AKP កំពង់ធំ ថ្ងៃទី១៦ ខែតុលា ឆ្នាំ២០២៥-- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី១៦ ខែតុលា ឆ្នាំ២០២៥ បានដឹកនាំកងកម្លាំងរៀបចំលើកដំឡើងបន្ទះសូឡាមានអំពូលភ្លើង ប្រើប្រាស់ពន្លឺព្រះអាទិត្យ ចំនួន១០ដើម ដាក់បំភ្លឺនៅទីស្នាក់ការសមាគអតីតយុទ្ធជន និងនិវត្តជនកម្ពុជាខេត្តកំពង់ធំ ដែលជាអំណោយរបស់ឯកឧត្តម នួន ផារ័ត្ន អភិបាលខេត្ត ប្រធានសមាគមអតីតយុទ្ធជន និងនិវត្តជនកម្ពុជាខេត្តកំពង់ធំព្រមទាំងបានឧបត្ថម្ភស្បៀងអាហារ គ្រឿងឧបភោគបរិភោគដែលជាអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវ ជូនក្រុមគ្រួសារអតីតយុទ្ធជន និងប្រជាជនដែលមានជីវភាពលំបាកខ្វះខាត ដែលបានឡើងមកកាន់ទីស្នាក់ការសមាគម ដើម្បីសុំជំនួយឧបត្ថម្ភនៅភូមិវល្លិ៍យាវ ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ។

ឧត្តមសេនីយ៍ទោ សោម ស៊ុន បានគោរពថ្លែងអំណរគុណចំពោះឯកឧត្តម នួន ផារ័ត្ន ដែលបានជួយឧបត្ថម្ភបន្ទះសូឡា ដាក់បំភ្លឺនៅទីស្នាក់ការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ នៅពេលនេះ ចំនួន១០ដើម  ហើយជាមួយនោះផងដែរ កាលពីពេលកន្លងទៅថ្មីៗនេះ ឯកឧត្តមអភិបាលខេត្តកំពង់ធំក៏បានជួយឧបត្ថម្ភបន្ទះសូឡា ដាក់បំភ្លឺតាមដងផ្លូវនៅក្នុងភូមិអតីតយុទ្ធជន ស្ថិតនៅក្នុងឃុំក្រយា ស្រុកសន្ទុក ខេត្តកំពង់ធំ បានចំនួន៧៥ដើម រួចមកហើយ។

ក្នុងឱកាសនោះ ឧត្តមសេនីយ៍ទោ សោម ស៊ុន ក៏បានជួបសំណេះសំណាលជាមួយបងប្អូនអតីតយុទ្ធជន និងក្រុមគ្រួសារអតីតយុទ្ធជនពលី ព្រមទាំងប្រជាពលរដ្ឋដែលមានជីវភាពលំបាកខ្វះខាតចំនួន៥គ្រួសារ ដែលបានឡើងមកសុំស្បៀងអាហារគ្រឿងឧបភោគបរិភោគ នៅទីស្នាក់ការសមាគមអតីតយុទ្ធជន និងនិវត្តជនកម្ពុជាខេត្តកំពង់ធំ ព្រមទាំងបានឧបត្ថម្ភស្បៀងអាហារ គ្រឿងឧបភោគបរិភោគអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនពួកគាត់ ដោយក្នុងមួយគ្រួសារទទួលបាននូវអង្ករចំនួន ២៥គីឡូក្រាម មីខ្លាឃ្មុំចំនួន០១កេស ទឹកត្រីទឹកស៊ីអ៉ីវចំនួន២យួរ និងត្រីខកំប៉ុងចំនួន០២យួរ។ ដោយឡែកប្អូនស្រីមេម៉ាយដែលមានកូនតូចៗនៅក្នុងបន្ទុកចំនួន៤នាក់ ដោយប្រកបរបររើសអេតចាយលក់ដើម្បីបានប្រាក់ទិញអង្ករចិញ្ចឹមជីវិតកូនតូចៗប្រចាំថ្ងៃ។ ដោយឃើញពីការលំបាកនេះឧត្តមសេនីយ៍ទោ សោម ស៊ុន ក៏បានឧបត្ថម្ភថវិកាបន្ថែមមួយចំនួនជូនដល់ក្រុមគ្រួសារគាត់ផងដែរ៕

ដោយ ស៊ុម វណ្ណា