AKP ភ្នំពេញ ថ្ងៃទី១៧ ខែតុលា ឆ្នាំ២០២៥-- ឯកឧត្ដមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា និងជានាយកគម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC) រសៀលថ្ងៃទី១៦ ខែតុលា ឆ្នាំ២០២៥ បានដឹកនាំកិច្ចប្រជុំបូកសរុបបេសកកម្មគាំទ្រការអនុវត្តគម្រោង SE4HC របស់ប្រតិភូធនាគារអភិវឌ្ឍន៍អាស៊ី (ADB) ដោយមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ ព្រមទាំងថ្នាក់ដឹកនាំ និងមន្ត្រីអនុវត្តគម្រោងជាច្រើនរូប។ 

បេសកកម្មគាំទ្រការអនុវត្តគម្រោង SE4HC របស់ប្រតិភូធនាគារអភិវឌ្ឍន៍អាស៊ីបានប្រព្រឹត្តទៅចាប់ពីថ្ងៃទី០៨ ដល់ថ្ងៃទី១៥ ខែតុលា ឆ្នាំ២០២៥ ដោយបានពិភាក្សាពីវឌ្ឍនភាពនៃការអនុវត្តគម្រោងតាមលទ្ធផលនីមួយៗ រួមមាន លទ្ធផលទី១ ដល់ទី៤ និងដំណើរការអនុវត្តគម្រោងលើផ្នែកហិរញ្ញវត្ថុ លទ្ធកម្ម យេនឌ័រ សុវត្ថិភាពសង្គម និងការពិនិត្យតាមដាន និងវាយតម្លៃ។ ដោយឡែកកិច្ចប្រជុំបូកសរុបបេសកកម្មនាពេលនេះ បានធ្វើការពិភាក្សាយ៉ាងផុលផុសទៅលើរបាយការណ៍បូកសរុបលម្អិតអំពីសកម្មភាពនីមួយៗ អំពីវឌ្ឍនភាពការងារ បញ្ហាប្រឈម និងទិសដៅអនុវត្តបន្ត។

ក្នុងកិច្ចប្រជុំនេះ ឯកឧត្តមបណ្ឌិត អ៊ុម រម្យណី នាយកគម្រោងបានគូសបញ្ជាក់បន្ថែមលើចំណុចសំខាន់ៗមួយចំនួនដូចជាការរៀបចំគាំទ្រការសិក្សាបែបគម្រោងតាមការពិសោធន៍ជាក់ស្ដែង និងការបង្កើតកម្មវិធីនានាគាំទ្រការអប់រំពិសេសជាដើម។

គួរបញ្ជាក់ថា គម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC) ផ្ដោតលើការអភិវឌ្ឍការអប់រំមធ្យមសិក្សា និងជំនាញឆ្លើយតបទៅនឹងការអភិវឌ្ឍសេដ្ឋកិច្ច និងសង្គមកម្ពុជា។ គម្រោងនេះបានចាប់ផ្ដើមពីថ្ងៃទី០៦ ខែមីនា ឆ្នាំ២០២៥ ហើយគ្រោងនឹងបញ្ចប់នៅថ្ងៃទី៣១ ខែធ្នូ ឆ្នាំ២០៣០ ដោយគ្របដណ្ដប់លើវិទ្យាល័យគោលដៅចំនួន២៥៩។ ផលជះរបស់គម្រោងគឺអភិវឌ្ឍន៍មូលធនមនុស្សប្រកបដោយគុណភាពខ្ពស់ ដើម្បីអភិវឌ្ឍន៍សង្គមពុទ្ធិជននៅកម្ពុជា។ ផលសម្រេច គឺបង្កើនប្រសិទ្ធភាព និងការរួមបញ្ចូលយេនឌ័រនៃប្រព័ន្ធអប់រំមធ្យមសិក្សាទុតិយភូមិបានប្រសើរឡើង ហើយចំពោះលទ្ធផលរួមមាន៖ ១. លទ្ធភាពទទួលបានការអប់រំមធ្យមសិក្សាទុតិយភូមិប្រកបដោយគុណភាពប្រសើរឡើង។ ២. គុណភាពនៃការអប់រំមធ្យមសិក្សាទុតិយភូមិស្របតាមជំនាញសតវត្សទី២១ បានប្រសើរឡើង។ ៣. គុណភាពនៃរង្វាយតម្លៃការអប់រំមធ្យមសិក្សាទុតិយភូមិបានប្រសើរឡើង និង ៤. គន្លងអប់រំក្រោយមធ្យមសិក្សាបានពង្រឹង៕

ដោយ៖ ចាន់ សុភឿន (ប្រភព៖ ក្រសួងអប់រំ)