AKP ភ្នំពេញ ថ្ងៃទី១៧ ខែតុលា ឆ្នាំ២០២៥-- ក្រុមប្រឹក្សាសម្ព័ន្ធភាពសម្រាប់បេតិកភណ្ឌវប្បធម៌អាស៊ី (Alliance for Cultural Heritage in Asia) បានបើកសម័យប្រជុំវិសមញ្ញរបស់ខ្លួន ដោយមានប្រទេសចំនួន៩ និងស្ថាប័នចំនួន២ចូលរួម តាមរយៈប្រព័ន្ធវីដេអូ និងដោយផ្ទាល់ កាលពីថ្ងៃទី១៦ ខែតុលា ឆ្នាំ២០២៥។

ក្នុងនាមជាអគ្គលេខាធិការនៃសម្ព័ន្ធភាពសម្រាប់បេតិកភណ្ឌវប្បធម៌អាស៊ី ឯកឧត្តម គង់ វីរៈ អនុរដ្ឋលេខាធិការក្រសួងវប្បធម៌ និងវិចិត្រសិល្បៈ បានអញ្ជើញដឹកនាំសម័យប្រជុំនេះដោយផ្ទាល់នៅរដ្ឋធានីប៉េកាំង ដោយសម័យប្រជុំនេះផ្តោតលើរបៀបវារៈសំខាន់ចំនួន ៦ គឺ៖ ១.ការជ្រើសរើសប្រធាននិងអគ្គលេខាធិការប្រតិបត្តិថ្មី ២.ពិនិត្យទៅលើការស្នើសុំចូលជារដ្ឋសមាជិកនិងដៃគូ ៣.ពិនិត្យទៅលើចក្ខុវិស័យនិងបេសកកម្មរបស់សម្ព័ន្ធភាព ៤.ពិនិត្យទៅលើការបង្កើតគណៈកម្មាធិការ ACHA ជំនាន់ទី១ (រួមបញ្ចូលទាំងគណៈកម្មាធិការវិទ្យាសាស្ត្រនិងបច្ចេកវិទ្យានិងគណៈកម្មាធិការអូស្ត្រូនេស៊ីនិងអរិយធម៌សមុទ្រ) ៥.របាយការណ៍ស្តីពីការដាក់ពាក្យស្នើសុំគម្រោងសម្រាប់ឆ្នាំ២០២៤-២០២៥ ក្រោមគំនិតផ្តួចផ្តើមអាស៊ីសម្រាប់ការអភិរក្សបេតិកភណ្ឌ និង៦. ការរៀបចំអាណត្តិថ្មីរបស់ក្រុមប្រឹក្សា ACHA។

សូមបញ្ជាក់ថា សម័យប្រជុំវិសាមញ្ញនេះរៀបចំឡើងដើម្បីត្រៀមលក្ខណៈសម្រាប់ការរៀបចំមហាសន្និបាតលើកទី២ និងកិច្ចប្រជុំលើកទី៣នៃក្រុមប្រឹក្សាសម្ព័ន្ធភាពសម្រាប់បេតិកភណ្ឌវប្បធម៌អាស៊ី ដែលនឹងរៀបចំឡើងនៅថ្ងៃទី២៧ ខែវិច្ឆិកា ឆ្នាំ២០២៥ នៅទីក្រុងឆុងឈីង នាពេលខាងមុខនេះ៕

ដោយ ទូច វលក័្ខណ (ប្រភព៖ ក្រសួងវប្បធម៌ និងវិចិត្រសិល្បៈ)