AKP ព្រះវិហារ ថ្ងៃទី១៧ ខែតុលា ឆ្នាំ២០២៥-- លោក វ៉ាត ប៉ារ៉ានីន អភិបាលរងខេត្តព្រះវិហារ អញ្ជើញដឹកនាំកិច្ចប្រជុំស្តីពីការពង្រឹងយន្តការ និងការធ្វើបច្ចុប្បន្នភាពនៃការដោះស្រាយវិវាទក្រៅប្រព័ន្ធតុលាការ។ កិច្ចប្រជុំនេះធ្វើឡើងនៅសាលប្រជុំអគាររដ្ឋបាលសាលាខេត្តព្រះវិហារ នារសៀលថ្ងៃទី១៦ ខែតុលា ឆ្នាំ២០២៥ ដោយមានការអញ្ជើញចូលរួមពីលោក លោកស្រី ជាប្រធាន អនុប្រធានមន្ទីរអង្គភាពជុំវិញខេត្ត អភិបាល ក្រុង ស្រុកទាំង៨ និងអ្នកពាក់ព័ន្ធជាច្រើនរូបទៀត។

លោក វ៉ាត ប៉ារ៉ានីន បានមានប្រសាសន៍ថា សំណុំរឿង ឬវិវាទក្រៅប្រព័ន្ធតុលាការភាគច្រើនជាបញ្ហាដីធ្លី ជាក់ស្ដែងវិវាទដីធ្លីនៅក្នុងខេត្ត ចំនួនត្រូវបានដោះស្រាយបញ្ចប់ និងករណីខ្លះទៀត កំពុងបន្តដោះស្រាយ។ សំណុំរឿងវិវាទដីធ្លីមួយចំនួនជារឿងវិវាទដដែល (ដូចគ្នា) ហើយស្ថិតនៅក្នុងការដោះស្រាយរបស់អាជ្ញាធរ និងផ្នែកជំនាញ ប្រជាពលរដ្ឋដាក់ពាក្យបណ្ដឹងច្រើនដងទៅក្រសួង-ស្ថាប័នពាក់ព័ន្ធជួយដោះស្រាយបន្ថែមលើពាក្យបណ្ដឹងដដែល។ ជារួមគ្រប់យន្តការ និងការដោះស្រាយវិវាទដីធ្លី អាជ្ញាធរ និងផ្នែកជំនាញ ត្រូវការពង្រឹង និងយកចិត្តទុកដាក់ខ្ពស់ដើម្បីខិតខំបញ្ចប់សំណុំរឿង។

លោកអភិបាលរងខេត្តបានបន្តថា ដោយឡែកចំពោះទំនាស់បុគ្គល និងបុគ្គល ជាទំនាស់ក្នុងគ្រួសារ ដូចជាបញ្ហាអំពើហិង្សា ឬបញ្ហាផ្សេងៗ ទៀតត្រូវបានសម្របសម្រួល និងដោះស្រាយដោយសន្តិវិធីនៅថ្នាក់ភូមិ ឃុំ សង្កាត់ ក្រុង ស្រុកនិងមន្ទីរអង្គភាពជំនាញ ដែលមកដល់បច្ចុប្បន្នពុំមានបណ្ដឹង ឬពាក្យអន្តរាគមន៍ណាមួយ ចូលមកដល់រដ្ឋបាលខេត្ត ឱ្យធ្វើការជួយសម្របសម្រួល និងដោះស្រាយនោះទេ៕

ដោយ ទិត ស្រ៊