ព័ន្ធ រួមជាមួយកម្លាំងចម្រុះក្នុងការការពារទប់ស្កាត់និងបង្ក្រាបទល្មើសធនធានធម្មជាតិ នៅក្នុងខេត្តកំពង់ធំទទួលបានជោគជ័យគួរជាទីមោទនៈ ហើយជាមួយនោះដែរ កងកម្លាំងប្រដាប់អាវុធទាំងបី បានចូលរួមចំណែកក្នុងការដាំស្ដារព្រៃឈើឡើងវិញនៅលើផ្ទៃដីដែលបានដកហូតពីជនល្មើសនិងបានសំណូមពរដល់កងកម្លាំងចម្រុះ ដើម្បីបន្តចូលរួមសហការគ្នាបន្តទៀតដដេីម្បីការពារធនធានធម្មជាតិរបស់យើងទាំងអស់គ្នា។

ឧត្តមសេនីយ៍ទោ សោម ស៊ុន បានកោតសរសើរចំពោះកងកម្លាំងចម្រុះទាំងអស់ រួមជាមួយស្ថាប័ន មន្ទីរអង្គភាពដែលមានការពាក់ព័ន្ធព្រមទាំងអាជ្ញាធរដែនដីគ្រប់លំដាប់ថ្នាក់ក្នុងការចូលរួមការពារទប់ស្កាត់ និងបង្ក្រាបបទល្មើសធនធានធម្មជាតិប្រកបដោយស្មារតីទទួលខុសត្រូវខ្ពស់និងទទួលបានលទ្ធផលល្អប្រសើរ។ទន្ទឹមនេះឧត្តមសេនីយ៍ទោ សោម ស៊ុន បានថ្លែងអំណរគុណចំពោះឯកឧត្តម ឧបនាយករដ្ឋមន្ត្រីប្រចាំការ វង្សី វិស្សុត រដ្ឋមន្ត្រីទីស្ដីការគណៈរដ្ឋមន្ត្រីរនិងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោកឯកឧត្តម ឧត្តមសេនីយ៍ឯក ពៅ ហេង មេបញ្ជាការ យោធភូមិភាគទី៤និងឯកឧត្តម នួន ផារ័ត្ន អភិបាលខេត្តកំពង់ធំ ដែលបានដឹកនាំបញ្ជានិងគាំទ្រយ៉ាងពេញទំហឹងទាំងស្មារតី សម្ភារៈថវិកាមធ្យោបាយនិងប្រេងឥន្ធនៈ ក្នុងសកម្មភាពការពារ ទប់ស្កាត់ និងបង្ក្រាបបទល្មើសធនធានធម្មជាតិ ទើបយើងទទួលបានជោគជ័យនៅពេលនេះ។

ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗមួយចំនួន ដើម្បីអនុវត្តបន្ត និងបានប្រគល់ជូនស្បៀងអាហារ គ្រឿងឧបភោគបរិភោគប្រេងឥន្ធនៈដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈឯកឧត្តម ឧបនាយករដ្ឋមន្ត្រី វង្សី វិស្សុត ជូនដល់កងកម្លាំងចម្រុះដើម្បីបន្តសកម្មភាពក្នុងការការពារទប់ស្កាត់ និងបង្ក្រាបបទល្មើសធនធានធម្មជាតិបម្រើសង្គមជាតិ និងផលប្រយោជន៍របស់ប្រជាជនយើងដោយគ្មានការដកថយឡើយ៕

ដោយ ស៊ុម វណ្ណា