AKP ព្រះសីហនុ ថ្ងៃទី១៦ ខែតុលា ឆ្នាំ២០២៥-- លោក ថៃ រិទ្ធី អគ្គនាយករងកំពង់ផែស្វយ័តក្រុងព្រះសីហនុ បានស្វាគមន៍ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ និងលោក Du Xiaogang លេខាបក្សទីក្រុងអ៊ូស៊ី និងជាប្រធានគណៈប្រតិភូ ដែលបានអញ្ជើញធ្វើទស្សនកិច្ចនៅកំពង់ផែស្វយ័តក្រុងព្រះសីហនុ និងកំពង់ផែជាំងអ៊ុន ទីក្រុងអ៊ូស៊ី អបអរសាទរការសម្រេចបានបរិមាណកុងតឺន័រឆ្លងកាត់ចំនួន ៥០០TEUs នារសៀលថ្ងៃពុធ ទី១៥ ខែតុលា ឆ្នាំ២០២៥។

លោក ថៃ រិទ្ធី អគ្គនាយករងកំពង់ផែស្វយ័តក្រុងព្រះសីហនុ បានធ្វើការស្វាគមន៍ចំពោះវត្តមានរបស់ ឯកឧត្តមអភិបាលខេត្តព្រះសីហនុ និងលោក Du Xiaogang លេខាបក្ស ទីក្រុងអ៊ូស៊ី ដែលបានអញ្ជើញមកទស្សនកិច្ច និងចូលរួមក្នុងពិធីអបអរសាទរការសម្រេចបានបរិមាណកុងតឺន័រឆ្លងកាត់ចំនួន ៥០០TEUs ក្រោមកិច្ចសហប្រតិបត្តិការរវាងកំពង់ផែស្វយ័តក្រុងព្រះសីហនុ និងកំពង់ផែជាំងអ៊ុន ទីក្រុងអ៊ូស៊ីនាថ្ងៃនេះ។

លោកអគ្គនាយករងកំពង់ផែស្វយ័តក្រុងព្រះសីហនុបានថ្លែងអំណរគុណរដ្ឋាភិបាលចិន ប្រជាជន ព្រមទាំងអ្នកវិនិយោគចិនដែលបាន និងកំពុងវិនិយោគនៅក្នុងប្រទេសកម្ពុជា ជំរុញដល់កំណើនសេដ្ឋកិច្ចជាតិកម្ពុជា និងជ្រើសយកកំពង់ផែស្វយ័តក្រុងព្រះសីហនុ ជាមាត់ច្រកក្នុងការនាំចូល នាំចេញទំនិញទៅកាន់ទីផ្សារពិភពលោក។ កាលពីឆ្នាំ២០០៩ ទីក្រុងព្រះសីហនុ បានចងសម្ព័ន្ធមេត្រីភាពក្រុងបងប្អូនជាមួយទីក្រុងអ៊ូស៊ី តាមរយៈទំនាក់ទំនងនេះ និងក្នុងដំណើរទស្សនកិច្ចរបស់ឯកឧត្តម អភិបាលខេត្តព្រះសីហនុ កាលពីថ្ងៃទី០៨ ខែមិថុនា ឆ្នាំ២០២៥ នៅទីក្រុងអ៊ូស៊ី កំពង់ផែស្វយ័តក្រុងព្រះសីហនុ (ក.ស.ស) និងកំពង់ផែ ជាំងអ៊ុន បានធ្វើការពង្រឹងទំនាក់ទំនងមិត្តភាព និងបានរៀបចំលិខិតផ្តួចផ្តើម ស្តីពីការបង្កើតកិច្ចសហប្រតិបត្តិការយុទ្ធសាស្ត្រដោយផ្តោតលើគោលការណ៍ “ផ្តល់អត្ថប្រយោជន៍ និងកិច្ចសហប្រតិបត្តិការឈ្នះឈ្នះ” ទៅវិញទៅមក។

លោកអគ្គនាយករងកំពង់ផែបានបញ្ជាក់ថា នេះជាមោទនភាពរបស់កំពង់ផែស្វយ័តក្រុងព្រះសីហនុ ស្របតាមការប្តេជ្ញាចិត្តរបស់សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងបន្តដោយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងការធ្វើសហប្រតិបត្តិការពេញលេញស្របតាមចក្ខុវិស័យ និងផែនការមេ (Master Plan) ក្នុងការប្រែក្លាយកំពង់ផែស្វយ័តក្រុងព្រះសីហនុ ទៅជាកំពង់ផែតំបន់ (Regional Port) និងមជ្ឈមណ្ឌលឡូជីស្ទិក (Logistics Hub) ដែលមិនត្រឹមតែសម្រាប់ប្រទេសកម្ពុជាប៉ុណ្ណោះទេ គឺសម្រាប់មហាតំបន់ទន្លេមេគង្គ (Greater Mekong Sub Region) និងលើសកលលោកទៀតផង។ ដោយផ្អែកលើសមត្ថភាពរបស់ក.ស.ស នាពេលបច្ចុប្បន្ន និងលទ្ធផលដែលសម្រេចបាននូវបរិមាណកុងតឺន័រឆ្លងកាត់ចំនួន ៥០០TEUs ក្រោមកិច្ចសហប្រតិបត្តិការរវាងកំពង់ផែស្វយ័តក្រុងព្រះសីហនុ និងកំពង់ផែ ជាំងអ៊ុន ទីក្រុងអ៊ូស៊ី។ ខ្ញុំសង្ឃឹមថា កំពង់ផែជាំងអ៊ុន ទីក្រុងអ៊ូស៊ី នឹងមានចំនួនជើងនាវាដឹកជញ្ជូន និងបរិមាណទំនិញបន្ថែមទៀតមកកាន់កំពង់ផែស្វយ័តក្រុងព្រះសីហនុ បង្ករភាពងាយស្រួលក្នុងការដឹកជញ្ជូនទំនិញទៅមករវាងទីក្រុងអ៊ូស៊ី និងកម្ពុជា។លើសពីនេះទៀតកំពង់់ផែស្វយ័តក្រុងព្រះសីហនុ បានដើរតួនាទីយ៉ាងសំខាន់សម្រាប់ការតភ្ជាប់ (Connectivity) រវាងកំពង់ផែប្រទេសចិន និងកម្ពុជា ជាពិសេសការដឹកជញ្ជូនដោយត្រង់ (Direct Call) ផ្តល់នូវផលចំណេញប្រកបដោយប្រសិទ្ធភាពសម្រាប់តំបន់មេគង្គ ជាពិសេសការពន្លឿនកំណើនសេដ្ឋកិច្ច និងភាពប្រកួតប្រជែងសម្រាប់កម្ពុជា និងក្នុងតំបន់។

តាងនាមឱ្យថ្នាក់ដឹកនាំកំពង់ផែស្វយ័តក្រុងព្រះសីហនុសូមថ្លែងអំណរគុណ ឯកឧត្តម ម៉ាង ស៊ីណេត អភិបាលខេត្តព្រះសីហនុនិង លោក Du Xiaogang លេខាបក្ស ទីក្រុងអ៊ូស៊ី និងគណប្រតិភូ បានចំណាយពេលវេលាដ៏មានតម្លៃ អញ្ជើញចូលរួមកម្មវិធីអបអរសាទរនាថ្ងៃនេះនៅកំពង់ផែស្វយ័តក្រុងព្រះសីហនុ សម្រេចបានបរិមាណកុងតឺន័រឆ្លងកាត់ចំនួន ៥០០TEUs៕

ដោយ ងូ សុមុនី