AKP ភ្នំពេញ ថ្ងៃទី១៦ ខែតុលា ឆ្នាំ២០២៥-- ‎ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងថា ការបង្កើត និងដាក់ឱ្យដំណើរការប្រព័ន្ធស្វ័យប្រវត្តិកម្មថ្មី គឺជាសមិទ្ធផលថ្មីមួយទៀតរបស់ក្រសួងសាធារណការ និងដឹកជញ្ជូនក្នុងការធ្វើទំនើបកម្មការផ្តល់សេវាសាធារណៈជូនប្រជាពលរដ្ឋ ដោយផ្តោតលើប្រតិបត្តិករដឹកជញ្ជូន ដែលនេះមិនត្រឹមតែជាការធ្វើឱ្យប្រសើរឡើងនូវនីតិវិធីរដ្ឋបាលប៉ុណ្ណោះទេ តែជាការបោះជំហានដ៏ធំមួយក្នុងការធ្វើបរិវត្តកម្មឌីជីថលនៅសម័យកាលបដិវត្តន៍ឧស្សាហកម្មទី៤ នៅក្នុងវិស័យសាធារណការនិងដឹកជញ្ជូន ស្របតាមមាគ៌ាដឹកនាំដ៏ឈ្លាសវៃរបស់ប្រមុខរាជរដ្ឋាភិបាលកម្ពុជា។ ការថ្លែងរបស់ឯកឧត្តម ប៉េង ពោធិ៍នា ដូចនេះក្នុងពិធីប្រកាសដាក់ឱ្យប្រើប្រាស់ជាផ្លូវការប្រព័ន្ធស្វ័យប្រវត្តិកម្ម នៃការដាក់ពាក្យស្នើសុំលិខិតអនុញ្ញាតធ្វើអាជីវកម្មដឹកជញ្ជូនក្នុងប្រទេស និងឆ្លងដែនតាមផ្លូវគោក នារសៀលថ្ងៃទី១៦ ខែតុលា ឆ្នាំ២០២៥។

ឯកឧត្តមរដ្ឋមន្ត្រីបានគូសបញ្ជាក់ថា សមិទ្ធផលថ្មីដែលប្រកាសដាក់ឱ្យដំណើរការប្រើប្រាស់ជាផ្លូវការនាពេលនេះ គឺជាសក្ខីកម្មជាក់ស្តែងនៃកិច្ចខិតខំប្រឹងប្រែងរបស់ក្រសួងសាធារណការ និងដឹកជញ្ជូន ដែល បានអនុវត្តស្របតាមគោលនយោបាយ ចក្ខុវិស័យ និងផែនការសកម្មភាពអាទិភាពរបស់រាជរដ្ឋាភិបាល។

ឯកឧត្តម ប៉េង ពោធិ៍នា បានបន្តថា បើយើងក្រឡេកមើលលើអត្ថប្រយោជន៍ និងផលចំណេញវិញការកសាងប្រព័ន្ធស្វ័យប្រវត្តិកម្មនេះឡើង មិនគ្រាន់តែជាការផ្លាស់ប្តូរបច្ចេកវិទ្យានោះទេ ប៉ុន្តែគឺជាការផ្លាស់ប្តូរផ្នត់គំនិត និងរបៀបរបបការងារទាំងមូលឱ្យដើរតាមសម័យកាលជឿនលឿន។ ជាក់ស្តែង ប្រព័ន្ធនេះនឹងផ្តល់នូវអត្ថប្រយោជន៍យ៉ាងធំធេងដល់វិស័យឯកជន ដែលជាប្រតិបត្តិករអាជីវកម្មដឹកជញ្ជូន ឱ្យទទួលបាននូវភាពងាយស្រួល និងនីតិវិធីថ្មីនៃការដាក់ពាក្យស្នើសុំក្នុងអាជីវកម្មរបស់ខ្លួន ដែលអាចស្នើ បានគ្រប់ពេលវេលា គ្រប់ទីកន្លែង ជួយសន្សំសំចៃបានទាំងពេលវេលា ថវិកា មានតម្លាភាព កាត់បន្ថយការចំណាយក្រៅផ្លូវការ និងបង្កើតនូវបរិយាកាសប្រកួតប្រជែងមួយប្រកបដោយសមធម៌សម្រាប់ធុរជនទាំងអស់។ ដោយឡែក ចំពោះស្ថាប័នអនុវត្ត គឺក្រសួងសាធារណការ និងដឹកជញ្ជូនផ្ទាល់ ប្រព័ន្ធនេះនឹងក្លាយជាឧបករណ៍ដ៏មានប្រសិទ្ធភាពក្នុងការគ្រប់គ្រងទិន្នន័យ ដោយយើងនឹងមានមូលដ្ឋានទិន្នន័យកណ្តាលមួយសម្រាប់ចងក្រងប្រមូលព័ត៌មានអំពីប្រតិបត្តិករដឹកជញ្ជូនទាំងអស់ ដែលអាចជួយដល់ការរៀបចំគោលនយោបាយ ការធ្វើផែនការយុទ្ធសាស្ត្រ និងការត្រួតពិនិត្យការអនុវត្តច្បាប់ឱ្យកាន់តែមានប្រសិទ្ធភាព ហើយជារួមប្រព័ន្ធស្វ័យប្រវត្តិកម្មថ្មីនេះ ក៏ដូចជាប្រព័ន្ធស្វ័យប្រវត្តិកម្មសំខាន់ៗមួយចំនួនទៀត ដែលក្រសួងបានដាក់ឱ្យអនុវត្តនាពេលកន្លងមកដូចជា ប្រព័ន្ធស្វ័យប្រវត្តិកម្មដាក់ពាក្យចុះបញ្ជីយានជំនិះ ប្រព័ន្ធស្វ័យប្រវត្តិកម្មត្រួតពិនិត្យលក្ខណៈបច្ចេកទេសយានជំនិះ ប្រព័ន្ធស្វ័យប្រវត្តិកម្មដាក់ពាក្យប្រឡងយកបណ្ណបើកបរ រួមជាមួយនឹងប្រព័ន្ធលេខពិសេសផ្ទាល់ខ្លួនសម្រាប់រថយន្ត និងលេខពិសេសផ្ទាល់ខ្លួនសម្រាប់ទោចក្រយានយន្ត ត្រីចក្រយានយន្ត និងម៉ូតូកង់បួន គឺបាន និងកំពុងធ្វើការផ្លាស់ប្តូររបៀបរបបការងារ និងការផ្តល់សេវាសាធារណៈនៅក្នុងវិស័យសាធារណការ និងដឹកជញ្ជូន ឆ្ពោះទៅកាន់ការធ្វើបរិវត្តកម្មឌីជីថលពេញលេញ ក្នុងគោលដៅផ្តល់ភាពងាយស្រួលដល់បងប្អូនប្រជាពលរដ្ឋ។

ឯកឧត្តមរដ្ឋមន្ត្រីបានឱ្យដឹងថា ក្រសួងសាធារណការ និងដឹកជញ្ជូន បាន និងកំពុងធ្វើការជាមួយក្រសួងសេដ្ឋកិច្ច និងហិរញ្ញវត្ថុលើការរៀបចំនីតិវិធីជំរុញឱ្យក្រុមហ៊ុនធ្វើអាជីវកម្មដឹកជញ្ជូនផ្លូវគោកទាំងអស់ត្រូវមានប័ណ្ណសន្យាធានារ៉ាប់រងជាកាតព្វកិច្ចសម្រាប់អាជីវកម្មរបស់ខ្លួន។ ដូច្នេះ សូមគ្រប់ភាគីពាក់ព័ន្ធទាំងអស់ ជាពិសេសសមាគមដឹកជញ្ជូន និងក្រុមហ៊ុនដឹកជញ្ជូនចូលរួមពិភាក្សាលើការអនុវត្តការងារ ដើម្បីស្វែងយល់អំពីអត្ថប្រយោជន៍ និងដំណោះស្រាយលើបញ្ហាដែលបានជួបប្រទះនាពេលកន្លងមក៕

ដោយ៖ ចាន់ សុភឿន រូបថត៖ សួស សាវី