AKP ឧត្តរមានជ័យ ថ្ងៃទី១៦ ខែតុលា ឆ្នាំ២០២៥-- លោក ផល លឹម ប្រធានមន្ទីរព័ត៌មានខេត្តឧត្តរមានជ័យ នៅព្រឹកថ្ងៃទី១៦ ខែតុលា ឆ្នាំ២០២៥ បានដឹកនាំថ្នាក់ដឹកនាំនៃមន្ទីរព័ត៌មានខេត្តឧត្តរមានជ័យ ធ្វើសកម្មភាពថតរូប និងវីដេអូ អំពីយុទ្ធនាការប្រយុទ្ធប្រឆាំងព័ត៌មានក្លែងក្លាយ ពិធីនេះបានធ្វើឡើងនៅបរិវេនមន្ទីរព័ត៌មានខេត្ត។ នេះគីជាខេត្តទី០៧ ដែលបានបើកយុទ្ធនាការប្រយុទ្ទប្រឆាំងព័ត៌មានក្លែងក្លាយ «និយាយថាទេ ចំពោះព័ត៌មានក្លែងក្លាយ “Say No To Fake News”។

លោក ផល លឹម បានគូសបញ្ជាក់ថា គ្រប់ប្រភេទនៃព័ត៌មានក្លែងក្លាយ សុទ្ធតែមានឥទ្ធិពលអវិជ្ជមានមកលើផ្នែកសន្តិសុខ សណ្តាប់ធ្នាប់សង្គម សេដ្ឋកិច្ច និងនយោបាយ ពោលគឺព័ត៌មានក្លែងក្លាយអាចបង្កអស្ថិរភាព បង្កើតអំពើហិង្សា ដែលបណ្តាលឧិ្យកើតមានអរិភាពសង្គម ប្រជាពលរដ្ឋបាត់ទំនុកចិត្តលើការដឹកនាំ និងនាំឱ្យមានការបែកបាក់សាមគ្គីក្នុងសង្គម។

លោកបានបន្តថា ដូច្នេះសូមឱ្យអ្នកលេងបណ្តាញសង្គម អ្នកសារព័ត៌មានត្រូវផ្ទៀងផ្ទាត់ប្រភពឱ្យបានច្បាស់លាស់ពីប្រភពព័ត៌មានដែលទុកចិត្តបាន។ សម្រាប់ប្រភពព័ត៌មានផ្លូវការទាក់ទងនឹងសមរភូមិយោធានៅតំបន់ព្រំដែនមាន ប្រភព៥សំខាន់ដែលជាប្រភពផ្លូវការ គឺ ថ្នាក់ដឹកនាំកំពូលរបស់ជាតិ ក្រសួងការពារជាតិ ក្រសួងការបរទេសនិងសហប្រតិបត្តិការអន្តរជាតិ ក្រសួងព័ត៌មាន និងអង្គភាពអ្នកនាំពាក្យរាជរដ្ឋាភិបាលកម្ពុជា ដែលជាប្រភពផ្លូវការ ក្រៅពីនោះ គឺមិនមែនជាព័ត៌មានផ្លូវការទេ៕

ដោយ ទិត ស៊្រ