AKP ភ្នំពេញ ថ្ងៃទី១៦ ខែតុលា ឆ្នាំ២០២៥ -- អ្នកចូលរួមនៅក្នុងវេទិកាអន្តរជាតិឆ្នាំ2025 ស្តីពីកិច្ចសហប្រតិបត្តិការក្នុងតំបន់ និងការអភិវឌ្ឍនៃប្រទេសចិន ជប៉ុន និងកូរ៉េខាងត្បូង បានជំរុញឱ្យប្រទេសទាំងបីមើលទៅឱ្យហួសពីភាពខុសគ្នារបស់ពួកគេ និងធ្វើឱ្យកិច្ចសហប្រតិបត្តិការកាន់តែស៊ីជម្រៅ។ ប្រឈមមុខនឹងភាពមិនប្រាកដប្រជាជាសកល ការកើនឡើងនូវលទ្ធិគាំពារនិយម ការប្រែប្រួលអាកាសធាតុ និងការរីកចម្រើនយ៉ាងឆាប់រហ័សក្នុងបច្ចេកវិទ្យាបញ្ញាសិប្បនិម្មិត (AI) អ្នកចូលរួមទាំងអស់បានមូលមតិគ្នាជាកច្ឆន្ទដែលថា ការប្រកួតប្រជែងផ្តាច់មុខនាំទៅរកការធ្លាក់ចុះរួមគ្នា ខណៈដែលកិច្ចសហប្រតិបត្តិការគឺជាផ្លូវទៅកាន់វិបុលភាពរួមគ្នា និងការពង្រឹងភាពធន់នឹងសេដ្ឋកិច្ច។ កិច្ចខិតខំប្រឹងប្រែងត្រីភាគីនេះត្រូវបានចាត់ទុកថាជាជម្រើសដ៏សំខាន់មួយចំពោះប្រព័ន្ធអេកូឡូស៊ីនវានុវត្តន៍ដែលបច្ចុប្បន្ននាំមុខដោយសហភាពអឺរ៉ុប និងសហរដ្ឋអាមេរិក។

សក្ដានុពល​សម្រាប់​ការ​រួម​សេដ្ឋកិច្ច​ក្នុង​ចំណោម​ប្រទេស​អាស៊ី​បូព៌ា​ទាំង​បី ​គឺ​មាន​ទំហំ​ធំ​សម្បើម​ ព្រោះ​ប្រទេស​ទាំង​នោះ​មាន​ចំនួន​សរុប​ជិត​មួយ​ភាគ​បួន​នៃផលិតផលក្នុងស្រុកសរុប (GDP) របស់ពិភពលោក។ ការសិក្សាមួយដែលបង្ហាញនៅក្នុងវេទិកានេះ បានបង្ហាញពីភាពខ្លាំងនៃឧស្សាហកម្មដែលបំពេញបន្ថែមរបស់ពួកគេ ដូចជាវត្ថុធាតុដើមរបស់ប្រទេសជប៉ុន វិស័យបន្ទះឈីបរបស់កូរ៉េខាងត្បូង និងមូលដ្ឋានផលិតកម្មដ៏រឹងមាំរបស់ប្រទេសចិននិងទីផ្សារដ៏ធំ។ អ្នកជំនាញបានអះអាងថា ខណៈដែលកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (RCEP) បានជួយ ហើយកិច្ចព្រមព្រៀងពាណិជ្ជកម្មសេរីត្រីភាគីផ្លូវការនឹងបន្តទៅមុខទៀតដោយការបិទខ្សែសង្វាក់ផ្គត់ផ្គង់។

តាមរយៈការរួមបញ្ចូលគ្នានូវភាពខ្លាំងរបស់ពួកគេ ប្រជាជាតិទាំងបីអាចសម្រេចបាននូវឥទ្ធិពលជាសកលដ៏សំខាន់ ដែលអាចកំណត់បាន ៤៥% នៃស្តង់ដារ AI សកលលោក និងស្មើនឹងមួយភាគបីនៃបច្ចេកវិទ្យាថាមពលស្អាតនៅត្រឹមឆ្នាំ២០៣០។ មន្ត្រីបានសង្កត់ធ្ងន់ថា កិច្ចសហប្រតិបត្តិការមានសារៈសំខាន់មិនត្រឹមតែសម្រាប់ការជំរុញកំណើនសេដ្ឋកិច្ចប៉ុណ្ណោះទេថែមទាំងកាត់បន្ថយការចំណាយ និងការរស់រានមានជីវិតពីភាពមិនប្រាកដប្រជានៃនវានុវត្តន៍បច្ចេកវិទ្យាផងដែរ។ កិច្ចសហការនេះត្រូវបានគេមើលឃើញថា ជាការឆ្ពោះទៅរកការកសាងសហគមន៍អាស៊ីប៉ាស៊ីហ្វិកប្រកបដោយការបើកចំហ ស្វាហាប់ ភាពធន់ និងសន្តិភាព ដែលអាចជួយរៀបចំសណ្តាប់ធ្នាប់សេដ្ឋកិច្ចពិភពលោកឡើងវិញ៕

ដោយ៖ យា ចិន្តាខន្តី (ប្រភព៖ ឆាយណាដេលី)