AKP ភ្នំពេញ ថ្ងៃទី១៦ ខែតុលា ឆ្នាំ២០២៥-- ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CaWSIP-MAFF ប្រធាន និងមន្ត្រីអនុវត្តគម្រោង កាលពីថ្ងៃទី១៥ ខែតុលា ឆ្នាំ២០២៥ បានចុះទៅដល់មូលដ្ឋានបណ្តាសហគមន៍កសិកម្មនៅក្នុងឃុំស្រែហ៊ុយ ឃុំស្រែសង្គម និងឃុំអរបួនលើ ស្រុកកោះញែក ខេត្តមណ្ឌលគិរី ក្នុងគោលបំណង ពិនិត្យកំណត់ទីតាំងដាក់ផ្ទះសំណាញ់ដែលមានប្រសិទ្ធភាពក្នុងការបញ្រ្ជាប ទទួលយកបាន និងជ្រើសយកសហគមន៍ចូលរួមអនុវត្តផលិតកម្មបន្លែបង្ហាញដោយការដាំក្នុងផ្ទះសំណាញ់ គាំទ្រផលិតកម្មបន្លែ បង្ហាញបច្ចេកទេសកសិកម្មឆ្លាតវៃ និងធន់ទៅនឹងអាកាសធាតុ។

នាឱកាសនោះ ឯកឧត្ដមបណ្ឌិតរដ្ឋលេខាធិការបានគូសបញ្ជាក់ថា គម្រោងនឹងកំណត់ទីតាំងផលិតកម្មរួម ផែនការតាមប្រភេទ និងបរិមាណបន្លែ តាមរយៈការធ្វើកិច្ចសន្យាច្បាស់លាស់ជាមួយដៃគូឯកជន។ ក្នុងនោះដែរវិស័យឯកជនជាដៃគូនឹងត្រូវវិនិយោគកន្លែងវិចខ្ចប់បន្លែ ដាក់ផែនការឱ្យសហគមន៍ផលិត ផ្តល់ប្រឹក្សាបច្ចេកទេសជូនដល់សមាជិកសហគមន៍ ដែលបានចុះកិច្ចសន្យាប្រមូលទិញយកផលិតផលតាមពេលវេលា បរិមាណ តម្លៃ ដែលបានឯកភាពក្នុងកិច្ចសន្យា។

ឯកឧត្តមបានបញ្ជាក់ថា គម្រោងកែលម្អសន្តិសុខទឹកកម្ពុជានឹងអនុវត្តនៅក្នុងតំបន់វិសាលភាពគម្រោង រួមមាន៖ ១. ប្រព័ន្ធស្រោចស្រពស្រែហ៊ុយ ស្រុកកោះញែក ខេត្តមណ្ឌលគិរី ២. ប្រព័ន្ធស្រោចស្រពកន្ទួត-ស្វាយជ្រុំ ស្រុកចិត្របុរី ខេត្តក្រចេះ ៣. ប្រព័ន្ធស្រោចស្រព៣០កញ្ញា ស្រុកស្ទោង ខេត្តកំពង់ធំ និង៤. ប្រព័ន្ធស្រោចស្រពកំពីងពួយ  ស្រុកជាំក្សាន្ត ខេត្តព្រះវិហារ ក្នុងគោលបំណង បង្កើនចំណូលកសិករ តាមរយៈការផ្តល់បច្ចេកទេសផលិតកម្មកសិកម្ម ដែលមានការធន់ទៅនឹងអាកាសធាតុ៕

ដោយ៖ ចាន់ សុភឿន (ប្រភព៖ ក្រសួងកសិកម្ម)